Read Yucateco Malaquías 1 Bible Online

Malaquías 1 - Yucateco bible

Malaquías 1

¹Lela' leti' le péectzil tu ya'alaj Yuumtzil ti' u caajil Israel tu chi' aj bóobat Malaquías.

²Yuumtzile' cu ya'alic: Tene' in yaabiltmaje'ex. Ba'ale' te'exe' ca wa'alique'ex: ¿Bix je'el c ojéeltic wa a yaabiltmajo'one'? Yuumtzile' cu núuquic: Tene' in yaabiltmaje'ex tumen quex sucu'untzil yéetel íidzintzil Esaú yéetel Jacobe', tene' tin yaabiltaj Jacobe'

³ca tin p'ectaj Esaú. U witzil lu'umo'ob Esaue', tin sutaj x tocoyil, u ma'alob lu'umo'ob u ti'al pakale', j p'áat chéen u ti'al u ba'alche'ilo'ob káax.

⁴Wa le j edomitaob u ch'i'ibalo'ob Esaú cu ya'alico'ob: Dzo'oc c xu'ulsa'ale'ex, ba'ale' bíin c utzquinte'ex c múuch' caajalo'ob, Yuumtzil u yuumil tuláacal páajtalile' cu núuquic: Leti'obe' bíin u yutzquinto'ob, ba'ale' tene' bíin in ca'a ch'éejse. U lu'umo'obe' bíin u kaaba'into'ob u Lu'umilo'ob loob, bíin xan u kaaba'int U múuch' caajilo'ob u p'u'ujul Yuumtzil, u ti'al kiino'ob mina'an u xuul.

⁵Te'exe' bíin a wile'ex ta wichile'ex u ti'al ca a wa'ale'ex: ¡Yuumtzile' sen nojoch, cu táadzmansic u jáal u lu'umilo'ob Israel!

⁶Yuumtzil u yuumil tuláacal páajtalile', cu ya'alic ti' aj le kiino'ob: Le paalalo'ob cu tziquico'ob u taataob, le palitzilo'ob cu tziquico'ob u dzuulilo'ob. Wa teen a Taataexe', ¿ba'axten ma' ta tziquiquene'ex? Wa teen a Dzuulile'exe', ¿ba'axten ma' ta tziquiquene'ex? Te'exe' ca cúulpachtiquene'ex, cu dzo'ocole' láili' ca káat chi'itique'ex: ¿Ti' ba'ax c cúupachtiquech?

⁷Te'exe' ca taasique'ex tu multuunil kultaj waaj ma' utz yanili', cu dzo'ocole' láili' ca káat chi'itique'ex: ¿Ba'ax yéetel c pajic a subtal? Te'exe' ca pajique'ex in subtal iquil a tucultique'ex je'el u páajtal a pajique'ex u subtal u multuunil in kulta'ale'

⁸bey xan ca tucultique'ex je'el u páajtal a taasique'ex ti' teen ba'alche'ob ch'óoptaco'ob, móochtaco'ob wa koja'antaco'ob. ¡Xeene'ex a bise'ex ti' a méektáane'ex! ¡Il a wile'ex wa qui'imac u yóolo'ob u kamico'ob siibalo'ob beyo'!

⁹Káate'ex ti' Ku ca u ch'a'a to'on óotzilil. Ba'ale' wa ca bisique'ex ti'ibil óolo'ob beyo', ma' a tucultique'ex wa je'el u kamic ti' te'ex yéetel qui'imac óole'. Yuumtzil u yuumil tuláacal páajtalile' cu ya'alic:

¹⁰¡Que'exi' wa yanac jun túul ti' te'ex u kal u jool najilo'ob le kulnaj, u ti'al ma' u ca'a suut t'a'abil káak chéen cunel tu yóokol u multuunil in kulta'ale'! Tumen tene' ma' qui' in wóol ta wéetele'exi', mix xan bíin in kam le ti'ibil óolo'ob ca taasique'exo'.

¹¹Ti' tuláacal u múuch' caajilo'ob u yóokolcaab quin tzi'iquil; tuláacal tu'ux cu tóoca'al poom tin nojbe'enil yéetel cu taasa'al ti' teen utzil ti'ibil óolo'ob.

¹²Ba'ale' te'exe' ca pajique'ex in subtal, tumen ca tucultique'exe' u multuunil in kulta'al, in mayacche', je'el u páajtal u kex óolta'ale', bey xan ca tucultique'ex p'ecbe'en le janalo'ob yaan tu yóokolo'.

¹³Te'exe' ca wa'alique'ex: ¡Dzo'oc u sen náacal c óol yéetel le ba'alo'oba'! Beyo' ca sutic a paache'ex ti' teen. Quex tumen ca tucultique'ex bíin qui'imacchajac in wóol le quéen taalaque'ex a kube'ex ti' teen le ba'alche' ocolta'an, wa jun túul wacax móoch wa koja'an.

¹⁴¡Yáanal loolob t'aan yaan le máax cu séeb chi'itic u taasic jun túul u wacax láaj utz yanil u wíinclil, ba'ale' cu taasic le ma' láaj utz u wíinclilo'! Teen nojoch Ajaw, bey xan sajac ti' teen tuláacal múuch' caajo'ob. Bey u ya'alic Yuumtzil u yuumil tuláacal páajtalil.