Read Yucateco San Mateo 14 Bible Online

San Mateo 14 - Yucateco bible

San Mateo 14

¹Ti' le kiino'obo' Herodes, u jalachil Galileae', tu yu'ubaj u péectzilil Jesús,

²ca tu ya'alaj ti' le máaxo'ob yano'ob tu yicnalo': Leti'e' Juan Bautista máax dzo'oc u ca'a púut cuxtal ti' le quíimilo'. Le o'olal yaan le nojoch páajtalil ti'o'.

³Tumen Herodese' tu beetaj u ma'achal Juane' ca j ka'axe' c j bisa'ab kalbil. Tu beetaj lela' tu yo'olal Herodías u yatan Felipe u sucu'un,

⁴tumen Juane' tu ya'alaj ti' Herodese': Ma' unaj a watantiqui'.

⁵Herodese' u káat ca'ach u quíims Juan, ba'ale' sajac ti' le máaco'obo', tumen tuláacal máac tucultique' Juane' jun túul aj bóobat.

⁶Ba'ale' Herodese' tu kinbesaj u kiin u kaaba', ti' le kiino' u x ch'upul paal Herodíase' jóok okot tu táan le u'ula'obo', lela' jach utzji tu yich Herodese',

⁷ca tu ya'alaj ti': quin jalachtic tech je'el in dzáic teech je'el ba'alac ca a káate'.

⁸Leti' túune', cu dzo'ocol u tzol xiquinta'al tumen u maamae' ca tu ya'alaj ti' Herodes: Dzáa teen u pool Juan Bautista ti' jun p'éel plato.

⁹Lela' tu beetaj u okom óolta'al ajaw Herodes, ba'ale' tu yo'olal tu jalach t'aantaj ti', yéetel u'uya'ab xan tumen u yu'ulabo'obe', tu ya'alaj ca dza'abac ti'.

¹⁰Tu túuxtaj túun cúul ch'actbil u pool Juan te j tu'ux kala'ano';

¹¹cu dzo'ocole' ca j taasa'ab ti' jun p'éel platoe' ca j dza'ab ti' le x ch'úupalo', leti' túune' tu kubaj ti' u maama.

¹²J kucho'ob túun u j tzaypacho'ob Juane' ca tu bisajo'ob u wíinclile' ca tu mucajo'ob; cu dzo'ocole' j bino'obe' ca tu ya'alajo'ob ti' Jesús.

¹³Le ca tu yojéeltaj Jesús le péectzila', j luk te'elo', j ooc ti' jun p'éel cheeme' ca j bin tu juunal tac jun p'éel cúuchil jun páayil. Ba'ale' ojéelta'ab tumen le máaco'obo', ca jóoko'ob ti' le caajo'obo' u ti'al u bino'ob xíimbalil tac tu'ux cu bin leti'.

¹⁴Le ca jóok Jesús ti' le cheemo' tu yilaj yaan ya'abcach máaco'ob te'elo', ca tu ch'a'aj óotzilil ti'ob, ca tu dzaj u toj óolal le koja'ano'ob tu taasajo'obo'.

¹⁵Tumen táan u yáakabtale' u aj canbalo'ob Jesuse' j taalo'obe' ca tu ya'alajo'ob ti': Táan u yáakabtal cu dzo'ocole' mix máac caja'an ti' le cúuchila'. Utzil túuxt le máaco'ob u ti'al ca xi'ico'ob ti' le cajtalilo'ob u máano'ob ba'al u jaanto'obo'.

¹⁶Jesuse' tu ya'alaj ti'ob: Ma' kabéet u bino'obi', dza'ex te'ex ba'al u jaanto'ob.

¹⁷Leti'obe' tu núucajo'ob ti': yaan to'on chéen cinco waaj yéetel ca'a túul cay.

¹⁸Jesuse' tu ya'alaj ti'ob: Taase'ex ten waye'.

¹⁹Tu túuxtaj túun ca culac le máaco'ob tu yóokol le su'uco'. Cu dzo'ocole' tu ch'a'aj tu kab le cinco waajo' yéetel le ca'a túul cayo', tu líiksaj u yich ca'ane' ca tu nib óoltaj Ku, tu xet'aj túun le waajo' ca tu dzaj ti' u aj canbalo'ob, leti'ob túune' ca tu t'oxajo'ob ichil le máaco'obo'.

²⁰Tuláacal jaano'ob tac ca na'ajchajo'ob, cu dzo'ocole' tu chupajo'ob doce xaaco'ob yéetel le u xéexet'al j p'áato'.

²¹Le máaxo'ob jaano'obo' míin cinco mil máaco'ob, ma' xoca'an ichilo'ob le co'olelo'ob mix le paalalo'obo'.

²²Cu dzo'ocole' Jesuse' tu beetaj u yocol u aj canbalo'ob ti' le cheemo' u ti'al ca xi'ico'ob táanil tac tu táanxel tzéelil le ka'anabo', ca'aliquil táan u yutzil túuxtic le máaco'obo'.

²³Cu dzo'ocol u yutzil túuxtico'obe', Jesuse' j na'ac payalchi' tu juunal te j pu'uco'. Le ca j áakabchaje' Jesuse' láili' tu juunal yanil te'elo',

²⁴ca'aliquil le cheemo' dzo'oc u kuchul chúumuc ka'anab. U cuclil le ja'o' táan u ja'ajadzicubáa ti' le cheemo' tumen le iiko' actáan ti'ob u taal.

²⁵Táan u taal u sáastale' ca tu nadzajubáa Jesús ti'ob táan u xíimbal yóokol le ja'o'.

²⁶Le aj canbalo'obo', le ca tu yilajo'ob táan u xíimbal tu yóokol le ja'o', sajacchajo'ob; tu yo'olal u sajaquilo'obe' tu yawtaj: ¡Jun túul ja'asaj óol!

²⁷Ba'ale' j t'a'ano'ob tumen Jesuse' ca j a'ala'ab ti'ob: ¡Yanac a wóole'ex; teen, ma' a ch'a'ique'ex sajaquil!

²⁸Pedro túune' j t'aanaje' ca tu ya'alaj ti': Yuumtzil wa teche', a'al teen ca xi'iquen tu yóokol le ja' tac tu'ux yanech'.

²⁹Jesuse' tu ya'alaj ti': Co'oten. Jóok túun Pedro ti' le cheemo' ca jo'op' u xíimbal tu yóokol le ja'o' u ti'al u binbal tac tu'ux yaan Jesús.

³⁰Ba'ale' le ca tu yilaj le ka'amcach iiko', sajacchaji; ca jo'op' u búulule', tu yawtaj: ¡Toqueni', Yuumtzil!

³¹Tu séeblaquil j ma'ach tu kab tumen Jesuse' ca j a'ala'ab ti': ¡Jach jun p'íit a wocsaj óolal! ¿Ba'ax ten ca'a p'éelchaj a tuucul?

³²Le ca j na'aco'ob te j cheemo', jéedz le iiko'.

³³Le máaxo'ob yano'ob te j cheemo' xolajo'ob tu táan Jesuse' ca tu ya'alajo'ob: ¡Tu jaajil teche' u Paalech Yuum Ku!

³⁴Tu ch'acto'ob le ka'anabo' ca j kucho'ob tu lu'umil Genesaret.

³⁵Le ca j kaj óolta'ab Jesús tumen u cajnáalilo'ob le cúuchilo', tu t'i'it'besajo'ob u péectzilil ti' tuláacal le lu'umo'. Ca j taasa'ab tuláacal le máaxo'ob koja'ano'ob tac tu'ux yaan Jesuso'.

³⁶tu káat óoltajo'ob ti' ca u cha'a u péedzkabtico'ob quex chéen u chi' u nook; tuláacal le máaxo'ob tu pedzkabtajo'obo', utzchajo'ob.