Read Yucateco Zacarías 12 Bible Online

Zacarías 12 - Yucateco bible

Zacarías 12

¹Lela' leti' u péectzil Yuumtzil tu yo'olal Israel. Yuumtzil le máax jaymail le ca'an bey xan u dzaamaj u chuuno'ob le lu'um yéetel u dzaamaj cuxtal ti' wíinique' cu ya'alic:

²Tene' bíin in sutkes Jerusalén jun p'éel u nu'ucul u yu'ukul vino u ti'al ca u láaj cáalcunt le múuch' caajo'ob yano'ob tu tzéele'. Le quéen u bakpachto'ob Jerusalene', bíin ba'atelta'ac xan u láak u caajilo'ob Judá.

³Ti' le kiino' bíin in sutkes Jerusalén bey jun p'éel tuunich sen a'al u ti'al tuláacal le múuch' caajo'obo'. Bíin u loobilt je'el máax ca u dzajubáa u ch'úuye'. Tuláacal múuch' caajo'ob bíin u much'uba'ob tu yóokol Jerusalén,

⁴ba'ale' teen túune' bíin in ja'akes u yóol tuláacal le tzíimino'obo' bíin xan in p'at ma' tu yóolo'ob yano'ob u j nat' tzíiminilo'obi'. Bíin in canant u ch'i'ibalo'ob Judá, bíin xan in p'at láaj ch'óopo'ob u tzíimino'ob le múuch' caajo'obo'.

⁵Le quéen ila'ac bey tumen u nuuquilo'ob Judao', bíin u ya'alo'ob tu baatzilo'ob: Yuumtzil u yuumil tuláacal páajtalile', leti' u Ku máaxo'ob cajnáalo'ob Jerusalén leti' xan dzáic muuk ti'ob.

⁶Ti' le kiino' bíin in beet u p'áatal u nuuquilo'ob Judae' bey jun p'éel niquib chúuc t'aba'an ichil si'e', bey jun p'éel káak ichil u chúuchuch kaxabil i'ijo'obe'. Bíin tóoca'ac x no'ojil yéetel x dzíiquil tuláacal le múuch' caajo'ob yano'ob naadze', ba'ale' u cajnáalilo'ob Jerusalene', bíin cajlaco'ob te j caaj tu ca'a téeno'.

⁷Ba'ale' yáax táanile', teen Yuumtzile', bíin in toc u yotochnáalilo'ob Judá, tu yo'olal ma' u yu'ubicubáa noj ba'alil David yéetel u cajnáalilo'ob Jerusalén tu yóokol u chuucáan u ch'i'ibalo'ob Judá.

⁸Teen Yuumtzil bíin in canant le máaxo'ob cajnáalo'ob Jerusalene'. U asab j ma' óolilo'obe' bíin mu'uka'anchajaco'ob je'el bix ajaw Davide', u ch'i'ibalo'ob Davide' bíin p'áataco'ob bey Kue', bey je'el bix u ángel Yuumtzil cu bin táanil ti'obe'.

⁹Ti' le kiino' bíin in xu'uls je'el ba'alac caajil bíin u puljubáa u ba'atelt Jerusalene'.

¹⁰U ch'i'ibalo'ob David yéetel Jerusalene', bíin in beet u yantal u yóolo'ob u ti'al u beeto'ob utz bey xan u ti'al u payalchi'ob. Bíin túun ila'ac le máax j píitmáansa'ab u loomilo', bíin búuquinta'ac u nookil okom óolal tu yo'olal, bey xan bíin okolta'ac je'el bix u yokolta'al u quíimil le paal mina'an u láake', wa je'el bix u yokolta'al le yáax paalo'.

¹¹Bíin beeta'ac tu caajil Jerusalén jun p'éel nojoch okom óolal je'el bix le cu beeta'al tu yo'olal le ku Hadad-rimón tu táax kóom u witzil Meguidoe'.

¹²Tu jujun túulil le otochnáalo'ob bíin u beeto'ob okom óolal tu baatzilo'ob ti' tuláacal le lu'umo': U ch'i'ibalo'ob David yéetel u yatano'ob: u ch'i'ibalo'ob Natán yéetel u yatano'ob;

¹³u ch'i'ibalo'ob Leví yéetel u yatano'ob, bey xan u ch'i'ibalo'ob Semei yéetel u yatano'ob;

¹⁴bey xan bíin u beet tu baatzilo'ob tuláacal u láak ch'i'ibalo'ob tu yéetel u yatano'ob.