Read Yucateco San Mateo 10 Bible Online

San Mateo 10 - Yucateco bible

San Mateo 10

¹Jesús túune' tu t'anaj u doce aj canbalo'obe' ca tu dzaj páajtalil ti'ob u ti'al u jóokesico'ob le kaakas pixano'obo' yéetel u ti'al u dzaquico'ob tuláacal koja'anilo'ob yéetel ki'inamilo'ob.

²U kaaba' le doce aj canbalo'obo' leti' lelo'oba': Yáaxile' Simón, máax tu kaaba'inta'ab xan Pedro, yéetel Andrés u yíidzin; Jacobo Yéetel Juan u yíidzin, u paalalo'ob Zebedeo;

³Felipe, Bartolomé, Tomás yéetel Mateo le j kam patano'obo'; Jacobo u paal Alfeo; Lebeo máax kaba'inta'ab xan Tadeo;

⁴Simón, máax jun túul le cananita; yéetel Judas Iscariote le máax tu kubaj Jesuso'.

⁵Jesuse' tu túuxtaj le docea' yéetel le tzol xiquino'oba': Ma' a bine'ex ti' le lu'umo'ob tu'ux caja'ano'ob le ma' ocsaj óolo'obo', mix a wocle'ex tu caajilo'ob Samaria,

⁶xene'ex yáax táanil ti' u saatal j tamano'ob u caajil Israel.

⁷Xene'ex a tze'ecte'ex dzo'oc u náadzal u ajawil ca'an.

⁸Dza'ex u toj óolal ti' le máaxo'ob koja'ano'obo'; ca'a púut cuxquinte'ex le máaxo'ob quimeno'obo'; lukse'ex u koja'anil le máaxo'ob yaan jáaway ti'obo', jóokese'ex le kaakas pixano'obo'. Sibil ta kamjilaque'ex, si'ex túun.

⁹Ma' a bisique'ex oro, mix plata, mix cobre,

¹⁰mix sáabucan u ti'al le bejo', Bise'ex chéen jun p'éel a nooke'ex, yéetel ma' a bisique'ex xanab mix xóolte', tumen le j meyajo' cu najmatic u dza'abal u janal.

¹¹Le quéen kuchuque'ex ti' jun p'éel caaj wa ti' jun p'éel cajtalile', caxte'ex te'elo', jun túul máac cu najmatic a wantale'ex tu yotoch, p'áatene'ex te'elo' tac quéen lukuque'ex ti' le caajo'.

¹²Le quéen ocoque'ex te j najo' tziiquilnene'ex táan a dzíiboltique'ex jéedzel.

¹³Wa u cajnáalilo'ob le naj cu najmatico'obo', le jéedzela' cu p'áatal ti'ob; ba'ale' wa ma' tu najmatico'obe', cu suut ti' te'ex.

¹⁴Wa ma' tu kamique'exo'ob mix u káato'ob u yu'ubexo'obe', jóokene'ex túun ti' le naj wa ti' le caajo' ca a tíite'ex u lu'umil a wooque'ex.

¹⁵Tu jaajil quin wa'alic ti' te'exe', tu kiinil le xot kiino' le jaadz cun u bis le caajo' asab yaj ti' le cun u bis u cajnáalilo'ob Sodoma yéetel Gomorrao'.

¹⁶¡Ile'ex! Tene' táan in túuxtique'ex je'el bix j tamano'ob ichil loolob ba'alche'obe'. P'il a wiche'ex je'el bix le cano'obo', ba'ale' cabalchajac a wóole'ex je'el bix le sacpacalo'obo'.

¹⁷Canantaba'ex, tumen le máaco'obo' yaan u kubique'exo'ob ti' u nojchilo'ob le caajo' yéetel yaan a ja'adzale'ex tu cúuchil muuch'tal,

¹⁸bey xan bíin bisa'aque'ex tu táan jalacho'ob yéetel ajawo'ob tin wo'olal; beyo' je'el u páajtal a t'aane'ex tin wo'olal tu táano'ob yéetel tu táan j ma' ocsaj óolo'obo'.

¹⁹Ba'ale' le quéen ku'ubuque'ex ti' le jalach wíinico'obo', ma' a sen tucultique'ex ba'ax can a wa'ale'ex wa bix can a wa'ale'ex, tumen le quéen kuchuc u suutuquil a t'aane'exe' Yuum Ku cu bin u dzáa ta tuucule'ex ba'ax can a wa'ale'ex.

²⁰Tumen ma' te'ex can t'aane'exi', ba'ale' u Quili'ich Pixan a Taataex cun t'aan ti' te'ex.

²¹Le máaco'obo' yaan u kubico'ob u sucu'uno'ob u ti'al ca quiimsa'aco'ob, le taatatzilo'obo' yaan u kubico'ob u paalal; le paalalo'obo' yaan u suticuba'ob tu y óokol u taataob yéetel yaan u beetico'ob u quíimsa'alo'ob.

²²Yaan a p'ecta'ale'ex tumen tuláacal yóokolcaab tin wo'olal; ba'ale' le máax cu p'áatal ti' ten tac tu xuule', leti' bíin to'ococ.

²³Le quéen ch'a'apachta'aque'ex ti' jun p'éel caaje', xene'ex táanxel caaj; tumen tu jaajil quin wa'alic ti' te'exe', u Paal Máaque' yaan u taal ma'ili' dzo'ococ a xíimbaltique'ex tuláacal u caajilo'ob Israel.

²⁴Mix jun túul aj canbal asab ma'alob ti' ti' u aj ca'anbesaj, bey xan mix jun túul palitzil asab nojoch ti' ti' u dzuulil.

²⁵Le aj canbalo'obo' unaj u qui'imactal u yóol u kuchul béeytal je'el bix u aj ca'anbesajo', bey xan le palitzilo' je'el bix u dzuulile'. Wa u nojochil le naj cu ya'ala'al Belzebú[3] ti'o', ¿ba'ax ma' je'el u ya'ala'al ti' u láaktzilo'obe'?

²⁶Le o'olale', ma' a ch'a'ique'ex sajaquil ti' máaco'ob. Tumen mina'an mix jun p'éel ba'al muculta'an ca p'áatac ma' u yojéelta'al, bey xan mina'an mix ba'al ta'aca'an ca p'áatac ma' u caxta'al.

²⁷Le ba'ax quin wa'alic ti' te'ex ich éekjoch'e'enile', a'ale'ex tu sáasilil kiin; le ba'ax ca x mucul u'uyique'exo', awte'ex tu ca'anlil le najo'obo'.

²⁸Ma' a ch'a'ique'ex sajaquil ti' le máaxo'ob cu quíimsico'ob le wíinclilo', ba'ale' ma' táan u páajtal u quíimsico'ob le pixano'; ch'a'ex sajaquil ti' le máax cu páajtal u xu'ulsic le wíinclilo' bey xan le pixano' ich metnal.

²⁹¿Ma' wa tu co'onol ca'a túul mejen ch'íich'o'ob tu yo'olal jun p'éel chan taakini'? Ba'ale' mix jun túul ti' leti'ob cu lúubul lu'um wa ma' tu yóoltic a Taataex.

³⁰Tumen tac u tzo'otzel a poole'exe' láaj xoca'an tu jujun cúulil.

³¹Ma' a ch'a'ique'ex sajaquil túun: te'exe' mas yaan a tojole'ex ti' ya'ab mejen ch'íich'o'ob.

³²Tuláacal máax cu dzáicuba tin tzéel tu táan máaco'obe', bey xan teen yaan in dzáiquinba tu tzéel tu táan in Taata yaan te j ca'ano';

³³ba'ale' le máax cu ya'alic tu táan máaco'ob ma' u kaj óolene', bey xan teen yaan in wa'alic tu táan in Taata yaan te j ca'ano' ma' in kaj óoli'.

³⁴Ma' a tucultique'ex wa taalaja'anen u ti'al in taas jéedzel way lu'ume', tumen ma' taalaja'anen in taas jéedzeli' ba'ale' ba'atelil.

³⁵J taalen u ti'al in beet u bin máac tu yóokol taata, le x ch'úupalo' tu yóokol u maama, yéetel le x ilibtzilo' tu yóokol u suegra;

³⁶beyo' jun túul máaque' yaan u p'ecta'al tumen u láaktzilo'ob.

³⁷Le máax cu yaabiltic u taata wa u maama asab ti' tene', ma' táan u najmatic in ti'alintic. Yéetel le máax cu yaabiltic u xiibil paal wa u x ch'upul paal asab ti' tene', ma' táan u najmatic in ti'alintic,

³⁸bey xan le máax ma' tu cuchic u cruz u ti'al u taal tin paache', ma' táan u najmatic in ti'alintic.

³⁹Le máax u káat u toc u cuxtale', bíin u sate; ba'ale' le máax cu satic u cuxtal tin wo'olale', bíin u toque.

⁴⁰Le máax cu kamique'exe', teen cu kamiquen; le máax cu kamiquene' cu kamic le máax túuxteno'.

⁴¹Le máax cu kamic jun túul aj bóobat tumen aj bóobate', bíin u kam jun p'éel bo'olal je'el bix le cu dza'abal ti' jun túul aj bóobate'. Le máax cu kamic jun túul utzil máac tumen utzil máaque', bíin u kam jun p'éel bo'olal je'el bix le cu dza'abal ti' jun túul utzil máaque'.

⁴²Bey xan je'el máaxac ca u dzáa quex chéen jun luuch síis ja' ti' jun túul ti' le mejen paalalo'ob tumen táan u tzaypachtiquene', tu jaajile' bíin u kam u bo'olal.