Read Yucateco Zacarías 9 Bible Online

Zacarías 9 - Yucateco bible

Zacarías 9

¹Lela' leti' le péectzil tu dzaj Yuumtzil tu yóokol u lu'umil Hadrac bey xan tu yóokol u caajil Damasco: U caajilo'ob Siria, ba'ax u ti'alo'ob Yuumtzil, bey xan tuláacal u múuch' cajtalil u yotochnáalo'ob Israel.

²Amate' Ba'al u ti'al xan, caajo'ob yano'ob naadz ti' Tiro yéetel Sidón pa'ate' yéetel tuláacal u kaj óolalo'ob.

³Tiroe', tu líikesaj tuulumo'ob, yéetel tu much'quintaj oro yéetel plata je'el bix u much'quinta'al kate'.

⁴Ba'ale' bíin láaj lukesa'ac ti' tumen Yuumtzil, bíin u láaj pul ich ka'anab u ayikalil, bíin u láaj tóoc xan u noj caajil.

⁵Le quéen ila'ac tumen u caajil Ascalón lelo', bíin sen ja'akac u yóol. Gazae' bíin sen mukyajnac xan, u alab óolal Ecrone' bíin lúubuc j lu'um. ¡Gazae' bíin p'áatac x ma' ajaw, Ascalón xane' bíin p'áatac x ma' cajnáalilo'ob!

⁶Tu lu'umil Asdode' bíin cajlac jun p'éel ch'i'ibal u xa'aka'an u ki'ikel yéetel táanxel lu'umilo'ob, beyo' bíin in t'onquint u ca'anal ichil le j filisteobo'.

⁷Bíin in lukes tu chi'ob le bak yéetel le ki'ik cu jaantico'obo', bíin in lukes tu yáam u cojo'ob le janalo'ob ma' utz u jaanta'alo'obo'. Ba'ale' ichil le wíinico'obo' bíin p'áatac dze'edzec ti'ob in ti'alinte; bíin jun p'éelac yéetel u caajil Judá, Ecrone' bíin béeyac je'el bix le jebuseobo'.

⁸Tene' bíin in nu'ucbesimbáa u ti'al in toc le máaxo'ob in ti'alo'ob, tu táan je'el máax bíin máanac waye'. Ma' bíin ye'edzeco'ob tu ca'a téen tumen le máax cu yeedzo', tumen bejela'e' teen ti' in wichil quin canantico'ob.

⁹¡U caajil Sión sen qui'imacchajac a wóol! ¡U caajil Jerusalén kaaynen tu yéetel qui'imac óolal! A ajawe' táan u taal tu'ux yanech, aj ti'ibil bej yéetel aj pa'a muuk, ba'ale' aj cabal óol u nat'maj jun túul burro, jun túul chan burro u yaal jun túul x burra.

¹⁰Leti' bíin xu'ulsic u bolano'ob Efraín yéetel u tzíiminilo'ob Jerusalén, bey xan u p'úunche'ilo'ob u yúuchul ba'atel. Bíin u ka'ayt jéedzel ti' múuch' caajo'ob bey xan bíin méektáanac ti' jun p'éel ka'anab ti' u láak ka'anab, líikbal Éfrautese', tac tu xuul yóokolcaab.

¹¹Yuumtzile' cu ya'alic: Jerusalén, tu yo'olal u ki'ikel a nup t'aane', tene' bíin in jóokes ichil soj ch'e'ene' a cajnáalilo'ob kala'ano'ob ichilo'.

¹²¡Te'ex, aj kala'an wíinique'ex ca walab óoltique'ex, a suute'ex ta tuulume'exe'! Quin wa'alic bin in ca'a in dzáa ti' te'ex ca'a máal u ya'abil qui' t'aano'ob ti' le ta mukyajtaje'exo'.

¹³Tumen Judá u x p'úunche'il in ba'atele', dzo'oc in sinic, dzo'oc xan in dzáic u julubil, lelo' Efraín. Teche' Sión, bíin in sutech jun p'éel máascab ca'amat u yej, bíin in beet u bin a paalalo'ob u ba'atelto'ob u paalalo'ob Grecia.

¹⁴Yuumtzile' bíin chíicpajac tu yóokol u caajal; bíin u tul u x julubo'ob je'el bix u jaadz cháaque'. Ku, Yuumtzile' bíin u jóops u trompeta, bíin xi'ic ichil u chac ikalo'ob j noojol.

¹⁵Yuumtzil u yuumil tuláacal páajtalile', bíin u canant máaxo'ob u ti'al, leti'obe' bíin u xanabcha'at u tuunicho'ob le aj yúuntuno'obo', bíin u xu'ulso'ob u aj p'eeco'ob; bíin u yuko'ob u ki'ikel u aj p'eeco'ob je'el bix u yu'ukul vinoe', bíin na'ajchajaco'ob tu yéetel je'el bix u chu'upul jun p'éel nojoch laque', bey je'el bix u baaquilo'ob u multuunil kultaje'.

¹⁶Ti' le kiino' Yuumtzil u Kuobe' bíin u toc u caajal je'el bix u to'ocol jun múuch' j tamano'obe', le máaxo'ob u ti'alo' bíin jóopbalnaco'ob tu caajalo'ob je'el bix u jóopbal jun p'éel péet jo'ol dza'an u jadzutz tuunichilo'obe'.

¹⁷¡Buca'aj utzil yéetel buca'aj jadzutzil bíin p'áatac caajalo'ob! Tu yéetel sen ya'abil u trigo yéetel u vino', c xi'ipalilo'ob yéetel c ch'úupalalo'obe' t'a'aj bíin ch'íijico'ob.