Read Yucateco Zacarías 6 Bible Online

Zacarías 6 - Yucateco bible

Zacarías 6

¹Yanchaj ti' teen u láak náay. Tin wilaj u chíicpajal can p'éel u bolanilo'ob ba'atel tu chúumuc ca'a p'éel pu'uco'ob bronce u ca'ajo'ob.

²Le yáax bolano' cu jíilta'al ca'ach tumen j chac tzíimino'ob; u ca'a p'éele' tumen j box tzíimino'ob;

³u yóox p'éele' tumen j sac tzíimino'ob; u can p'éele' cu jíilta'al tumen chúuquim tzíimino'ob.

⁴Tin káat chi'itaj ti' le ángel cu t'aan tin wéetelo': In dzuulil, ¿ba'ax u káat u ya'al le ba'ala'?

⁵Le aj túuchi'o' tu núucaj ti' teen: Lela' leti' le can p'éel iiko'ob cu jóokolo'ob tu táan Yuumtzil u yuumil tuláacal yóokolcaabo'.

⁶Le bolan cu jíilta'al tumen j box tzíimino'obo', le cu bino'ob tu lu'umil j xaman; le cu jíilta'al tumen j sac tzíimino'obo', cu bin tu lu'umil j chikin; le xan cu jíilta'al tumen chúuquim tzíimino'obo' cu bin tu lu'umil j noojol.

⁷Le ca jóok le j chúuquim tzíimino'obo' táan u yaayamtico'ob u yáalcabtico'ob tuláacal le lu'umo'. Le ángelo' tu ya'alaj ti'ob: Láaj áalcabte'ex le lu'uma'. Leti'obe' tu beetajo'ob beyo'.

⁸Cu dzo'ocol lelo' le ángelo' tu yaawtaj a'alaj ti' teen: ¡Il a wile, le j bino'ob tu lu'umil j xamano', táan u bino'ob u jóomquinto'ob u yóol Yuumtzil ti' u p'uja'anil te j múuch' caajo'obo'!

⁹Yuumtzile' tu dzaj ti' teen le péectzila':

¹⁰Mol jun p'éel áantaj ichil le máaco'ob dzo'oc u suuto'ob ti' u ki'itbesajil Babiloniao': Heldai, Tobías yéetel Jedaías. Cu dzo'ocole' láili' ti' le kiino', xeen tu yotoch Josías u paal Sofonías.

¹¹Beet péet jo'olo'ob tu yéetel le plata tu yéetel xan le oro ta molajo', ca u dzáa jun p'éel tu pool Josué u aj noojoch aj kiino'ob u paal Josadac.

¹²A'al ti': Yuumtzil u yuumil tuláacal páajtalile', cu ya'alic bíin utzquinta'ac u kulnaj Yuumtzil tumen le j xiib cu kaaba'intic ku'uk cu xíitil ti' u mootzo'obo'.

¹³J bíin yutzquint u kulnaj Yuumtzil, bey xan bíin u kam nojbe'enilo'ob je'el bix u kamic jun túul ajawe'. Bíin culac tu jalach káanche' u ti'al u beet u méektáanil, cu dzo'ocole' tu tzéel u jalach káanche' bíin culac aj kiin, bíin yanac jéedzel ichil tu ca'a túulalo'ob.

¹⁴Le péet jo'olo'obo' bíin p'áataco'ob tu kulnaj Yuumtzil u ti'al u ka'ajsa'al u kaaba' Heldai, Tobías Jedaías yéetel Josías u paal Sofonías.

¹⁵Bíin talac máaco'ob ti' náanach cúuchilo'ob u ti'al áantaj u beeto'ob u kulnaj Yuumtzil, beyo' bíin túun a kaj óolte'ex Yuumtzil u yuumil tuláacal páajtalil túuxten. Lela' bíin úuchuc le kiin bíin a ch'en xiquinte'ex ba'ax cu ya'alic Yuumtzil u ti'al ca a wu'uyaj t'ante'exe'.