Read Yucateco Sofonías 3 Bible Online

Sofonías 3 - Yucateco bible

Sofonías 3

¹¡Yaj yanil Jerusalén, j dzu'uy óol caaj u kascuntmajubáa yéetel cu yedzic wíinico'ob!

²Ma' tu yu'ubaj u t'aan Yuumtzili'; mix tu yóoltaj ca utzquinta'ac u cuxtali'; ma' tu yocsaj u yóol ti'i', mix bin u káat áantaj ti' Kui'.

³U nuuquilo'obe' beyo'ob leóno'on cu yáacamo'obe'; u aj ilaj tacpoolilo'obe' beyo'ob u peekilo'ob x tocoy lu'um ma' tu p'atico'ob mix jun p'éel baac u ti'al sáamal.

⁴U aj bóobato'obe' j ma' subtalo'ob yéetel j ca'a p'éel icho'ob; u aj kiino'obe' cu manba'alcuuntico'ob quili'ich naj yéetel cu mixba'alcuntico'ob u ya'almaj t'aan Yuumtzil.

⁵Ba'ale' Yuumtzile' ti' yaan te j caajo'; leti'e' cu beetic ba'ax utz, ma' tu beetic ba'ax kaas. Sáamsamal tu ja'atzcab kiinil cu béeycuntic u p'is óol. Ba'ale' le j loolob máaco' mix u kaj óol subtali'.

⁶Yuumtzile' cu ya'alic: Dzo'oc in ch'éejsic múuch' caajo'ob, dzo'oc in jáay jenic u wutzil najilo'ob u tuulumo'ob dzo'oc xan in p'atic x tocoyil u bejilo'ob, u mina'an mix máac ca máanaqui'. ¡Jach mix jun túul máac cu yila'al tu caajilo'ob! ma' p'aatal jach mix jun túul u cajnáalili'

⁷Tin tucultaj: Beyo' Jerusalene' bíin u ch'a'a ti' teen sajaquil bíin u yóolt ca in tzol u xiquin; wa ma'e' bíin p'áatac láaj ch'éejsa'an u yotoch tu yo'olal u úuchic in jadzic. Ba'ale' leti'obe' tu séebcuntajo'ob u beeto'ob tuláacal jejeláasil loobo'ob.

⁸Le t o'olale', pa'atene'ex ti' le kiin le quéen líikiquen u ti'al in xot kintique'ex. Teen Yuumtzil, tene' quin wa'alic: Dzo'oc in tucultic in much'quintic múuch' caajo'ob yéetel ajawilo'ob u ti'al in láalic tu yóokolo'ob in p'uja'anil, in táaj kuuxil. ¡Tuláacal lu'um bíin láaj jáabac tumen u káakil in p'uja'anil!

⁹Le quéen kuchuc le kiino', bíin in wutzquint u t'aan le caajo'obo', u ti'al ca u ch'a'a chi'ito'ob in kaaba', u ti'al ca u meyajteno'ob chen yéetel jun p'éelili' tuucul.

¹⁰Tu táanxel tzéelil u yáalcab u ja'ilo'ob Eti'opiae', in caajal ki'itpaja'ano'obo', bíin taalaco'ob yéetel káat óolal u taaso'ob teen ti'ibil óolal.

¹¹Ti' le kiino'obo', in caajale' ma' bíin u ch'a'a subtal tu yo'olal mix jun p'éel ti' le ba'axo'ob ta beetajo'ob ti' teen ichil a dzu'uy óolalo', ti' le kiino' bíin in lukes ta cajtalil le j nonoj báilo'ob yéetel le j ca'anal icho'obo', beyo' mix bikin bíin a ca'a e'es x ca'anal ichil tin quili'ich witzil.

¹²Tene' bíin in p'at ichil a caajil máaco'ob cabal óolo'ob yéetel ma' nu'uc u yu'ubicuba'obi', leti'obe' bíin u yokes u yóolo'ob ti' in kaaba'.

¹³Le máaxo'ob ma' bíin quíimsa'aco'ob tu caajil Israele' ma' bíin u beeto'ob ba'alo'ob ma' tu beeli', mix bíin ya'alo'ob tuuso'ob, mix bíin chu'upuc u chi'ob yéetel báaxal t'aano'obi'. Bíin páatac u tzéenticuba'ob x ma' sajaquil.

¹⁴¡Kaaynen u caajil sión! ¡A'al ka'am u t'aanilo'ob qui'imac óolal, Israel! ¡Qui'imacchajac a wóol Jerusalén, qui'imacchajac a wóol tu jaajil!

¹⁵Yuumtzile' dzo'oc u lukesic le u xot kiinil a ja'adzalo', dzo'oc u xáacch'intic a aj p'eeco'ob. Yuumtzil, u ajawil Israele' ti' yaan ti' a chúumuc caaje' ma' bíin a ch'a'a mix jun p'íit sajaquili'.

¹⁶Ti' le kiino', bíin a'ala'ac ti' Jerusalén: ¡Sión ma' ch'a'ic sajaquil, ma' a cha'ic u lúubul u muuko'ob a kab!

¹⁷Yuumtzil a Kue' ti' yaan ti' a chúumuc caaje'; ¡leti'e' aj páajtalil, bíin u toquech, Yuumtzile', bíin qui'imacchjac u yóol ta wo'olal. Yéetel u yaabilaj bíin u dzáa ti' teech túumben cuxtal ichil u qui'imac óole' bíin kaaynac.

¹⁸je'el bix tu kiinilo'ob kiin kuje'. Yuumtzile' cu ya'alic: Teen túune' bíin in toquech ti' le kaas cu sajbesiquecho', bíin in toquech ti' le subtzilil yaan ta wóokolo'.

¹⁹Ti' le kiino' bíin péecnaquen, bíin in jadz le máaxo'ob yedziquecho'obo'. Bíin in wáant le j taman cu tonkalaanquilo' bey xan bíin in mol le saatalo'obo'; bíin in sutkes tziiquil tuláacal yóokolcaab, le p'a'asta'abico'obo'.

²⁰Ti' le kiino' bíin in taase'ex in much'quinte'ex bíin in kexbes a wanile'ex, bíin in beet ca úuchuc t'aan utz ta wo'olale'ex yéetel ca in dzáa ti' te'ex tziiquil ichil tuláacal u caajilo'ob u yóokolcaab. Teen Yuumtzil, teen a'alic.