Read Yucateco San Mateo 15 Bible Online

San Mateo 15 - Yucateco bible

San Mateo 15

¹Tu nadzajuba'ob ti' Jesús dze'edzec fariseob yéetel u ca'anbesajilo'ob le a'almaj t'aano', máaxo'ob Jerusalén u taalo'ob, ca tu káat chi'ito'ob ti':

²¿Ba'axten a aj canbalo'obe' ma' tu beetico'ob ba'ax tu ca'ansaj to'on c úuchben láako'ob? tumen ma' táan u p'o'ico'ob u kabo'ob u ti'al u janalo'ob.

³Jesuse' tu káat chi'itaj ti'ob: ¿Ba'axten te'exe' ma' ta beetique'ex ba'ax cu ya'alic Ku, ba'ale' ca beetique'ex ba'ax tu ya'alaj le úuchben máaco'obo'?

⁴Tumen Kue' tu ya'alaj: Tzic a taata yéetel a maama. Bey xan tu ya'alaj: Máax cu kaakas t'antic u taata wa u maamae' ca quíimic.

⁵Ba'ale' te'exe' ca wa'alique'exe' jun túul máaque' je'el u páajtal u ya'alic ti' u taata wa ti' u maamae': Ma' tu páajtal in wáantiquech, tumen tuláacal ba'al yaan tene' in wa'almaj in dzáic ti' Yuum Ku,

⁶je'el máaxac ca u ya'al beyo' mina'an u yáantic u taata wa u maama. Bey túuno' te'exe' dzo'oc a mixba'alcuntique'ex u ya'almaj t'aan Ku tumen ca beetique'ex ba'ax tu ya'alaj le úuchben máaco'obo'.

⁷¡J ca'a p'éel iche'ex! Utz tu ya'alajilac ta wo'olale'ex aj bóobat Isaías le ca tu ya'alaj beya':

⁸Le máaco'oba' chéen yéetel u bóoxel u chi'ob cu tzijqueno'ob, ba'ale' u pucsi'ikalo'obe' náach yanil ti' teen.

⁹Chéen cunel u kultiqueno'ob, tumen u ca'ansajo'obe' chéen u ca'ansaj máaco'ob.

¹⁰Tu t'anaj túun le máaco'obo' ca tu ya'alaj ti'ob: U'uye'ex ca a na'ate'ex.

¹¹Ma' le ba'ax cu yocol tu chi' máac kascuntico'. Ba'ale' le ba'ax cu jóokol tu chi' máaco' leti' kascuntic.

¹²Le aj canbalo'ob túuno' tu nadzajuba'ob ti' Jesús ca tu ya'alajo'ob ti': ¿A wojel wa túune' le j fariseobo' kuuxilnajo'ob le ca tu yu'ubajo'ob ba'ax ta wa'alajo'?

¹³Ba'ale' leti'e' tu núucaj ti'ob: Tuláacal pakal ma' paka'an tumen in Taata yaan te j ca'ano', bíin jo'ococ pa'ate' yéetel u mootz.

¹⁴P'ate'exo'ob; leti'obe' ch'óopo'ob táan u bisico'ob u láak ch'óopo'ob. Wa jun túul ch'óop cu bisic u láak ch'óope' tu ca'a túulo'ob bíin lúubuco'ob ti' wa ba'ax joolil.

¹⁵Pedroe' tu ya'alaj túun ti' Jesús: Tzool to'on le quet t'aana'.

¹⁶Jesuse' tu ya'alaj ti': ¿Mix te'ex ca na'atique'ex?

¹⁷¿Ma' wa ta na'atique'exe' tuláacal ba'al cu yocol tu chi' máaque' tu nak máac cu bin cu dzo'ocole' cu jóokol ti' le wíinclilo'?

¹⁸Ba'ale' le ba'ax cu jóokol tu chi' máaque' tu pucsi'ikal u taal, leti' túun ba'ax kascuntic máac.

¹⁹Tumen ti' le pucsi'ikal cu jóokol kaakas tuuculil, quíimsaj wíiniquil, nup kebanil, kaakas dzíibolal, oocolil, tuusil yéetel le a'alaj ba'alilo'.

²⁰Leti' le ba'alo'ob kascuntic máaco'; ba'ale' u janal máaque' quex ma' u cháalja'atic u kabe' ma' tu kascuntic máac.

²¹J luk Jesús te'elo' ca j bin tu lu'umil Tiro yéetel Sidón.

²²Jun túul co'olel x cananeail caja'an te'elo' j taal ti' Jesús táan u yawtic: ¡Yuumtzil U Paal David ch'a'aten óotzilil! In x ch'upul paale' yaan jun túul kaakas pixan ti', yéetel jach yaj u mukyaj.

²³Ba'ale' ma' núuca'ab mix ba'al ti' tumen Jesusi'. Le aj canbalo'ob túuno' tu nadzajuba'ob ti' Jesuse' ca tu káat óoltajo'ob ti': Táan óolte, tumen táan u taal u yawat t paach.

²⁴Jesuse' tu ya'alaj túun: Kue' tu túuchi'iten chéen u ti'al u saatal tamanilo'ob u caajil Israel.

²⁵Ba'ale' le co'olelo' tu nadzajubáe' ca xolaj tu táane' ca tu ya'alaj: ¡Yuumtzil, áanteni'!

²⁶Jesuse' tu ya'alaj ti': Ma' utz u lukesa'al u yo'och waaj le paalalo' u ti'al ca dza'abac ti' le peeko'obo'.

²⁷Quex beyo' leti'e' tu ya'alaj ti': Bey, Yuumtzil; ba'ale' tac le peeko'obo' cu jaantico'ob u xéexet'al le waaj cu lúubul yáanal u mayacche' u dzuulilo'obo'.

²⁸Jesús túune' tu ya'alaj ti': ¡Co'olel jach nojoch a wocsaj óolal! Úuchuc le ba'ax a káato'. Ti' le jun súutuco' utzchaj u x ch'upul paal.

²⁹Jesuse' j luk te'elo' ca j máan tu jáal u ka'anabil Galilea; cu dzo'ocole' j na'ac ti' jun p'éel pu'uque' ca j culaji'.

³⁰Ya'ab máaco'ob j kucho'ob tac tu'ux yaan. Táan u taasico'ob móocho'ob, ch'óopo'ob, tooto'ob, nuumo'ob yéetel ya'ab u láak koja'ano'ob, tu dzajo'ob tu táan Jesús leti' túune' tu dzaj u toj óolalo'ob.

³¹Le o'olale' le máaco'obo' ja'ak u yóolo'ob le ca tu yilajo'ob táan u t'aan le tooto'obo', táan u yutztal le nuumo'obo', táan u xíimbal le móocho'obo' yéetel táan u paacat le ch'óopo'obo'. Ca jo'op' u qui'iqui' t'antico'ob u Kuil Israel.

³²Jesuse' tu t'anaj u aj canbalo'obe' ca tu ya'alaj ti'ob: Quin ch'a'ic óotzilil ti' le máaco'oba' tumen dzo'oc óox p'éel kiin yanaco'ob way tin wéetele', cu dzo'ocole' mina'an ba'al u jaanto'ob. Ma' in káat in túuxto'ob tu yotocho'ob x ma' jaanlil, bic lúubuco'ob yéetel wi'ij te j bejo'.

³³U aj canbalo'obe' tu ya'alajo'ob ti': ¿Bix je'el u páajtal c caxtic janal u ti'al tuláacal le máaco'oba' way ti' le cúuchil tu'ux mix máac caja'ana'?

³⁴Jesuse' tu káat chi'itaj ti'ob: ¿Jay p'éel waaj yaan te'ex? Leti'obe' tu núucajo'ob: Siete waajo'ob yéetel dze'edzec mejen cayo'ob.

³⁵Tu túuxtaj túun ca culac lu'um le máaco'obo',

³⁶tu ch'a'aj tu kab le siete waajo'ob yéetel le cayo'obo' ca tu dzaj nib óolal ti' Yuum Ku. Cu dzo'ocole' tu xet'láantaje' ca tu dzáa ti' u aj canbalo'ob, leti'ob túune' tu t'oxláantajo'ob ichil le máaco'obo'.

³⁷Tuláacal jaano'ob ca j na'ajchajo'ob. Cu dzo'ocole' ca tu chupajo'ob siete xaaco'ob yéetel u xéexet'al j p'áato'.

³⁸Le máaxo'ob jaano'obo' míin cuatro mil máaco'ob, ma' xoca'an ichilo'ob le co'olelo'obo' mix le paalalo'obo'.

³⁹Cu dzo'ocole' Jesuse' tu yutzil túuxtaj le máaco'obo', j ooc ti' le cheemo' ca j bin tu lu'umil Magdala.