Read Yucateco Zacarías 5 Bible Online

Zacarías 5 - Yucateco bible

Zacarías 5

¹Yanchaj ti' teen u láak náay. Tin wilaj táan u bin tu yóol iike' jun p'éel u coodzil dzíibil ju'un.

²Le ángelo' tu káat chi'itaj ti' teen: ¿Ba'ax ca wilic? Tene' tin núucaj ti': Táan in wilic jun p'éel u coodzil dzíibil ju'un cu bin tu yóol iik; nueve métros u chowaquil yéetel can p'éel ca tac táancoch u cóochil.

³Tu ya'alaj túun ti' teen: Te'elo' ti' dzíibta'an le loolob t'aan cu najmatic tuláacal múuch' caajo'oba'. Je'el bix dzíibta'anil tu ca'a tzéele', mix máac bíin u jech le jaadz ichil le cu yoocolo'ob wa ca tus jalach t'aanac.

⁴Yuumtzil u yuumil tuláacal páajtalile', cu ya'alic: Tene' quin túuchi'itic le loolob t'aana' u ti'al le máax cu yocol ich naj j oocol wa cu tuuz jalach t'aan tin kaaba'. Le loolob t'aana' bíin p'áataqui' tac quéen p'áatac x ma' jo'olnaj che'ob mix tuunicho'ob.

⁵Cu dzo'ocole' jóok le ángel cu t'aan ca'ach tin wéetele' ca tu ya'alaj ti' teen: ¡Il a wil le ba'ax cu bin j chíicpajal ti' le súutuca'!

⁶Tin káat chi'itaj ti': ¿Ba'ax lelo'? Leti'e' tu núucaj ti' teen: Jun p'éel x p'isib. U x p'isibil u keban le máaxo'ob cajnáalo'ob ti' le múuch' caajo'oba'.

⁷Le x p'isibo' nup'a'an ca'ach tumen jun p'éel maac plomo u ca'aj. Ca líiksa'ab le maaco', ti' ca'ach culucbal jun túul x co'olel ichil le p'iiso'.

⁸Le ángelo' tu ya'alaj ti' teen: Le co'olelo', leti' le kasa'anilo'. Ca tu léench'intaj ichil le x p'isibo', ca tu kalaj yéetel le maac plomo u ca'ajo'.

⁹Paacatnajen tu ca'a téene' ca tin wilaj u chíicpajal ca'a túul co'olelo'ob. Yaan ca'ach u xiiko'ob le iiko' leti' na'acsico'ob ca'anal ca'achi. U xiiko'obe' bey xiiko'ob cigüeñae', cu dzo'ocole' táan u bisico'ob le x p'isib tu yóol iiko'.

¹⁰Tin káat chi'itaj túun ti' le ángelo' cu t'aan ca'ach tin wéetelo': ¿Tu'ux cu bisa'al le x p'isibo'?

¹¹Leti'e' tu núucaj ti' teen: Bin u ca'aj beetbil jun p'éel kulnaj ti' tu lu'umil Babilonia. Le quéen dzo'ococ u beeta'al le kulnajo' bíin dza'abac tu yóokol jun p'éel x lat' ooc.