Read Yucateco Zacarías 10 Bible Online

Zacarías 10 - Yucateco bible

Zacarías 10

¹Káate'ex ti' Yuumtzil u cháaquil yáax kiin, beyo' Yuumtzil, máax beetic u jaadz le cháaque', bíin u beet u sen káaxal ja', beyo' ti' tuláacale'ex bíin u dzáa xíiwo'ob te j káaxo'.

²U t'aan le beetbil kuobo', chéen tuus, ma' jaaj ba'ax cu paticuba'ob u yilo'ob le j meeno'obo'. Ba'ax cu ya'alico'ob cu taal u kiine' ma' u jaajil náayo'obi', u t'aanilo'ob u ti'al qui'imac óolcunsaje ma' tu béeytalo'ob. Le t o'olale' le caajo' chéen xi'ic u bin beyo'ob j tamano'ob mina'an tu'ux u je'elelo'obe', cu mukyajo'ob tumen mina'an máax canantico'ob.

³Le t o'olal cu ya'alic Yuumtzil: Dzo'oc u léequel in p'uja'anil tu yóokol le aj canan j tamano'obo', bíin in jadz máaxo'ob nu'ucbesic u cuxtal in caajal. Yuumtzil u yuumil tuláacal páajtalil, máax canantic u j tamano'ob, ti' u ch'i'ibalo'ob Judae', bíin u beet u p'áatalo'ob bey u mu'uka'an tzíiminilo'ob ba'atele'.

⁴Ti' leti'ob bíin jóokoc u tuunichil ti'itz pak, u Muk che'il Chuybil naj bey xan u P'unche'il Ba'atel. Ichilo'ob bíin jóokoc tuláacal u náacomilo'ob ba'atel.

⁵Bíin p'áataco'ob beyo'ob aj ba'atelo'ob cu pepe'echa'atico'ob u luukil u bejilo'ob caaje'; bíin ba'atelnaco'ob tumen Yuumtzile' ti' yaan tu yéetelo'obe', bíin u pajo'ob u subtal le aj nat' tzíimino'obo'.

⁶Yuumtzile' cu ya'alic: Tene' bíin in dzáa u muuk u ch'i'ibalo'ob Judá bíin in toc u ch'i'ibalo'ob José. bíin in beet u suto'ob tu lu'umo'ob, tumen in ch'a'amaj óotzilil ti'ob. Bíin ca béeyaco'ob je'el bixo'ob ca'ache', bey mix jun téen in tojolch'intmajo'obe', tumen tene' Yuumtzil u Kuob máax ch'en xiquint u payalchi'ob.

⁷Efraine' bíin p'áatac bey jun túul aj ba'atele'. Bíin sen qui'imaccahajac u yóol bey táan u yukic vinoe', le quéen ila'ac bey tumen u paalalo'obo', bíin xan qui'imacchajac u yóolo'ob. ¡Bíin qui'imacchajac u yóol tu yo'olal Yuumtzil!

⁸Teen bíin in t'aano'ob u ti'al ca in much'quinto'ob, tumen dzo'oc in toquico'ob. Bíin sen ya'abchajaco'ob tu ca'a téen je'el bix úuch ca'ache'.

⁹Teen j ki'itbeso'ob ichil múuch' caajo'ob, ba'ale' bíin ka'ajaquen ti'ob quex náach yanilo'ob, bíin kuchuc u kiinil u suuto'ob yéetel u paalalo'ob.

¹⁰Bíin in lukeso'ob Egipto u ti'al ca in suto'ob, bíin in lukeso'ob Asiria u ti'al ca in taaso'ob, bíin in biso'ob Galaad bey xan Líbano, bey tumen sen ya'abo'obo', ma' bíin yanac cúuchil u yantalo'obi'.

¹¹Bíin u ch'acto'ob u ka'anabil Egipto le quéen in jadz u ja'ilo'obe'. Bíin in tiquincunt Nilo tac tu taamil, bíin in xu'uls u x ca'anal ichil Asiria, bíin xan in mix ba'alcunt u mu'uka'anil Egipto.

¹²Tene' bíin in mu'uka'ancunto'ob, bíin xi'ico'ob táanil tin kaaba' Teen Yuumtzil, teen a'alic.