Read Yucateco Zacarías 2 Bible Online

Zacarías 2 - Yucateco bible

Zacarías 2

¹Yanchaj ti' teen u láak náay. Chíicpaj ti' teen jun túul máac u maachmaj u káanil p'iis.

²Tin káat chi'itaj ti': ¿Tu'ux ca bin? Leti'e' tu núucaj ti' teen: Bin in ca'aj in p'is u caajil Jerusalén u ti'al ca in wojéelt buca'aj u chowaquil yéetel buca'aj u cóochil.

³Teen túune' tin wilaj táan u bin le ángel cu t'aan ca'ach tin wéetele', ca jóok u láak jun túul ángel nuptáantic

⁴táan ca'ach u ya'alic ti': Xeen áalcabil a wa'al ti' le j xi'ipal máax bisic u káanil le p'iiso': Jerusalene' yaan u ca'a yantal u cajnáalilo'ob, cu dzo'ocole' yaan u sen ya'abtal u cajnáalilo'ob bey xan u wacaxo'ob, tu yo'olal beyo' ma' bíin páatac u dza'abal u tuulumilo'obi'.

⁵Ba'ale' Yuumtzile' cu ya'alic: Teen bíin in beet u tuulumil yéetel u káakil u bakpach Jerusalén, cu dzo'ocole' bíin in we'es in nojbe'enil tu chúumuc u caajil.

⁶Yuumtzile' cu ya'alic: Tene' tin beetaj a ki'itbesa'ale'ex ti' táatanxel cúuchilo'ob. Ba'ale' bejela'e' quin wa'alic ti' te'ex: ¡Séeba'an púudzuque'ex ti' u lu'umilo'ob le j xamano'! ¡Púudzuque'ex ti' Babilonia, le tu'ux bisa'abe'ex cajtal le ca'a ki'itbesabe'ex le kiin tojolch'inta'abe'ex Siono'! Teen Yuumtzil, teen a'alic

⁸Yuumtzil u yuumil tuláacal páajtalile', dzo'oc u túuxtiquen yéetel u péectzil tu yóokol le múuch' caajo'ob ocoltmaile'exo': Je'el máax ca u dzáa u kab tu yóokol in caajale', ti' u neek in wich cu beetic loob. Le t o'olal teen tin kabil bíin in ba'atel le múuch' caajo'obo', u ti'al ca in beet u yocolta'alo'ob tumen u palitzilo'ob. Beyo' bíin u ye'es u nojbe'enil Yuumtzil u yuumil tuláacal páajtalil, beyo' bíin a táan óolte'ex leti' j túuchi'iten.

¹⁰Yuumtzile' cu ya'alic: ¡Kaaynene'ex tu yéetel qui'imac óolal u cajnáalile'ex Jerusalén, tumen tene' táan in taal cajtal ichile'ex!

¹¹Le quéen úuchuc lelo', ya'abcach múuch' caajo'ob bíin u nupuba'ob tu yéetel Yuumtzil. Leti'e' bíin u ya'al: Bíin in caajalt xan le múuch' caajo'oba'. Teen túune' bíin cajlaquen ichile'ex. Beyo' bíin a táan óolte'ex, Yuumtzil u yuumil tuláacal páajtalil túuchi'iten.

¹²Yuumtzile' bíin u ca'a ch'a'a' Judá bey jun p'éel ba'al chéen u ti'al te j quili'ich lu'umo', bíin u ca'a a'al u caajil Jerusaléne' u yéeymaj.

¹³¡U mac u chi' yóokolcaab tu táan Yuumtzil, tumen leti'e' táan u taal ichilo'on líikbal tu quili'ich cúuchil tu'ux cajacbal!