Read Yucateco San Mateo 1 Bible Online

San Mateo 1 - Yucateco bible

San Mateo 1

¹Lelo'oba' leti'ob u ch'i'ilancabilo'ob Jesucristo, leti'e' máax j síij ti' u ch'i'ilancabil David yéetel ti' Abraham.

²Abrahame' u taata Isaac, Isaaque' u taata Jacob, máax u taata Judá u taata xan u sucu'uno'ob yéetel u yíidzino'ob Judá.

³Judae' u taata Fares yéetel Zara, u maamaobe' Tamar. Farese' u taata Esrom, Esrome' u taata Aram.

⁴Arame' u taata Aminadab, Aminadabe' u taata Naasón, Naasone u taata Salmón.

⁵Salmone' u taata Booz u maamae' Rahab. Boose' u taata Obed u maamae' Rut, Obede' u taata Isaí.

⁶Isaí xane' u taata ajaw David. Ajaw Davide' u taata Salomón, u maamae' u yatan ca'ach Urías.

⁷Salomone' u taata Roboam, Roboame' u taata Abías, Abiase' u taata Asa.

⁸Asae' u taata Josafat. Josafate' u taata Joram. Jorame' u taata Uzías.

⁹Uziase' u taata Jotam, Jotame' u taata Acaz. Acaze' u taata Ezequías.

¹⁰Ezequiase' u taata Manasés. Manasese' u taata Amón. Amone' u taata Josías.

¹¹Josíase' u taata Jeconías yéetel u sucu'uno'ob, tu kiinilo'ob ca j bisa'ab le israelitaob tu lu'umil Babilonia.

¹²Cu dzo'ocol u bisa'alo'ob Babiloniae', ca j síij Salatiel, u taatae' Jeconías. Salatiele' u taata Zorobabel.

¹³Zorobabele' u taata Abiud. Abiude' u taata Eliaquim, Eliaquime' u taata Azor.

¹⁴Azore' u taata Sadoc. Sadoque' u taata Aquim. Aquime' u taata Eliud.

¹⁵Eliude' u taata Eleazar. Eliazare' u taata Matán. Matane' u taata Jacob.

¹⁶Jacobe' u taata José, máax u yíicham María, lela' u maama Jesús, máax j a'ala'ab leti' le Cristoo'.

¹⁷Bey túuno' cáajic ti' Abraham tac Davide' yaan catorce ch'i'ilancabilo'ob, yaan catorce xan cáajic ti' David tac ca j bisa'ab le israelitaob Babiloniao', yéetel u láak catorce tac ca j síij le Cristoo'.

¹⁸Bey úuchic u síijil Jesucristoa': María, u maamae', u nu'uctmaj u dzo'ocol u beel yéetel José ca'achi; ma'ili' túun u nupubáa yéetele' ca j yo'omchaj ti' chan paal tu yo'olal u páajtalil Quili'ich Pixan.

¹⁹José u yíichame' tu yo'olal toj u cuxtale', ma' tu yóoltaj u tac u pool Maríai', ba'ale' tu tucultaj u x mucul p'atic.

²⁰Ca'aliquil táan u tucultique' tu wayaktaj u ya'ala'al ti' tumen jun túul u ángel Yuumtzil: José u ch'i'ilancabilech David, ma' a ch'a'ic sajaquil a kamic María a watan, tumen le chan paal cu bin j antal ti'o' ti' Quili'ich Pixan u taal.

²¹Bíin anac u chan paal, JESÚS[1] ca bin a dzáa u kaaba'. Bey cu bin u kaaba'into', tumen leti' bíin u toc u caajal ti' u kebano'ob.

²²Tuláacal lela' j úuch tu yo'olal u dzo'ocpajal le ba'ax a'ala'an tumen Yuumtzil je'el bix tu dzíibtaj le aj bóobato':

²³Jun túul sujuy x ch'úupale' bíin u ca'aj antal u chan pal, bíin dza'abac u kaaba'int Emanuel, u káat u ya'ale': Ku t éetel.

²⁴Josee' le ca j aaje' tu beetaj je'el bix a'alabic ti' tumen u ángel Yuumtzilo', ca tu kamaj María u yatan.

²⁵Ba'ale' mix ba'al yanchaj u yil x yéetel, p'is síijic u chan paal Maríae', ca tu dzaj u kaaba'int JESÚS.