Read Yucateco Zacarías 11 Bible Online

Zacarías 11 - Yucateco bible

Zacarías 11

¹¡Líbano Je'ekabt u jool a bejil u ti'al ca tóoca'ac a kuulche'ilo'ob tumen káak!

²¡Pino, okolnen tumen j lúub le kuulche'o', tumen le qui'ichquelem che'obo' dzo'oc u kascunta'alo'ob! ¡U béequile'ex Basán áacamnene'ex, tumen le káax piim u che'ilo'obo' dzo'oc u lúubsa'alo'ob!

³Táan u yawat okol le aj canan j tamano'obo', tumen u jadzutzil u yo'och xíiw le ba'alche'obo' dzo'oc u kascunta'al. Cu yu'uba'al u jéemcal león, tumen dzo'oc u kascunta'al u piimil u káaxilo'ob Jordán.

⁴Je'el ba'ax tu ya'alaj ti' teen Yuumtzil in Kua': Canant le j tamano'ob jóokesa'ano'ob u ti'al bisbil quiimsbilo'obo'.

⁵Le j maan j tamano'obo' ma' tu yu'ubicuba'ob sipa'ano'ob iquil u quíimsico'ob, cu dzo'ocole' le máaxo'ob conico' cu ya'alico'ob: ¡Nib óolal ti' Yuumtzil tumen dzo'oc in ayikaltal! Ma' tu ch'a'abal óotzilil ti'ob mix tumen u aj canan j tamano'ob.

⁶Bey xan bíin in beet teno', ma' bíin in ch'a'a óotzilil ti' le máaco'ob cajnáalo'ob ti' le lu'umo'oba', bin in ca'aj in kub tu jujun túulil tu kaab u yéet wíiniquil yéetel tu kab ajaw. Leti'ob bíin kascuntic le lu'umo'oba', mix máac bíin in toc ti' u kabo'ob. Teen Yuumtzil, teen a'alic.

⁷Teen túune' jo'op' in canantic le j tamano'ob jóokesa'ano'ob u ti'al quíimsbilo'obo'. Tin éejemtaj in beet ic tu kaaba' le j maan coonolo'obo'. Tin caxtaj túun ca'a p'éel xóolte'ob: jun p'éele' tin dzaj u kaaba'int Utz yanil, u láake' Mooquil.

⁸Chéen ichil jun p'éel winale' tin tojolch'intaj óox túul aj canan j tamano'ob dzo'oc u sen náacsico'ob in wóol yéetel dzo'oc u pektiqueno'ob.

⁹Ti' le j tamano'obo' tin wa'alaj: ¡Ma' bíin suunaquen in canante'exi'! ¡Wa yaan u quíimil wa máax ti' te'exe', quíimic! ¡Wa yaan u quíimsa'ale', quíimsa'ac! ¡Le bíin p'áataco'ob xano' u jaantuba'ob tu baatzilo'ob!

¹⁰Tin ch'a'aj túun in xóolte' cu kaaba'intic Utz yanile', ca tin cachaj u ti'al u chíiculal dzo'oc u p'áatal manba'alchaja'an le nup t'aan tu beetaj Ku tu yéetel tuláacal le múuch' caajo'oba'.

¹¹Ti' le kiino', j p'áat manba'alchaja'an le nup t'aano', le j man con j tamano'ob, tu na'atajo'ob Yuumtzil cu t'aan tu yéetel le ba'axo'ob quin beetico'.

¹²Tin wa'alaj túun ti'ob: Wa ca tucultique'ex ma'alob ca a bo'ote'ex in meyaje', bo'ote'ex, wa ca tucultique'ex ma'e' p'ate'ex túun beyo'. Tu bo'otajo'ob teen treinta u taakinilo'ob plata u ca'ajo'ob,

¹³Yuumtzile' tu ya'alaj ti' teen: Ch'a'a le taakino'ob u nojoch tojol le bo'ol dzo'oc u dzáico'ob teno', ca a dzáa ichil u taakinil le kulnajo'.

¹⁴Cu dzo'ocole' tin cachaj xan le xóolte' cu kaaba'intic Mooquilo', ca p'áat pa'achaja'an u láaktzilil Judá yéetel Israel.

¹⁵Yuumtzile' tu ya'alaj ti' teen: Bejela'e', beet je'el bix u beetic jun túul aj canan j taman cu bisic chéen báaxalil u meyaje'.

¹⁶Tumen bin in ca'aj in dzáa tu yóokol le lu'uma' jun túul aj canan j taman, ma' bíin u dzáa u yóol tu yo'olal le j taman j kéech u beelo', mix bíin xi'ic u caxant le saatalo', mix bíin u dzac le ucha'an loob ti'o', mix bíin u tzéent le luba'an u muuko', ba'ale' bíin u jaant u bakel le asab poloctaco'obo', ma' bíin u p'at mix u maayo'obi'.

¹⁷¡Yaj yanil le aj canan taman mix ba'al u biilal cu xúunp'attic u múuch'ul le j tamano'obo'! ¡Lúubuc le máascab tu yóokol u muuk u kab yéetel tu x no'oj ich! ¡Jach tijic u muuk u kab yéetel jach ch'óopchajac u yich!