Read Yucateco San Mateo 17 Bible Online

San Mateo 17 - Yucateco bible

San Mateo 17

¹Cu dzo'ocol u máan seis kiino'obe' Jesuse' tu bisaj Pedro, Jacobo yéetel Juan u yíidzin Jacobo', ca j bin tu juunal yéetelo'ob ti' jun p'éel ca'anal pu'uc.

²Te'elo' jelpaj u chica'anil tu táano'ob. U táan yiche' jo'op' u léenbal je'el bix le kiino', u nooke' sacchaji je'el bix le sáasilo'.

³Leti'obe' tu yilajo'ob xan Moisés yéetel Elías táan u tzicbalo'ob yéetel Jesús.

⁴Pedroe' tu ya'alaj ti' Jesús: Yuumtzil, ¡buca'aj ma'alobil ca p'áataco'on waye', wa a káate' cu páajtal c beetic óox p'éel paselo'ob! jun p'éele' a ti'ali', u láake' u ti'al Moisés u láake' u ti'al Elías.

⁵Ca'aliquil táan u t'aan Pedroe', j pi'ixo'ob tumen jun p'éel sacjome'en múuyal; ti' le múuyalo' jóok jun p'éel t'aan tu ya'alaje': Lela' in yaabilaj Paal, tu yo'olal máax jach qui'imac in wóol. Leti' a wu'uye'ex u t'aan.

⁶Le ca tu yu'ubajo'ob lela', le j canbalo'obo' j noclajo'ob lu'ume' ca jach sajacchajo'ob.

⁷Jesús túune' tu nadzajuba ti'ob, tu péedz kabtajo'obe' ca tu ya'alaj ti'ob: Líikene'ex, ma' a ch'a'ique'ex sajaquil.

⁸Le ca j paacatnajo'obe' mix máac u láak tu yilajo'ob, chéen Jesús.

⁹Ca'aliquil táan u yéemelo'ob ti' le pu'uco', Jesuse' tu ya'alaj ti'ob: Ma' a tzicbaltique'ex ti' mix máac le ba'ax dzo'oc a wilique'exa', p'ate'ex tac quéen ca'a púut cuxlac u Paal Máac ti' ichil le quimeno'obo'.

¹⁰Le aj canbalo'ob túuno' tu káat chi'ito'ob ti' Jesús: ¿Ba'ax ten u aj ca'anbesajilo'ob le a'almaj t'aano' cu ya'alico'ob yaan u taal yáax táanil Elías?

¹¹Jesuse' tu núucaj ti'ob: Tu jaajile' Eliase' yaan u taal yáax táanil, yéetel yaan u nu'ucbesic tuláacal ba'al.

¹²Ten túune' quin wa'alic te'exe' Eliase' dzo'oc u taal, ba'ale' leti'obe' ma' tu kaj óolto'obi', yéetel tu beetajo'ob ti' tuláacal ba'ax tu yóoltajo'ob. Bey xan cun mukyaj u Paal Máac tu kabo'obo'.

¹³Le aj canbalo'ob túuno' tu na'atajo'ob táan u t'aan tu yo'olal Juan Bautista.

¹⁴Le ca j kucho'ob tac tu'ux yaan le máaco'obo', jun túul máaque' tu nadzajubáa ti' Jesús, xolaj tu táane' ca tu ya'alaj ti':

¹⁵Yuumtzil, ch'a'a óotzilil ti' in paal, tumen cu léequel yéetel jach yaj u mukyaj; ya'ab u téenel cu lúubul ich káak wa ich ja'.

¹⁶Tin taasaj ti' a aj canbalo'ob ba'ale' ma' páatji' u dzaquico'obi'.

¹⁷Jesuse' tu ya'alaj: ¡Ma' ocsaj óol yéetel loolob wíinique'ex! ¿Tac ba'ax kiin kabéet in wantal ta wéetele'ex? ¿Tac ba'ax kiin yaan in mukyajtique'ex? Taase'ex way le xi'ipalo.

¹⁸Jesús túune' tu keyaj le kaakas pixano' ca tu beetaj u jóokol ti' le xi'ipalo' máax utzchaj ti' le jun súutuco'.

¹⁹Cu dzo'ocole' le aj canbalo'obo' j t'aanajo'ob jun páayil yéetel Jesús ca tu káat chi'ito'ob ti': ¿Ba'axten to'one' ma' páatji' c jóokesic le kaakas pixano'?

²⁰Jesuse' tu ya'alaj ti'ob: Tumen te'exe' jach jun p'íit a wocsaj óolale'ex. Tu jaajil quin wa'alic te'exe', wa yaan a wocsaj óolale'ex quexi' bey jun p'éel u neek mostazae', je'el a wa'alique'ex ti' le pu'uca': Lukesabáa te'ela' xeen táaxel tu'ux; le pu'uco' yaan u lukul. Tuláacal ba'al je'el u páajtal a beetique'ex wa yaan a wocsaj óolala'ex.

²¹Ba'ale' le kaakas pixano'ob beyo'oba', chéen yéetel payalchi' yéetel su'ukin cu páajtal u jóoksa'alo'ob.

²²Ca'aliquil táan u múuch' máano'ob tu lu'umil Galileae', Jesuse' tu ya'alaj ti'ob: U Paal Máaque' yaan u ku'ubul tu kab máaco'ob,

²³yéetel yaan u quíimsa'al, ba'ale' yaan u ca'a púut cuxtal tu yóox p'éel kiin. Jach okomchaj u yóolo'ob tu yo'olal le ba'ax a'ala'ab ti'oba'.

²⁴Le ca j kuch Jesús yéetel u aj canbalo'ob tu caajil Capernaume', le máaxo'ob cu kamico'ob le patano'ob u ti'al le kulnajo' j bino'ob u yilo'ob Pedroe' ca tu káat chi'ito'ob ti': ¿A aj ca'anbesaje'exe' ma' tu bo'otico'ob patano'ob u ti'al kulnaj?

²⁵Pedroe' tu núucaj: Cu bo'otic. Le ca j ooc Pedro ich naje', Jesuse' j t'anaj táanil táan u ya'alic ti': ¿Bix a wilic, Simón? ¿U ajawo'ob yóokolcaabe', máax ti'ob cu tzáico'ob le patano' yéetel le u láak bo'olalo'obo': ti' u yéet caajalo'ob wa ti' le táanxel lu'umilo'obo'?

²⁶Pedroe' tu núucaj ti': ti' le táanxel lu'umo'obo'. Jesuse' tu ya'alaj ti': U yéet caajalo'ob túune' ma' kabéet u bo'olalo'obi'.

²⁷Ba'ale' u ti'al ma' c beetic u kuuxil mix máaque', xeen te j ka'anabo', pul a x lutzube' ca a jóokes le yáax cay cun lúubulo'. Tu chi'e ti' can a wil jun p'éel taakin je'el u chúucpajal u ti'al a bo'otic in patan yéetel a ti'ale'; bise ca a bo'ote.