Read Yucateco Hageo 2 Bible Online

Hageo 2 - Yucateco bible

Hageo 2

¹Tu veintiun kiinil ti' u siete winalil, Yuumtzile' tu ca'a t'anaj aj bóobat Hageoe',

²ca tu ya'alaj ti' ca xi'ic u ya'al ti' Zorobabel, ti' Josué bey xan ti' u yalab le caajo'.

³Le máaxo'ob j il u qui'ichquelmil le yáax kulnajo', u ya'alo'ob bix u yilico'ob le yaan to'one'ex bejela'a'. ¿Ma' wa mix ba'al a wilique'ex tu tzéel le yáaxo'?

⁴¡Ba'ale' Zorobabel yanac a wóol! ¡Josué u j noojoch le aj kiino'obo' yanac a wóol! U cajnáalile'ex tuláacal le lu'umo'oba' yanac xan a wóole'ex. Meyajnene'ex tumen tene' ti' yanen ta wéetele'exe', Teen Yuumtzil, u yuumil tuláacal páajtalil, teen a'alic.

⁵Je'el bix tin séeb chi'itajilac ti' te'ex le ca'aj jóoke'ex Egiptoe', yaan a láakinta'ale'ex tumen in pixan. Ma' a sajactale'ex.

⁶Ichil jun p'íit kiin bíin in beet u quíilbal ca'an yéetel lu'um, ka'anab yéetel dzu'uy lu'um.

⁷Bíin in beet u quiquilanquil tuláacal múuch' caajo'ob, bíin xan u taas u ayikalilo'ob, beyo' bíin chu'upuc in kulnaj yéetel nojbe'enil. Yuumtzil u yuumil tuláacal páajtalil, leti' a'alic:

⁸In ti'al le plata yéetel le oroo'.

⁹Le kulnaja' bíin asab qui'ichquelemchajac ti' le yáaxo'. Bíin túun in jedz ti' le cúuchila'. Teen Yuumtzil u yuumil tuláacal páajtalil, teen a'alic.

¹⁰Tu veinticuatro kiinil ti' u nueve winalil u méektáan Darioe', Yuumtzile' tu t'anaj aj bóobat Hageoe',

¹¹ca tu ya'alaj ti' ca u beet le káat chi'oba' ti' le aj kiino'ob tu yo'olal a'almaj t'aan:

¹²Wáa jun túul máac cu bisic bak to'an ti' jun p'éel suyeme', wa le suyem cu táakal ti' waaj, wa ti' janal, wa ti' vino, wa ti' aceite, wa ti' je'el ba'alac janalile', ¿cu p'áatal wa jun páaycuna'an le janalo'? Le aj kiino'obo' tu núucajo'ob ma' tu jun páaycunchajal.

¹³Hageo túune' tu ca'a a'alaj: Cux túun wa yaan jun túul máac ma' utz yanil tu yo'olal tu machaj jun túul quimen, cu bin u mach jun p'éel ti' le ba'alo'oba': ¿ca tucultique'ex ma' bíin p'áataco'ob ma' utz yanilo'obi'? Le aj kiino'obo' tu núucajo'ob je'el u p'áatal ma' utz yanilo'obe'.

¹⁴Hageo túune' tu ya'alaj: Bey u yúuchul yéetel le wíinico'oba': tuláacal ba'ax cu beetico'ob yéetel tuláacal ba'ax cu taasico'ob ti' tene', ma' utz yanilo'obi'.

¹⁵Líikbal ti' le kiina', tuculte'ex ma'alob lela'. Ma' a chu'unse'ex a beetique'ex le kulnajo',

¹⁶¿ba'ax ca'ach cu yúuchul ti' te'ex? Le quéen xi'ic wa máax tu yicnal veinte u múulul janalbe'en neeko'obe', cu nactáantic ca'ach chéen diezi'; le quéen xi'ic ca'ach wa máax tu'ux cu beeta'al vino u ti'al u jóokesic cincuenta u p'úulilo'obe', chéen veinte ca'ach cu jóokesiqui'.

¹⁷Tene' tin xu'ulsaj yéetel báan quíimilo'ob, bey xan tu yéetel j bat tuláacal a meyaje'exe' ba'ale' ma' a kube'ex a wóole'ex ti' teni'. Teen Yuumtzil, teen a'alic.

¹⁸Bejela'a' u kiinil veinticuatro ti' u nueve winal, dzo'oc u dzabalo'ob u chuun pakilo'ob in kulnaj.

¹⁹Ma'alob túun, ilawile'ex líikbal bejela'e', ma' bíin p'áatac mina'an le jejeláas neeko'ob te tu ch'iilo'obo'. Ca'aliquil ma' ichnac le uvao', mix le higoo, mix le granadao', mix le olivoo'; ba'ale' líikbal bejela'e', bíin in qui' t'ante'ex.

²⁰Ti'ili'e' kiino', Yuumtzile' tu ca'a t'anaj Hageo,

²¹ca tu túuchi'itaj u ya'al ti' Zorobabel, u aj méektáan u caajil Judá: Tene' bíin in beet u quíilbal ca'an paate' yéetel le lu'uma';

²²bíin in pa'a u muuk u ajawilo'ob yóokolcaab, bíin xan in pul j lu'um u péet jo'olo'ob; bíin in balkes u bolanilo'ob u ba'atelo'ob pa'ate' yéetel máaxo'ob cu bino'ob ichil, bíin quíimic u tzíiminilo'ob yéetel u aj nat' tzíiminilo'ob; tu jujun túulil bíin quíimic tu ch'aac u máascab u láaktzil.

²³Zorobabel in palitzil, ti' le kiino' bíin in canantech je'el bix in canantic u x dzipitil in x dzalabe', tumen teen tin yéeyajech. Teen Yuumtzil u yuumil tuláacal páajtalil, teen a'alic.