Read Yucateco Zacarías 8 Bible Online

Zacarías 8 - Yucateco bible

Zacarías 8

¹Yuumtzil u yuumil tuláacal páajtalile' tu dzaj ti' teen le péectzila':

²Tene' Yuuntzilen, u yuumilen tuláacal páajtalil, je'el ba'ax quin wa'alica': Quin wu'uyic nucuch dzíibolal tu yo'olal Sión, yéetel nojoch p'uja'anil tin dzíiboltaj.

³Bíin suunaquen Jerusalén u ti'al in cajtal tu ca'a téeni'. Jerusalén túune' bíin dza'abac u kaaba'inte Kub Óolal Caaj, cu dzo'ocole' u pu'uc Yuumtzil u yuumil tuláacal páajtalile', bíin dza'abac u kaaba'int Quili'ich Pu'uc.

⁴Nuxibo'ob yéetel x nuuco'ob bíin culaco'ob tu ca'a téen tu kíiwiquilo'ob Jerusalén, tu jujun túulilo'ob bíin xíimbalnaco'ob u machmajo'ob u xóolte'ob tu yo'olal sen úuchbentaco'ob.

⁵Mejen xi'ipalal yéetel mejen x ch'úupalal bíin chupic u kíiwiquilo'ob le caaj u ti'al ca báaxalnaco'obi'.

⁶Ti' le kiino'obo' u yalab le caaj p'aatalo', bíin u tuculto'ob ma' jaaj ba'ax cu yilico'obi'; ba'ale' tene' ma' bíin tuuculnaquen beyo'. Teen Yuumtzil, u yuumil tuláacal páajtalil, teen a'alic:

⁷Tene' bíin in toc in caajal tu kab u lu'umilo'ob j lakin yéetel ti' u múuch' caajilo'ob j chikin,

⁸bíin in taaso'ob Jerusalén u ti'al ca cajlaco'obi'. Leti'ob túune' bíin in caajalto'ob yéetel bíin u Kuinteno'ob yéetel ocsaj óolal bey xan yéetel toj p'is óolal.

⁹Lela' leti' ba'ax cu ya'alic Yuumtzil u yuumil tuláacal páajtalil: Mukulmuuknene'ex, te'ex máaxe'ex ca wu'uyique'ex ti' le kiino'oba', le t'aano'ob cu ya'alico'ob le aj bóobato'ob, líikbal ti' le kiin j dzaab u chuunpakilo'ob u kulnaj Yuumtzil u yuumil tuláacal páajtalilo'.

¹⁰Tumen tac bejela'e' ma' yanac ca'ach bo'ol u ti'al wíinico'ob mix u ti'al le ba'alche'obo'. Cu dzo'ocole' tu yo'olal le aj p'eeco', mina'an ca'ach jéedzel u ti'al u cajnáalilo'ob le caajo'; tene' dzo'oc ca'ach in beetic u ba'atelo'ob tu baatzilo'ob.

¹¹Ba'ale' bejela'e' ma' bíin in beet bey ti' le máaxo'ob p'aatalo'ob te j caaj le ba'ax tin beetaj ti' yáaxo'obo'. Teen Yuumtzil, u yuumil tuláacal páajtalil teen a'alic.

¹²Tumen bíin yanac jéedzel ichilo'ob. Le pakbil uvaobo' bíin ch'úuyuc u yicho'ob; le lu'umo' bíin u dzáa u joochilo'ob; bíin yanac xan u ye'ebil ca'an. Tene' bíin in dzáa u ti'alinto'ob tuláacal le máaxo'ob bíin p'áataco'ob ti' le caajo'.

¹³Je'el bix te'ex u cajnáalile'ex Judá yéetel Israel, j ila'abe'ex loolob t'aan ichil u chuucáan múuch' caajo'obe', bejela'e', bíin in toque'ex u ti'al ca ila'aque'ex qui' t'anta'ane'ex. ¡Ma' a sajactale'ex! ¡Mu'uka'anchajaque'ex!

¹⁴Lela' leti' cu ya'alic Yuumtzil u yuumil tuláacal páajtalila': Tene' tin wóoltaj ca'ach in jadz a máanja'an ch'i'ibale'ex le ca tu beetajo'ob in p'u'ujule', cu dzo'ocole' ma' j kexpaj in wóol ti' ba'ax tin tucultajo'.

¹⁵Ba'ale' bejela'e', dzo'oc in tucultic in beetic utz ti' Jerusalén yéetel ti' Judá. Le t o'olale' ma' ch'a'ique'ex sajaquil.

¹⁶Je'el ba'ax u najmal a beetique'ex mantadza': U najmal a wa'alique'ex ba'ax jaaj ta baatzile'ex mantadz, p'is óolnaque'ex yéetel toj p'is óolal bey xan il a wile'ex u yantal jéedzel tu cúuchil u yúuchul p'is óolal;

¹⁷ma' a loobilticaba'ex ta baatzile'ex mix a séeb chi'itique'ex chéen tuus. Tumen tene' in p'ectmaj tuláacal le ba'alo'obo'. Teen Yuumtzil, teen a'alic.

¹⁸Yuumtzil u yuumil tuláacal páajtalile' tu t'anajene', ca tu ya'alaj ti' teen:

¹⁹U su'ukinilo'ob le can p'éel winalo', u cinco winalo' yéetel u siete winalo', bíin suunac u kiinilo'ob qui'imac óolal yéetel kiinbesajo'ob u ti'al u ch'i'ibalo'ob Judá. ¡Yaabilte'ex ba'ax jaaj bey xan le jéedzel óolalo'!

²⁰Je'el ba'ax cu ya'alic Yuumtzil u yuumil tuláacal páajtalila': Ca'aliquile' bíin taalac wíinico'ob yéetel u cajnáalilo'ob nucuch caajo'ob.

²¹U cajnáalilo'ob túun jun p'éel caaje' bíin xi'ico'ob ti' u láak caaj, u ti'al ca u ya'alo'ob ti': ¡To'one' táan c bin j caxant Yuumtzil U yuumil tuláacal páajtalil u ti'al ca u qui' t'anto'on! U láak caajo'ob xane' bíin u núuco'ob: ¡To'on xane' bíin xi'ico'on!

²²Bíin talaco'ob túun Jerusalén ya'abcach caajo'ob yéetel múuch' caajo'ob u ti'al u caxanto'ob Yuumtzil u yuumil tuláacal páajtalil, u ti'al u káat óolto'ob ca qui' t'anta'aco'ob.

²³Ti' le kiino'ob túuno' Diez j táanxel lu'umilo'obe' bíin u cháacho'ob jun túul Judío tu nook u ti'al ca u ya'alo'ob ti': To'one' c káat bin ta wéetele'ex tumen dzo'oc c u'uyic ti' yaan Ku ta wéetele'exe'.