Read Yucateco Zacarías 3 Bible Online

Zacarías 3 - Yucateco bible

Zacarías 3

¹Cu dzo'ocole' Yuumtzile' tu ye'esaj ti' teen jun p'éel náay, tin wilaj wa'alacbal Josué, u noojoch aj kiino'ob tu táan u ángel Yuumtzil. Tu x no'oj Josuee', ti' ca'ach yaan le ángel aj tacpoolo', táan u dzáicubáa u tac u pool.

²U ángel Yuumtzil túune', tu ya'alaj ti' le ángel aj tacpoolo': ¡Ca u keyech Yuumtzil! ¡Yuumtzil máax yaabiltmajil Jerusalene' bíin u keyech! Tumen le j xiiba' bey jun p'éel t'aba'an chúuc jóokesa'an ichil náajche'obe'.

³Josuee' u dzaamaj ca'ach nooko'ob jach éektaco'ob, ma' tu péec ca'ach tu táan u ángel Yuumtzil.

⁴Le ángel túuno' tu ya'alaj ti' máaxo'ob áantic ca u pito'ob tu yóokol josué le nooko'ob éektaco'obo'. Cu dzo'ocole' tu ya'alaj ti': Il a wile, lela' u káat u ya'ale' dzo'oc in lukesic a kebano'ob. ¡Bejela'e', bin in ca'aj in beet u dza'abal a búuquint u nookilo'ob u kiinbesajil qui'imac óolal!

⁵Tu séeblaquile' tu ya'alaj ti' máaxo'ob áantic ca u dza'ob jun p'éel sac j pix jo'ol tu yóokol u pool. Leti'obe' tu dzajo'ob tu pool. Cu dzo'ocole' u búucbes u nookilo'ob kiinbesajil. Ca'aliquil le ángelo' p'aatal ca'ach wa'alacbal.

⁶Cu dzo'ocole' u ángel Yuumtzile' tu ya'alaj ti' Josué:

⁷Lela' leti' ba'ax cu ya'alic Yuumtzil u yuumil tuláacal páajtalila': Xíimbalnen ti' in beelo'ob, beet tuláacal ba'axo'ob dzo'oc in túuchi'itic ti' teech ca a beete. Wa ca beetic beyo' teech bíin p'áataquech a canant in kulnaj. Bíin a canant pa'ate' yéetel u sujuy lu'umilo'ob, beyo' tene' bíin in dzáa ti' teech jun p'éel cúuchil ichil le ángelo'oba' máaxo'ob meyajtiquen.

⁸Josué, teech u noojoch le aj kiino'obo', ch'en xiquinteni', u ch'en xiquinteno'ob xan a wéet aj kiinilo'obo' le cu much'icuba'ob ta wéetelo', tumen tuláacale'exe', beye'ex jun p'éel u chíicul bóobatile': Bin in ca'aj in taas in palitzil, le Túumben Ku'uko'.

⁹Tene' dzo'oc in dzáic tu táan Josué jun p'éel tuunich siete u tzéelilo'ob, teen tin kabil bíin in dzíibt tu yóokol jun p'éel dzíib. Cu dzo'ocole' chéen jun p'éel kiin quéen in lukes u keban le lu'umo'oba'.

¹⁰Le quéen kuchuc le kiino', je'el u páajtal a paclan t'anicabaex u ti'al a qui'imacuntique'ex a wóole'ex tu yéetel jéedzel, tu yáanal a pakal uvaex yéetel a pakal higoexe'. Teen Yuumtzil u yuumil tuláacal páajtalil, teen a'alic.