Read Yucateco San Mateo 16 Bible Online

San Mateo 16 - Yucateco bible

San Mateo 16

¹Fariseob yéetel le j saduceobo' j bino'ob u yilo'ob Jesús, u ti'al u beetico'ob u lúubul ti' wa ba'ax kaasile' tu káatajo'ob ti' ca u ye'es ti'ob jun p'éel u chíiculalil ca'an.

²Ba'ale' leti'e' tu núucaj ti'ob: Ocnaj kiine' te'exe' ca wa'alique'ex: Ma'alob kiin cun u beete tumen chac u nak ca'an;

³ja'atzcab kiine' ca wa'alique'ex: Bejela'e' kaakas kiin cun u beete tumen chac u nak ca'an yéetel noocoy. J ca'a p'éel iche'ex. Te'exe' a wojel a kaj óolte'ex u yich ca'an, ba'ale' ma' a wojel a kaj óolte'ex u chíiculalo'ob le kiino'oba'.

⁴Le kaakas yéetel ma' ocsaj óol máaco'oba' táan u káatico'ob jun p'éel chíiculal; ba'ale' ma' bíin dza'abac ti'ob u láak chíiculal wa ma' chéen u chíiculal Jonás. Tu p'atajo'ob túune' ca j bini.

⁵Le ca j máan le aj canbalo'ob tu táanxel tzéelil le ka'anabo', tu'ub ti'ob u bisico'ob waaj.

⁶Jesuse' tu ya'alaj ti'ob: Ile'ex, canantaba'ex ti' u levadura le fariseob yéetel le saduceobo'.

⁷Le aj canbalo'obo' jo'op' u ya'alico'ob tu baatzilo'ob: táan u ya'alic lela' tumen ma' t taasaj waaji'.

⁸Jesuse' tu kaj óoltaj lela', ca tu ya'alaj ti'ob: ¿Ba'axten ca wa'alique'ex mina'an te'ex waaj? ¡Jach jun p'íit a wocssaj óolale'ex!

⁹¿Láili' ma' ta na'atique'ex, mix tu ka'ajal te'ex le cinco waajo'ob tin t'oxaj ichil cinco mil máaco'obo', jay p'éel xaaco'ob ta li'isaje'exi'?

¹⁰¿Ma' tu ka'ajal te'ex le siete waajo'ob tin t'oxaj ichil cuatro mil máaco'obo', yéetel jay p'éel xaaco'ob ta li'isaje'exi'?

¹¹¿Ba'axten ma' ta na'atique'ex, tene' ma' táan in t'aan tu yo'olal le waaj le ca tin wa'alaj? ca a canantaba'ex ti' u levadura le fariseob yéetel le saduceobo'.

¹²Tu na'atajo'ob túune', Jesuse' ma' tu ya'alaj ti'ob ca u canantuba'ob ti' u levadurail waaji', ba'ale' ti' u ca'ansaj le fariseob yéetel le saduceobo'.

¹³Le ca j kuch Jesús tu lu'umil Cesarea ti' Filipoe', tu káat chi'itaj ti' u aj canbalo'ob: ¿Máax cu ya'alic le máaco'ob u Paal Máac?

¹⁴Leti'obe' tu ya'alajo'ob: Dze'edzeque' cu ya'alico'obe' Juan Bautista; u láako'obe' cu ya'alico'obe' Elías, yaan xan u láako'obe' cu ya'alico'obe' Jeremías wa u láak aj bóobat.

¹⁵Jesuse' tu ya'alaj ti'ob: Cux te'ex ¿Ba'ax ca wa'alique'ex? ¿Máaxen teen?

¹⁶Simón Pedroe' tu ya'alaj túun ti': Teche' leti' le Cristo, u Paal le cuxa'an Kuo'.

¹⁷Jesuse' tu núucaj ti': Qui' a wóol, Simón, u paal Jonás, tumen lela' ma' j e'esa'ab ti' teech tumen mix jun túul máaqui', ba'ale' tumen in Taata yaan te j ca'ano'.

¹⁸Ten túune' quin wa'alic teech; teche' Pedroech, yéetel tu yóokol le cháaltuna' bíin in líikes in Iglesia. Ma' bíin dzáancha'ata'ac mix tumen u páajtalil metnal.

¹⁹Ten quin in dzáa teech u llaveilo'ob u ajawil ca'an; le ba'ax can a kax way yóokolcaabe' yaan u ka'axal xan te j ca'ano', le ba'ax xan can a wach' way yóokolcaabe' yaan xan u wa'ach'al te j ca'ano'.

²⁰Jesús túune' tu kubentaj ti' u aj canbalo'obe' ma' u ya'alico'ob ti' mix máac wa leti' Cristoo'.

²¹Jo'op' túun u tzolic Jesús ti' u aj canbalo'obe' leti'e' yaan u bin Jerusalén, yéetel yaan u beeta'al u sen mukyaj tumen u nuuctaquilo'ob caaj, u nuuctaquil le aj kiino'obo', yéetel u j ca'anbesajili'ob le a'almaj t'aano'. Tu ya'alaj ti'obe' yaan u quíimsa'al, ba'ale' yaan u ca'a púut cuxtal tu yóox p'éel kiin.

²²Pedro túune' tu bisaj jun páayile' ca jo'op' u keyic táan u ya'alic: ¡Ma' u yóoltic Ku, Yuumtzil! ¡Mix bikin ca kuchuc úuchul ti' teech le ba'ala'!

²³Ba'ale' Jesuse' tu sutubáe' ca tu ya'alaj ti' Pedro: ¡Tzelabáa tin táan Satanás tumen teche' t'óochpajlech in ti'al! Teche' ma' ta tuucul je'el bix u tuucul Kue', ba'ale' ca tuucul je'el bix u tuucul máaco'obe'.

²⁴Jesús túune' tu ya'alaj ti' u aj canbalo'ob: Wa yaan máax u káat u tzaypachtene', unaj u tu'ubsicubáa yéetel u ch'a'ic u cruz ca u tzaypachten.

²⁵Tumen le máax u káat u toc u cuxtale', bíin u sate: ba'ale' le máax cu satic u cuxtal tin wo'olale', bíin u toque.

²⁶Tumen ¿Ba'ax u biil ti' máac wa cu náajaltic tuláacal yóokolcaab cu dzo'ocole' cu sa'atal u pixan? ¿Wa buca'aj je'el u bo'otic máac tu yo'olal u pixane'?

²⁷Tumen u Paal Máaque' yaan u taal yéetel u nojbe'enil u Taata bey xan yéetel u ángelo'ob, leti' le kiin túun quéen u bo'ot ti' u jujun túulil le ba'ax u beetmaje'.

²⁸Tu jaajil quin wa'alic ti' te'exe' yaan dze'edzec ti' le yano'ob waya', ma' túun quíimilo'ob wa ma' táanil yaan u yilico'ob u Paal Máac táan u taal tu ajawil.