Read Yucateco Zacarías 14 Bible Online

Zacarías 14 - Yucateco bible

Zacarías 14

¹Táan u kuchul u kiinil u taal Yuumtzil, tu kiinil u t'o'oxol tu chúumuc a caajil le ba'axo'ob ocolta'ano'ob ti' techo' Jerusalén.

²Ti' le kiino' Yuumtzile' bíin u láaj much'quint le múuch' caajo'ob u ti'al u ba'atelto'ob Jerusaleno'. Bíin u ch'a'ob le caajo', bíin u láaj ocolto'ob ba'axo'ob yaan ichil u najilo'ob, bíin u beeto'ob óolaj ti' u co'olelilo'ob yéetel bíin u macho'ob táancoch u cajnáalilo'ob u ti'al u biso'ob u kalo'ob.

³Ba'ale' cu dzo'ocol lelo' Yuumtzile' bíin jóokoc j ba'atel tu yéetel le múuch' caajo'ob je'el bix u jóokol tu kiinil ba'atele'.

⁴Ti' le kiino', Yuumtzile' bíin u jedz u yooc tu yóokol u pu'uquil Olivo'ob, yaan actáan ti' Jerusalén tu lakino'. Jun p'éel nojoch táax kóom cu bin líikbal j lakin tac j chikine', leti' bíin jóokesic ca'a jaatz ti' u pu'uquil Olivo'ob. Táancoch ti' le pu'uc bíin xi'ic j xamano', yéetel táancoch bíin xi'ic j noojol,

⁵te'exe' bíin púudzuque'ex ti' le táax kóom bíin p'áatac chúumuc ti' le pu'uco', le cu kuchul tac Azal, tu táanxel tzéelilo'. Bíin púudzuque'ex je'el bix úuchic u púudzulo'ob a máanja'an ch'i'ibale'ex le ca'a yanchaj le quíilbal lu'um tu kiinilo'ob u méektáanil ajaw Uzías tu lu'umil Judao'. Bíin túun talac Yuumtzil in Ku láakinta'an tumen tuláacal u aj ocsaj óolo'ob.

⁶Ti' le kiino' ma' bíin yanac que'elil, mix síisil.

⁷Chéen jun p'éel kiin bíin úuchuc beyo', chéen Ku ojéeltmail. Ti' le kiino', ma' bíin ojéelta'ac wa yéetel kiin wa yéetel áakab, ti' u kiinili', tumen tac yéetel áakabe' bíin yanac sáasil.

⁸Bíin jóokoc túun síisis ja'ob Jerusalén, u ti'al áalcab tu kiinilo'ob que'el yéetel tu kiinilo'ob yáax kiin, táanchumuc ti'e' bíin xi'ic Quimen ka'anabi', yéetel táanchumuque' bíin xi'ic Mediteraaneo.

⁹Ti' le kiino' bíin ajawnac Yuumtzil ti' tuláacal u yóokolcaab. Yuumtzile' bíin p'áatac chéen leti', chéen xan u kaaba' bíin p'áatac.

¹⁰Tuláacal le múuch' caajo'oba' bíin suunaco'ob jun p'éel táax kóomilo', líikbal Geba tac Rimón, tu noojol Jerusalén. Jerusalene' bíin dza'abac noj caajil, bíin yanac u cajnáalilo'ob tu cúuchil, líikbal tu jool caajil cu kaaba'intic Benajamín tac ti' le joolcaaj cu kaaba'intic Ángulo (tu'ux yaan ca'ach le Úchben Jool caajo') bey xan líikbal tu witzil najil Hananeel tac tu cúuchil tu'ux cu ye'edzel aceite u ti'al ajaw.

¹¹Jerusalene' bíin yanac u cajnáalilo'ob tu ca'a téen, ma' bíin xu'ulsa'ac tu ca'a téeni'. U cajnáalilo'obe', bíin cajlaco'ob x ma' sajaquil.

¹²Ba'ale' ti' le múuch' caajo'ob tu ba'ateltajo'ob Jerusalene', bíin chichich ja'adzaco'ob tumen Yuumtzil: bíin tu'uchajac u bakelo'ob ca'aliquil cuxa'ano'ob, bíin tu'uchajac u yicho'ob tu kóomilo'ob yéetel bíin tu'uchajac u yaako'ob tu chi'ob.

¹³Bíin chu'upuco'ob tu yéetel sajaquil tu kiinil u taal Yuumtzil. Tu jujun túulilo'ob bíin u macho'ob u yéet wíiniquil u ti'al u ba'atelo'ob tu baatzilo'ob.

¹⁴Judá túune' bíin ba'atelnac xan tu caajil Jerusalén, bíin u toco'ob ya'abcach u ayikalilo'ob plata, oro yéetel nooko'ob ti' le caajo'ob caja'ano'ob naadz ti'obo'.

¹⁵Le jaadz bíin lúubuc tu yóokol le máaco'obo' leti' xan bíin lúubuc tu yóokol u tziimino'ob u mulaob, u camello'ob yéetel tuláacal u yalak ba'alche'ob le aj p'eec yaan ichil u cúuchil tu'ux cu je'elelo'obo'.

¹⁶Cu dzo'ocole', le máaxo'ob bíin u jecho'ob le quíimil ti' le caajo'ob j ba'atelt Jerusaleno', bíin xi'ico'ob tuláacal ja'ab u kulto'ob Ajaw, Yuumtzil u yuumil tuláacal páajtalil u ti'al xan u kiinbesico'ob u qui'imac óolalil Máacano'ob.

¹⁷Wa cu yantal jun p'éel ti' le múuch' caajo'ob yaan tu yóokolcaab ma' tu bin Jerusalén u kult Ajaw, Yuumtzil u yuumil tuláacal páajtalile', ma' bíin káaxac ja' tu lu'umili'.

¹⁸Wa le j egipciob ma' tu bino'obo', bíin ja'adzaco'ob tumen Yuumtzil je'el bix je'el ba'alac múuch' caajil ma' tu bin u kiinbes u qui'imac óolil Máacano'obe'.

¹⁹Lelo' leti' le jaadz bíin dza'abac ti' Egipto wa ti' je'el ba'alac múuch' caajil ma' tu bin u kiinbes u qui'imac óolalil Máacano'obe'.

²⁰Ti' le kiino' tac u mejen campanail le tzíimino'ob bíin yanac u dzíibil cu ya'alic: Jun páaycunta'ano'ob u ti'al Yuumtzil. U nucuch cuumilo'ob le kulnajo', bíin p'áatac jun páaycunta'ano'ob u ti'al Yuumtzil je'el bix le laco'ob yaan tu táan u multuunil le kultajo'.

²¹Tuláacal u nucuch cuumilo'ob Jerusalén yéetel Judae', bíin p'áatac jun páaycunta'ano'ob u ti'al Yuumtzil u yuumil tuláacal páajtalil. Le máaxo'ob bíin xi'ico'ob u kubo'ob quíimsbil ba'alche'obe', bíin meyajnac ti'ob u ti'al u chaquico'ob u bakel le ba'alche'ob cu kubico'obo'. Ti' le kiino' ma' bíin yanac ya'ab aj coonolo'ob tu kulnaj Yuumtzil u yuumil tuláacal páajtalil.