Read Yucateco Zacarías 13 Bible Online

Zacarías 13 - Yucateco bible

Zacarías 13

¹Ti' le kiino' bíin je'epajac jun p'éel sayab, u ti'al u p'o'ic u kebano'ob yéetel u ma' utz yanilo'ob u ch'i'ibalo'ob David yéetel u cajnáalilo'ob Jerusalén.

²Ti' tuláacal le múuch' caaja' bíin in beet u tu'ubsa'al tac u kaaba'ob le beetbil kuobo', tu yo'olal u jáawal u yúuchul payalchi' ti' leti'ob. Bíin xan in lukes ti' le lu'uma' tuláacal aj bóobat yéetel tuláacal pixano'ob ma' utz yanilo'obi'. Teen Yuumtzil, teen dzáic u t'aanil.

³Bey túuno' le quéen yanac wa máax u yóolt bóobate', u taata yéetel u maama bíin a'alic ti': ¡Teche' bíin quíimiquech tumen a káat a beet u yu'uba'al a tuus je'el bix u yu'uba'al u péectzil Yuumtzile'! ¡U taata yéetel u maama bíin quíimsic yéetel loom le quéen u beetjubáa bey aj bóobate'!

⁴Ti' le kiino'obo' le aj bóobato'obo' bíin u ch'a'ob subtal ti' u náayo'ob le quéen tze'ecnaco'ob. Mix máac bíin tuusnac tumen cu búucbesicubáa yéetel u búuc aj bóobato'ob kéewel u ca'ajo'ob,

⁵tumen tu jujun túulilo'ob bíin u ya'alo'ob: Tene' ma' aj bóobateni', tene' j colnáalen. Líikbal tin chichanil quin meyaj káax.

⁶Ba'ale' wa cu káat chi'ita'al ti' tumen wa máax: ¿Ba'ax loobilo'ob le yaan ta wíinclilo'? leti'e' bíin u núucte: Lelo' j beeta'abo'ob ti' teen tu yotoch in wéet bisajba'ob.

⁷Yuumtzil u yuumil tuláacal páajtalile' cu ya'alic: ¡Máascab, líiken tu yóokol in aj canan j taman yéetel tu yóokol le máax áantiqueno'! ¡Quiims le aj canan j tamano' ca ki'itpajac le j tamano'obo', ca xi'iquen tu yóokol le mejen j tamano'obo'!

⁸Bíin quíimic ca'a jaatz ti' u yóox jaatzil le máaxo'ob cajnáalo'ob ti' le lu'uma': chéen jun jaatz ti' óox jaatz bíin p'áataqui'. Cu dzo'ocole' ti' le jaatz bíin p'áataco' bíin in beet u máan ichil káak; bíin in máayt je'el bix u máayta'al le plata yéetel le oro. Leti'ob túune' bíin payalchi'inaco'ob ti' teen, tene' bíin in núuc u payalchi'ob. Bíin in dzáa u kaaba'into'ob in Caajal, leti'obe' bíin u núuco'ob: Yuumtzile' leti' c Ku. Teen Yuumtzil, teen dzáic u t'aanil.