Read Yucateco San Mateo 13 Bible Online

San Mateo 13 - Yucateco bible

San Mateo 13

¹Ti' le kiino' jóok Jesús ti' le najo' ca j culaj tu jáal ka'anab.

²Tumen much'laj ya'abcach máaco'ob te tu'ux yano', Jesuse' j ooc cutal ti' jun p'éel cheem, ca j p'áat tuláacal le máaco'ob tu jáal le ja'o'.

³Ca tu ca'ansaj ti'ob ya'abcach ba'alo'ob ichil quet t'aano'ob, táan u ya'alic: Jun túul máaque' jóok pakal.

⁴Táan u paakale' dze'edzec ti' le i'inajo' j lúub tu tzéel le bejo', ca j taal le ch'íich'o'obo' ca tu lukajo'ob le i'inajo'.

⁵U láak jun jaatze' j lúub ti' tzekelo'ob tu'ux ma' ya'ab lu'um yani'; le i'inajo' séeba'an jóokic tumen ma' taam u lu'umili',

⁶ba'ale' le ca jóok le kiino' j tóoca'abi' ca j tiji' tumen mina'an u mootz.

⁷U láak le i'inajo' j lúub ich ki'ixo'ob, le ki'ixo'ob túuno' j ch'íijo'obe' ca tu pech'ajo'ob le paakalo'.

⁸Ba'ale' u láak jun jaatze' j lúub ti' ma'alob lu'um, ca j ichnaj ma'alob, yaan tu dzajo'ob ciento, u yichi' u láako'obe' sesenta, u láako'obe' treinta.

⁹Wa te'ex yaan a xiquine'exe' ¡U'uyajnene'ex!

¹⁰Le aj canbalo'ob túuno' tu nadzajuba'ob ti' Jesuse' ca tu káat chi'ito'ob ti' ba'ax ten táan a ca'ansic le máaco'ob yéetel quet t'aano'obo'.

¹¹Jesuse' tu núucaj ti'ob: Ti' te'exe' Yuum Kue' cu dzáic a wojéelte'ex u ta'acbil ba'alo'ob u ajawil ca'an; ba'ale' ti' leti'obe' ma' dza'an u yojéelto'obi'.

¹²Tumen le máax yaan ti'e' cu dza'abal u láak ti'e', cu yantal túun u asab ya'abil ti'; ba'ale' le máax mina'an ti'e' tac le jun p'íit yaan ti'o' cu lukesa'al ti'.

¹³Le o'olal quin ca'ansico'ob yéetel quet t'aano'ob; tumen leti'obe' cu paacato'ob, ba'ale' cu p'áatal bey ma' tu yilico'obe'; cu yu'ubajo'ob, ba'ale' cu p'áatal bey ma' tu na'atico'obe', mix tu yu'ubico'ob.

¹⁴Beyo' cu dzo'ocpajal ti' leti'ob ba'ax tu ya'alaj aj bóobat Isaías: Te'exe' tu jaajile' bíin a wu'uye'ex, ba'ale' ma' bíin a na'ate'exi' tu jaajile' bíin a pacte'ex, ba'ale' ma' bíin a wile'exi'.

¹⁵Tumen u pucsi'ikal le máaco'oba' dzo'oc u chichtal, jach máacal u xiquino'ob yéetel muudzul u yicho'ob; u ti'al ma' u paacato'ob yéetel yicho'ob, mix u yu'ubajo'ob yéetel u xiquino'ob, mix u na'atajo'ob yéetel u pucsi'ikalo'ob, mix u suuto'ob ti' teen u ti'al ca in dzaco'ob.

¹⁶Ba'ale' te'exe' qui' a wóole'ex, tumen ca paacate'ex yéetel a wiche'ex yéetel ca wu'uyaje'ex yéetel a xiquine'ex.

¹⁷Tu jaajil quin wa'alic ti' te'exe' ya'ab aj bóobato'ob yéetel ma'alob máaco'ob tu yóoltajo'ob u yilo'ob le ba'alo'ob ca wilique'ex te'exa', ba'ale' ma' tu yilajo'obi'. Tu yóoltajo'ob u yu'ubo'ob le ba'alo'ob ca wu'uyique'ex te'exa', ba'ale' ma' tu yu'ubajo'obi'.

¹⁸U'uye'ex túun ba'ax u káat u ya'al u quet t'aanil le máac cu paakalo':

¹⁹Le máaxo'ob tu yu'ubajo'ob u tze'ecta'al u ma'alob péectzilil u ajawil ca'ano', ba'ale' ma' tu na'atajo'obe', beyo'ob le i'inaj j lúub tu tzéel le bejo'; cu taal kasilba'ale' cu lukesic le ma'alob péectzil j pa'ak tu pucsi'ikalo'obo'.

²⁰Le i'inaj j lúub ti' tzekelo' leti' le máaxo'ob cu yu'ubico'ob le ma'alob péectzilo' yéetel cu kamico'ob yéetel qui'imac óolal,

²¹ba'ale' tumen mina'an u mootzo'obe' cu t'ililo'ob chéen dze'edzec kiin, le quéen u mukyajto'ob yaayaj óolal yéetel ch'a'apachtajil tu yo'olal le ma'alob péectzilo', cu lúubul u yóolo'ob.

²²Le i'inaj j pa'ak ich ki'ixo'obo', leti' le máaxo'ob cu yu'ubico'ob le ma'alob péectzilo', ba'ale' cu sen tucultico'ob u ba'alo'obil le yóokolcaaba' yéetel cu tu'usulo'ob tumen le ayikalilo'. Tuláacal lela' cu cupic yiik le ma'alob péectzilo' yéetel ma' táan u cha'ic u yichanquil ti' le máaco'oba'.

²³Ba'ale' le i'inaj j pa'ak ti' ma'alob lu'ume', leti' le máaxo'ob tu yu'ubajo'ob le ma'alob péectzilo' tu na'atajo'ob, yéetel cu dzáico'ob ich. Dze'edzeque' tu dzaj ciento u yich, u láako'obe' sesenta, u láako'obe' treinta.

²⁴Jesuse' tu tzicbaltaj ti'ob le u láak quet t'aana': U ajawil ca'ane' bey je'el bix jun túul máac tu pakaj ma'alob trigo tu coole';

²⁵ba'ale' ca'aliquil tuláacal táan u wenelo'obe' j taal jun túul u aj p'eec u yuumil le coolo' ca tu pakaj kaakas xíiwo'ob ichil le trigoo' ca j bini'.

²⁶Le ca j ch'íij le trigo ca yanji u yi'ije' ca j chíicpaj xan le kaakas xíiwo'.

²⁷Le j palitzilo'ob túuno' j bino'ob u ya'alo'ob ti' u yuumil le coolo': Dzuul ¿ma' wa ma'alob le trigo ta pakaj ta coolo'? ¿tu'ux túun u taal le kaakas xíiwo'?

²⁸U yuumil le coolo' tu ya'alaj ti'ob: Jun túul aj p'eec beet lela'. Le palitzilo'ob túuno' tu káat chi'ito'ob ti': ¿A káat ca xi'ico'on c joc le kaakas xíiwo'?

²⁹Ba'ale' leti'e' tu ya'alaj ti'ob: Ma', tumen bic a joque'ex le trigo pa'ate' yéetel kaakas xíiwo'.

³⁰Asab ma'alob ca a p'ate'ex u múuch' ch'íijilo'ob tac tu kiinil le jocho'; le kiin túuno' bíin in wa'al ti' le j meyajo'obo'; mole'ex táanil le kaakas xíiwo', ca a beete'ex u cúucuchal u ti'al tocbil, cu dzo'ocole' líikese'ex le trigo tin ch'iilo'.

³¹Jesuse' tu tzicbaltaj ti'ob le u láak quet t'aana': U ajawil ca'ane' je'el bix jun p'éel u neek mostaza cu paakal tumen jun túul máac tu lu'ume'.

³²Tu jaajile' leti' u asab chichanil ichil tuláacal le neeko'obo'; ba'ale' le quéen ch'íijique', cu asab nojochtal ti' le pakalo'obo' yéetel cu béeytal je'el bix jun cúul che'e, tac le ch'íich'o'ob cu taalo'ob u beeto'ob u ku'ob tu kabo'obo'.

³³Bey xan tu tzicbaltaj ti'ob le u láak quet t'aana': U ajawil ca'ane' je'el bix le levadurao', tu ch'a'aj u xa'akt jun túul co'olel yéetel óox p'éel u p'iisil harina u ti'al u beetic u líikil tuláacal le sacano'.

³⁴Jesuse' tu ya'alaj tuláacal le ba'alo'ob ti' le máaco'obo' yéetel quet t'aano'ob, mix ba'al tu ca'ansaj ti'ob wa ma' yéetel quet t'aano'obi'.

³⁵Lela' j úuch u ti'al ca dzo'ocpajac ba'ax tu ya'alaj le aj bóobat le ca tu dzíibtaj: Bíin t'aanaquen yéetel quet t'aano'ob; bíin in wa'al ba'alo'ob ta'acanili' le ca j chu'unpaj yóokolcaabe'.

³⁶Jesús túune' tu utzil túuxtaj le máaco'obo' ca j ooc ich naj, te'elo' tu nadzajuba'ob u aj canbalo'ob ti'e' ca tu ya'alajo'ob ti'; Tzol to'on u quet t'aanil le kaakas xíiw yanji te j coolo'.

³⁷Jesús túune' tu ya'alaj ti'ob: U Paal Máac máax pakic le ma'alob trigoo';

³⁸le coolo' yóokolcaab. Le ma'alob trigoo' leti' le máaxo'ob yano'ob te j ajawilo', le kaakas xíiwo' leti' le máaxo'ob u ti'al kasilba'alo',

³⁹le aj p'eec tu pakaj le kaakas xíiwo', kaasiba'al. Le joocho' u káat ya'ale' u kiinil u xu'ulul yóokolcaab, le máaxo'ob cun u molo'ob le joocho' leti' le ángelo'obo'.

⁴⁰Bey je'el bix u mo'olol le kaakas xíiw u ti'al tocbil ti' káako', bey xan bíin úuchuc quéen xu'uluc yóokolcaab.

⁴¹U paal Máaque' bíin u túuxt u ángelo'ob u ti'al u molo'ob ti' u ajawil tuláacal le máaxo'ob cu beetico'ob u kebantal u láak máaco'obo', bey xan le máaxo'ob cu beetico'ob le kaaso'.

⁴²U ti'al u pulo'ob ti' káak tu'ux cu yúuchul okol yéetel jach' coj.

⁴³Le máaxo'ob cu beetico'ob ba'ax u káat Kue', yaan u léenbalo'ob tu ajawil u Taataob je'el bix u léenbal le kiino'. Wa te'ex yaan a xiquine'exe' u'uyajnene'ex.

⁴⁴U ajawil ca'ane' bey je'el bix jun p'éel ayikalil muca'an ti' lu'ume'. Jun túul máaque' cu caxantic le ayikalilo', cu dzo'ocole' cu ta'aquic tu ca'a téen tu cúuchil; chuup u pucsi'ikal yéetel qui'imac óolale' cu bine' cu conic tuláacal ba'al yaan ti'e', cu dzo'ocole' cu manic le lu'umo'.

⁴⁵U ajawil ca'ane' bey xan je'el bix jun túul j coonol cu máan u caxant qui'ichquelem perlaobe'.

⁴⁶Le quéen u caxant jun p'éel ya'ab u tojole' cu bine' cu conic tuláacal ba'al yaan ti'e', cu dzo'ocole' cu manic le perlao'.

⁴⁷U ajawil ca'ane' bey xan je'el bix u káanil chuc cay cu pu'ulul ka'anabe' cu jóokesic tuláacal u jejeláasil cayo'ob.

⁴⁸Le quéen chu'upuc le u káanil chuc cayo', le j chuc cayo'obo' cu jóokesico'ob jáal ja', te' túuno' cu cutalo'ob u yéeyo'ob le cayo'; cu dzáico'ob le ma'alob cay ti' xaaco'obe', le ma' paatalo' cu pulico'ob.

⁴⁹Bey cun j úuchul tu xuul yóokolcaab: yaan u jóokolo'ob le ángelo'ob u jun páaycunt le máaxo'ob kasa'ano'obo', ti' le máaxo'ob utzo'obo',

⁵⁰bíin u pulo'ob le máaxo'ob kasa'ano'obo' ti' káak tu'ux cu yúuchul okol yéetel jach coj.

⁵¹Jesús túune' tu káat chi'itaj ti'ob: ¿Ca na'atique'ex wa tuláacal le ba'alo'oba'? Leti'obe' tu ya'alajo'ob: C na'atic Yuumtzil.

⁵²Tu ya'alaj túun ti'ob: Jun túul u aj ca'anbesajil le a'almaj t'aano' le quéen u can u ba'alo'obil u ajawil ca'ane', cu kuchul béeytal je'el bix u yuumil jun p'éel naje', ti' le ayikalil yaan ti'o' u yojel u jóokes ba'alo'ob túumbentac yéetel ba'alo'ob úuchbentac.

⁵³Le ca tu dzo'ocsaj Jesús u ca'ansic le quet t'aano'oba', j luk te'elo'

⁵⁴ca j bin tu caajal, te'elo' jo'op' u ca'ansaj tu sinagogail caajo'. Le máaco'ob túuno' tumen jaka'an u yóolo'obe' tu ya'alajo'ob: ¿Tu'ux tu canaj le máac le ba'alo'oba'? ¿Bix u páajtal u beetic le chíiculalo'oba'?

⁵⁵¿Ma' wa leti' u paal le aj póolche'o? ¿Ma' wa María u maamai'? ¿Ma' wa leti' u sucu'un Jacobo, José, Simón yéetel Judasi'?

⁵⁶¿Ma' wa way caja'ano'ob xan ichilo'on u x ch'upul íidzino'obe'? ¿Tu'ux túun tu canaj tuláacal le ba'alo'oba'?

⁵⁷Le o'olale' ma' tu dzaj u yóolo'ob ti'i. Ba'ale' Jesuse' tu ya'alaj ti'ob: Tuláacal máaque' cu yaabiltic jun túul aj bóobat, chéen ba'ale' ma' tu yaabilta'al tumen u yéet caajalo'ob mix tumen u yéet otochnáalo'ob.

⁵⁸Ma' tu beetaj ya'ab chíiculalo'ob te'elo', tumen leti'obe' ma' tu yocsajo'ob u yóolo'ob ti'i.