Read Yucateco Zacarías 1 Bible Online

Zacarías 1 - Yucateco bible

Zacarías 1

¹Tu ocho winalil, ti' u ca'a p'éel ja'abil u méektáan ajaw Darioe', Yuumtzile' tu ya'alaj le tze'eca' ti' Zacarías u paal Berequías, u yáabil Ido. Ca tu ya'alaj ti':

²Teen Yuumtzil, u yuumil tuláacal páajtalile', sen kuuxchajen tu yéetel a máanja'an ch'i'ibale'ex. Le t o'olale', t'an le caaj tin kaaba'e', ca a wa'al ti'ob: Suunene'ex ti' teen, u ti'al ca suunaquen xan ti' te'ex. Teen Yuumtzil, teen a'alic.

⁴Ma' a beetique'ex le ba'axo'ob tu beetajo'ob a máanja'an ch'i'ibale'exo'ob, ti' máaxo'ob j a'ala'ab tumen le úuchben aj bóobato'ob ca u p'ato'ob u kaakas cuxtalo'ob yéetel le kaakas ba'alo'ob cu beetico'obo', ba'ale' leti'obe' ma' tu yóoltajo'ob u ch'en xiquinteno'obi', mix tu táan óoltajeno'obi'. Teen Yuumtzil, teen a'alic.

⁵Ba'ale' bejela'e', ¿tu'ux yano'ob le a j máanja'an ch'i'ibale'exo'? ¿Ca tucultique'ex mix bikin bíin quíimic le aj bóobato'obo'?

⁶Ba'ale' tuláacal in t'aano'ob tin wa'alaj ti' in palitzilo'ob le aj bóobato'obo', j kuch tu xiquino'ob a máanja'an ch'i'ibale'exo'ob. Leti'obe' j suunajo'ob ti' teen, tu táan óoltajo'ob teen Yuumtzil u yuumil tuláacal páajtalil, tin dzaj xan ti'ob le ba'ax cu najmatico'ob bix cuxlajico'obe'.

⁷Lela' leti' le péectzil tin kamaj, teen Zacarías u paal Berequías u yáabil Ido, tin kamaj ti' Yuumtzil tu veinticatro kiinil, ti' u once winalil (le winal cu kaaba'intic Sebat) ti' u ca'a p'éel ja'abil u méektáan ajaw Darío.

⁸Jun p'éel áakabe' tin wilaj jun p'éel náay: Tin wilaj jun túul aj nat' tzíimin tu yóokol jun túul j chac tzíimin. Wa'alacbal ca'ach ti' jun p'éel táax kóom tu chúumuc jujun cúul arrayano'ob, tu paache' yaan jun múuch' tzíimino'ob, yaan chactaco'obi', yaan éek kankantaco'obi' yéetel yaan sactaco'obi'.

⁹Tene' tin káat chi'itaj: Yuumtzil, ¿máax le j nat' tzíimino'oba'? Le aj túuchi' cu t'aan tin wéetelo' tu núucaj ti' teen: Tene' bin in ca'aj in we'es ti' teech máaxo'obi'.

¹⁰Le máax túun yaan ichil le arrayano'obo' tu ya'alaj ti' teen: Lelo'oba' leti' le máaxo'ob j túuchi'ita'abo'ob tumen Yuumtzil u xíimbalto'ob le lu'uma'.

¹¹Le j nat' tzíimino'ob túuno' tu ya'alajo'ob ti' u aj túuchi' Yuumtzil le máax yaan ichil le arrayano'obo': Dzo'oc c xíimbaltic tuláacal yóokolcaab, t ilaj láaj jeedzel yanilo'ob.

¹²U aj túuchi' Yuumtzile' tu ya'alaj: Yuumtzil u yuumil tuláacal páajtalile', dzo'oc u chuquic setenta ja'abo'ob p'áataquech kuuxil ti' Jerusalén, bey xan yéetel u caajilo'ob Judá. ¿Buca'aj u láak kiino'ob bíin máanac u ti'al ca a ca'a ch'a'a' óotzilil ti' leti'ob?

¹³Yuumtzile' tu núucaj yéetel u yutzul t'aanilo'ob dzaa óolal u káat chi'ob le aj túuchi' cu t'aan tin wéetelo',

¹⁴cu dzo'ocole' le aj túuchi'o' tu ya'alaj ti' teen ca in tze'ecte: Je'el ba'ax cu ya'alic Yuumtzil u yuumil tuláacal páajtalila': Tene' in sen yaabilmaj u caajil Jerusalén bey xan u witzil Sión.

¹⁵Le t o'olal dzo'oc u t'a'abal in p'uja'anil tu yóokol le múuch' caajo'ob mix ba'al cu tucultico'obo', tumen le ca'aj kas kuuxilchajene', leti'obe' tu yaabiltajo'ob le loobilo'.

¹⁶Le t o'olale' teen Yuumtzile' quin wa'alic: Bejela'a' dzo'oc in ch'a'ic óotzilil ti' Jerusalén tu ca'a téen, bin in ca'aj in beet u yutzquinta'al kulnaj bey xan tuláacal le caajo'.

¹⁷Le aj túuchi'o' tu ya'alaj xan ti' teen: tze'ect xan lela': Yuumtzil u yuumil tuláacal páajtalile' cu ya'alic: In caajilo'obe' bin in ca'aj in beet ca ayikalchajaco'ob tu ca'a téen; bin in ca'aj in beet u ca'a ch'a'ic u yóol Sión, bey xan bíin in ca'a tze'ect in yéeymaj Jerusalén.

¹⁸Tin wilaj u láak jun p'éel náay tu'ux tin wilaj can p'éel baaco'ob.

¹⁹Tin káat chi'itaj ti' le aj túuchi' cu t'aan tin wéetel ba'ax cu chíicultic le baaco'obo', ca tu núucaj ti' teen: le can p'éel baaco'oba' cu chíicultic le máaxo'ob ki'itbesa'ano'ob ti' tuláacal cúuchilo'ob u cajnáalilo'ob Judá, Israel yéetel Jerusalén.

²⁰Cu dzo'ocole' Yuumtzile' tu beetaj in wilic can túul j meen máascabo'ob.

²¹Tene' tin káat chi'itaj: ¿Ba'ax taalaja'an u beeto'ob le j men máascabo'oba'? Leti'e' tu núucaj ti' teen: Je'el bix le baaco'ob cu chíicultic máaxo'ob ki'itbes Judá u ti'al ma' u páajtal u líikesic u pool mix máaque', le can túul j meen máascabo'oba' j taalo'ob u beeto'ob u quiquilanquilo'ob yéetel jak óolal, j taalo'ob xan u xoto'ob u baaco'ob le j múuch' caajo'ob tu kóokochajo'ob Judá, ca tu ki'itbesajo'ob u cajnáalilo'obo'.