Read Yucateco Malaquías 2 Bible Online

Malaquías 2 - Yucateco bible

Malaquías 2

¹U'uye'ex, aj kiine'ex le t'aana' a ti'ale'ex:

²Te'exe' bíin a wu'uyaj t'antene'ex u najmal xan a tziquiquene'ex tu jaajil a wóole'ex. Wa ma' ta beetique'ex beyo' tene' bíin in loolob t'ante'ex. Bey tumen ma' a dza'ex a wóole'ex a tziquiquine'exo', bíin in sut loolob t'aanil tac u meeyjul le aj kiinil ca beetique'exo'. Yuumtzil u yuumil tuláacal páajtalil a'alic.

³Bin in ca'aj in lukes a páajtalile'ex bin in ca'aj xan in pul tu táan a wiche'ex u ta' le ba'alche'ob ca taasique'ex a kube'ex ti' teno'. ¡Ba'ale' pa'ate' yéetel le ta' bíin míista'aque'ex xano'!

⁴Beyo' bíin a wojéelte'ex teen dzaamail u ti'al u p'áatal jeedzelil in nup t'aan tu yéetel Levio'. Lelo' Yuumtzil u yuumil tuláacal páajtalil a'alic.

⁵In nup t'aane' cuxtal yéetel jéedzel ca'ach u ti'al Leví. Tene' tin dzáa ti' u ti'al ca u tziquen bey xan u ti'al ca yanac u sajaquil ti' teen, leti'e' tu ye'esaj ti' teen sajaquil yéetel tziiquil.

⁶Levie' cu ca'anbesic ca'ach ba'ax jaaj, tumen mina'an tuus ca'ach tu chi'. Cuxa'an ca'ach yéetel u jaajil jéedzel tin wéetel, cu dzo'ocole' tu tzelaj ya'abcach máaco'ob ti' kaakas bej.

⁷Le aj kiino'obo' u najmal u ca'anbesico'ob caaj u ti'al ca u kaj óolteno'ob, cu dzo'ocole' tuláacalo'ob u najmal u bino'ob tu yicnalo'ob u ti'al u kamo'ob tzol t'aano'ob, tumen leti'ob u aj bisaj t'aano'ob Yuumtzil u yuumil tuláacal páajtalil.

⁸Ba'ale' aj kiine'ex te'exe', dzo'oc a p'atique'ex le tojil bejo'; ya'ab máaco'ob dzo'oc a beetique'ex u lúubulo'ob yéetel a ca'anbesaje'ex. Bey túuno' te'exe' dzo'oc a kascuntique'ex le nup t'aan in beetmaj tu yéetel Levio'.

⁹Tu yo'olal ma' ta wu'uyaj t'antene'ex tumen xan ca ca'anbesique'ex le máaco'ob ma' u bisicuba'ob yéetel u láako'ob, bíin in beet ca ila'aque'ex mix ba'al a biilale'ex, ca xan u kex óolte'exo'ob. Yuumtzil u yuumil tuláacal páajtalil a'alic.

¹⁰¿Ma' wa chéen jun túulili' c taataex yaani', le Ku tu láaj beetajo'ono'? ¿Ba'ax ten túun c tusicaba'ex ta baatzile'ex, c manba'alcuntique'ex beyo' le nup t'aan tu beetaj Ku tu yéetel c máanja'an ch'i'ibale'exi'?

¹¹Judae' ma' u kubmaj u yóol ti' Kui', cu dzo'ocole' cu beeta'al ba'alo'ob sen kaastaco'ob Jerusalén yéetel Israel. Judae' dzo'oc u manba'alcuntic u quili'ichil le kulnaj yaabila'an tumen Yuumtzilo', cu dzo'ocole' u j xiibilo'ob Judae' j dzo'oc u beelo'ob tu yéetel co'olelo'ob cu kultico'ob ma' jaajil kuobi'.

¹²¡Quexi' ca luksa'aco'ob ti' t caajal tumen Yuumtzil máaxo'ob beetic le ba'alo'ob beyo', je'el máaxo'obe', quex tumen leti' le máaxo'ob cu taasaj ti'ibil óolo'ob ti' Yuumtzil u yuumil tuláacal páajtalilo'!

¹³Ba'ale' te'exe', asab ya'ab ba'ax ca beetique'ex: ca bulique'ex yéetel u ja'il a wiche'ex u multuunil u kulta'al Yuumtzil, ca sen beetique'ex yaayaj okolo'ob tumen ma' tu ka'amal a ti'ibil óole'ex tumen Yuumtzil.

¹⁴¿Quex beyo' ca káat chi'itique'ex ba'ax o'olal? Lelo' tumen Yuumtzil jajcuntic, dzo'oc a manba'alcuntic le séeb chi' ta beetaj ti' le co'olel máax yéetel dzo'oc a beel ta táanquelmilo'. ¡Leti' ca'ach a watan, teche' ta séeb chi'itaj ti', ma' bíin a kexe!

¹⁵¿Ma' wa chéen jun túul Ku beet le wíinclil bey xan le pixano'? ¿Ba'ax u káat Ku wa ma' ch'i'ibalo'ob u kubmajo'ob u yóolo'ob ti'? ¡Canante'ex a pixane'ex, ma' a manba'alcuntique'ex le séeb chi' ta beetaje'ex ti' a watane'ex ta táanquelemile'exo'!

¹⁶Yuumtzil u Kuil Israel u yuumil tuláacal páajtalile' cu ya'alic: ¡Canant a pixane'ex, ma' a kexique'ex a watane'ex; tumen tene' quin p'ectic le máax cu p'atic u yatan, u ti'al u kascunticubáa yéetel le kasa'anilo'!

¹⁷Yuumtzile' dzo'oc u náacal u yóol u ch'en xiquinte'ex; cu dzo'ocole' te'exe' bin u bin a káat chi'itique'ex: ¿Ba'ax dzo'oc c a'alic u ti'al ca náacac u yóol u ch'en xiquinto'on? Te'exe' dzo'oc a wa'alique'ex utz u lúubul ti' Yuumtzil máaxo'ob beetic kaas, cu dzo'ocole' ca wa'alique'ex xan qui'imac u yóol tu yéetelo'ob. ¡Te'exe' ma' ta táan óoltique'ex Kue' aj ti'ibil bej!