Read Yucateco Sofonías 1 Bible Online

Sofonías 1 - Yucateco bible

Sofonías 1

¹Lela' leti' le péectzil tu dzaj Yuumtzil ti' Sofonías ti' u kiinilo'ob Josías u paal Amón u ajawil ca'ach Judá. Sofoniase' u paal ca'ach Cusi, Cusie' u paal ca'ach Gedalías, Gedalíase' u paal Amarías, Amaríase' u paal Ezequías.

²Je'el ba'ax cu ya'alic Yuumtzila': Bin in ca'a in kascunt tuláacal ba'ax yaan tu yóokol lu'um.

³Bíin in ch'éejs le wíinico'ob bey xan le ba'alche'obo', bíin in xu'uls ch'íich'o'ob yéetel cayo'ob, bíin in dzáa tu'ux u t'óochpajal le loolob máaco'obo' bíin in lukes xan wíinic tu yóokol lu'um. Bey u ya'alic Yuumtzila':

⁴Bíin in tich' in kab u ti'al in jadzic Judá bey xan tuláacal u cajnáalilo'ob Jerusalén. Bíin in lukes ti' le cúuchila' u ka'ajsajil u le tuutus ku Baalo', bey xan u ka'ajsajil u aj kiino'ob.

⁵Bíin in xu'uls le máaxo'ob cu na'acalo'ob tu yóokol najo'ob u kulto'ob le eeko'obo', bey xan cu xoltalo'ob jalach t'aan tin kaaba' yéetel tu kaaba' ku Milco.

⁶Bíin in xu'uls xan le máaxo'ob cu tzelicuba'ob ti' teno', le máaxo'ob ma' tu caxtiqueno'ob mix teech u taalo'ob káat chi' ti' teen.

⁷¡Mac a chi'ex tu táan Yuumtzil, tumen u kiinil Yuumtzile' táan u náadzal! ¡Yuumtzile' dzo'oc u nu'ucbesic jun p'éel quíimsbil ba'alche', dzo'oc xan u jun páaycuntic le máaxo'ob u t'anmajo'obo'!

⁸Tu kiinil le quíimsbil ba'alche'ob Yuumtzile' cu ya'alic: Bíin in jadz u nuuquilo'ob; u paalalo'ob ajaw yéetel tuláacal máaxo'ob búuquintico'ob jela'an nooko'ob.

⁹Ti' le kiino' bíin xan in jadz le máaxo'ob cu síit'tico'ob jool najo'obo', bey xan le máaxo'ob cu chupico'ob yéetel meyaj loobo'ob bey xan yéetel tuusilo'ob u yotoch u dzuulilo'obo'.

¹⁰Yuumtzile' bey u ya'alica': Ti' le kiino' bíin u'uyac u awatilo'ob káat áantaj líikbal ti' le u Jool najil Cayo'ob. Bíin awatnac le máaco'ob caja'ano'ob tu ca'a paach caajo' bíin u'uyac xan u Juum níiquil tuunicho'ob likbal te jo'ol lu'umo'obo'.

¹¹¡Awat okolnaque'ex u cajnáalile'ex u Paach Caajil Kut, tumen tuláacal le j man coonolo'obo' bíin j quíimico'ob, tuláacal le máaxo'ob u cuchmajo'ob taakino' bíin xu'ulsa'aco'ob!

¹²Ti' le kiino' bíin in ch'a'a jun p'éel ch'uyub sáas u ti'al in xakaltic Jerusalén. Bíin in jadz túun le máaco'ob jeedzel u yu'ubicuba'ob je'el bix jeedzel acacbalil vinoe', je'el bix u ya'alic tu baatzilo': ¡Yuumtzile' mix ba'al bíin u beete, mix utz mix kaas!

¹³Tu yo'olal lelo' bíin láaj ocolta'ac u ayikalilo'ob bey xan bíin láaj pa'abac u yotocho'ob. Bíin u beeto'ob najo'ob, ba'ale' ma' bíin cajlaco'obi'; bíin u pako'ob uvaob, ba'ale' ma' bíin u yuko'ob u kaabi'.

¹⁴¡Dzo'oc u náadzal u noj kiinil Yuumtzil! ¡Dzo'oc u náadzal, séeba'an u taal! U quíilbal u taal Yuumtzile' bíin káajac: ¡tac u asab j xiixib máaquilo'ob bíin awatnaco'ob túun!

¹⁵Le kiin bíin taalaco' u kiinil p'uja'anil, u kiinil yaamyamil yéetel yaj óolal, u kiinil óotzilcunaj yéetel láaj xu'ulsajil, u kiinil áakab yéetel éekjoche'enil u kiinil múuyalo'ob yéetel bo'oyil u yéekjo'och'e'ental;

¹⁶u kiinil u jóopsa'al paax yéetel u kiinil awat káat óolal tu yo'olal tuulum caajo'ob, bey xan tu yo'olal witzil najo'ob.

¹⁷Yuumtzile' cu ya'alic: Bíin in beet u yaamyam le máaco'obo'. Bíin xíimbalnaco'ob bey ch'óopo'obe', tumen j kebanchajo'ob ti' teen. U ki'ikelo'obe' bíin wéequec bey u ma'ay lu'ume', u bakelo'obe' bíin niclac bey ta'e'.

¹⁸Le kiin p'uujul Yuumtzile', ma' bíin to'ococ wíinic mix tumen u plata mix tumen u oro, tumen u káakil u p'uja'anil Yuumtzile' bíin u tóoc tuláacal le caajo'obo'. ¡Tuláacal u cajnáalilo'ob yóokolcaabe' bíin xu'uluc jun súutuc!