Read Yucateco Zacarías 7 Bible Online

Zacarías 7 - Yucateco bible

Zacarías 7

¹Tu can p'éel u kiin ti' u nueve winalil (cu kaaba'intic Quisleu) ti' u can p'éel u ja'abil u méektáan ajaw Darioe', Yuumtzile' tu ya'alaj le péectzil ti' aj bóobat Zacarías.

²Ti' le kiino', u caajil Betele', dzo'oc ca'ach u túuxtic Sarezer yéetel Regem-melec, láakinta'ano'ob tumen u aj ba'atelo'obe', u ti'al u káatico'ob u yáataj Yuumtzil

³yéetel u ti'al u káat chi'ito'ob ti' aj bóobato'ob yéetel ti' u aj kiinilo'ob u kulnaj Yuumtzil u yuumil tuláacal páajtalil: ¿Kabéet wa c búuquintic u nookil okom óolal yéetel c su'ukin tu cinco winal tu jujun p'éelil ja'ab je'el bix suuc c beetic tac bejela'e'?

⁴Yuumtzil u yuumil tuláacal páajtalil túune' tu t'anajene', ca tu ya'alaj ti' teen:

⁵A'al ti' tuláacal u cajnáalilo'ob le lu'umo'ob yéetel ti' le aj kiino'obo': Te'exe' dzo'oc setenta ja'abo'ob jo'op'oc a su'ukine'ex yéetel a búuquintique'ex u nookil okom óolal ti' u cinco yéetel u siete winalil. Ba'ale' ma' u ti'al a tziquiquene'ex ca beetique'exi',

⁶Tumen le quéen janaque'ex yéetel le quéen ukulnaque'exe', ca beetique'ex u ti'al a na'ajtale'ex.

⁷¿Ma' wa láili' leti' le t'aano'ob tu ya'alaj Yuumtzil tu chi' le úuchben aj bóobato'ob, tu kiinilo'ob jejedzquil Jerusalén chuup tu yéetel u cajnáalilo'ob, bey xan u yanil le caajo'ob yaan tu bakpach, bey yanilo'ob xan Néguev yéetel le táax kóom lu'umo'?

⁸Yuumtzile' tu t'anaj aj bóobat Zacaríase' ca tu ya'alaj ti':

⁹Lela' leti' ba'ax quin wa'alica': Tuuculnene'ex tu beel, yanac xan ti' te'ex utzil óolal yéetel ch'a'a óotzilil ta baatzile'ex.

¹⁰Ma' a yedzique'ex le x quimen íichamo'obo', mix le j ma' taataobo', mix le táanxel lu'umilo'obo', mix le óotzilo'obo'. Ma' a tucultique'ex bix je'el a beetique'ex loob ta baatzile'exe'.

¹¹Ba'ale' le caajo' ma' tu yóoltajo'ob u yu'ubo'ob t'aani'. Tuláacalo'ob tu sutajo'ob u paacho'ob yéetel tu beetajo'ob u cóoquilo'ob.

¹²Tu dzu'uyquintajo'ob u pucsi'ikalo'ob, bey dzu'uyil tooke', u ti'al ma' u yu'ubico'ob ba'axo'ob cu ya'alic Yuumtzil u yuumil tuláacal páajtalil le tu ya'alaj yéetel u pixane', bey xan tu chi' le úuchben aj bóobato'obo'. Le t o'olal Yuumtzile' sen kuuxchaji,

¹³ca tu ya'alaj: Je'el bix leti'ob ma' tu yóoltajo'ob u ch'en xiquinteno'ob le ca tin t'anajo'ob ca'ache', mix teen bíin in ch'en xiquinto'ob le quéen payalchi'inaco'ob ti' teen.

¹⁴Let o'olal tin ki'itbesajo'ob bey tu yéetel jun p'éel chac ikal ichil tuláacal le múuch' caajo'ob ma' u kaj óoltmajo'ob ca'acho', cu dzo'ocole' u lu'umo'obe' suunaj x tocoyil, tu'ux ma' tu páajtal u cajtal mix máaqui'. ¡Jun p'éel lu'um sen qui'ichquelme' tu sutajo'ob jun p'éel lu'um mix ba'al u biilal!