Read Yucateco San Mateo 18 Bible Online

San Mateo 18 - Yucateco bible

San Mateo 18

¹Ti' le kiino' le aj canbalo'obo' tu nadzajuba'ob ti' Jesuse' ca tu káat chi'itajo'ob ti': ¿Máax u asab nojochil tu ajawil ca'an?

²Jesuse' tu t'anaj túun jun túul chaan xi'ipale', tu dzaj chúumuc ti'obe',

³ca tu ya'alaj: Tu jaajil quin wa'alic ti' te'exe', wa te'ex ma' ta kexic a tuucule'ex ca beychajque'ex je'el bix mejen paalalo'obe', ma' bíin ocoque'ex tu ajawil ca'ani'.

⁴Bey túuno', u asab nojochil tu ajawil ca'ane' leti' le máax cu chichancunticubae' yéetel cu béeytal bey le chan xi'ipala'.

⁵Le máax cu kamic tin kaaba' jun túul chan xi'ipal je'el bix lela', teen cu kamiquen.

⁶Je'el máaxac ca u beet u lúubul ti' keban jun túul ti' le mejen paalalo'ob u yoquesmaj u yóolo'ob ti' teno', asab ma'alob ti' ca bu'uluc tu taamil ka'anab yéetel jun p'éel u tuunichil juch' kaxa'an tu caal.

⁷¡Buca'aj kaasil u ti'al yóokolcaab ca yanac ba'alo'ob cu beetic u kebantal máac! Mantadz cu bin antal, ba'ale' ¡óotzil le máac cu beetic u yantalo'!

⁸Le o'olale', wa a kab wa a wooc cu beetic a lúubul ti' kebane', xot'e, pul náachil; tumen asab ma'alob ca ocoquech ti' le cuxtal nuumech wa móochech, wa ma' ca pulquech metnal chuca'an ca'a p'éel a kab wa ca'a p'éel a wooc.

⁹Wa a wich cu beetic a lúubule', jóoye ca a puul náachil; tumen asab ma'alob ca ocoquech ti' le cuxtal chéen yéetel jun p'éel a wicho', wa ma' ca pu'ulquech metnal chuca'an ca'a p'éel a wich.

¹⁰Ma' a cúulpachcuntique'ex mix jun túul ti' le mejen paalalo'oba'. Tumen quin wa'alic te'exe' te j ca'ano' u ángelo'obe' ti' yano'ob mantadz tu táan in Taata yaan te j ca'ano'.

¹¹Tumen u Paal Máaque' taal u toc le ba'ax saatalo'.

¹²¿Bix a wilique'ex? Wa jun túul máac yaan cien j tamano'ob ti'e' wa ca sa'atac jun túul ti'obe', ¿ma' wa cu p'atic le noventa y nueve te j pu'uco' u ti'al ca xi'ic u caxant le j sa'ato'?

¹³Wa ca u dzáa utz ti' ca u caxante', quin tuclique' asab cun qui'imactal u yóol tu yo'olal le jun túulo' ma' tu yo'olal le noventa yéetel nueve ma' j sa'ato'obo'.

¹⁴Bey xan a Taataex yaan te j ca'ano' ma' u káat ca sa'atac mix jun túul ti' le mejen paalalo'oba'.

¹⁵Wa a sucu'un cu beetic teech wa ba'ax kaase', t'aanen tu yéetel ta juunale'ex ca a beet u kaj óoltic le ba'ax kaas tu beetajo'. Wa cu yu'ubic a t'aane' dzo'oc a caxtic jéedzel yéetel a sucu'un.

¹⁶Ba'ale' wa ma' tu yu'ubaj a t'aane', t'an u láak jun túul wa ca'a túul máac, u ti'al beyo' tuláacal tac poole' ca jaajcunta'ac tumen ca'a túul wa óox túul máac.

¹⁷Wa ma' tu yu'ubic u t'aan mix leti'obe', a'al ti' u múuch'ul le j ocsaj óolalo'obo'; wa ma' tu yu'ubic u t'aan mix u múuch'ul le j ocsaj óolalo'obo', pact túun bey jun túul máac ma' tu yocsaj óoltic Kue', wa bey jun túul j kam patano'obo'.

¹⁸Tu jaajil quin wa'alic te'exe' je'el ba'alac ca a kaxe'ex way yóokolcaabe' yaan u ka'axal xan te j ca'ano', je'el ba'alac xan ca a wach'e'ex way yóokolcaabe' yaan u wa'ach'al xan te j ca'ano'.

¹⁹Bey xan quin wa'alic te'exe' wa ca'a túul ti' te'ex cu múuch' tucultico'ob way yóokolcaab u káatico'ob wa ba'ax ich payalchi'e' yaan u dza'abal ti'ob tumen in Taata yaan te j ca'ano'.

²⁰Tumen tu'ux yaan ca'a túul wa óox túul much'ucbal tin kaaba'e', ti' yanen chúumuc ti'obe'.

²¹Pedro tu nadzajubae' ca tu káat chi'itaj ti' Jesús: ¿Yuumtzil, jay téen unaj in sa'atsic in sucu'un cu beetic ten wa ba'ax kaasil? ¿Tac siete u téenel?

²²Jesuse' tu núucaj ti': Ma' tin wa'alic teech tac siete u téenel, ba'ale' tac setenta u téenel siete.

²³Le o'olale', u ajawil ca'ane' bey jun túul ajaw tu yóoltaj u tzáa u p'ax u palitzilo'obe'.

²⁴Táan u cáajsic u tzáique' ca j taasa'ab tu táane' jun túul palitzil u p'axmaj jach táaj ya'ab taakin.

²⁵Tumen le j palitzil ma' páatchaj u bo'otico', u dzuulile' tu ya'alaj ca co'onoc leti' u yatan yéetel u paalal, bey xan tuláacal ba'ax yaan ti' u ti'al ca bo'ota'ac le p'aaxo'.

²⁶Le j palitzil túuno' xolaj tu táan u dzuulile' ca tu káat óoltaj: In taata beet utz a pa'atic je'el in bo'otic teech tuláacale'.

²⁷U dzuulile' tu ch'a'aj óotzilil ti'e', ca tu sa'atsaj tuláacal u p'aaxe' ca tu jáalkabtaj.

²⁸Ba'ale' le ca jóok le palitzila' ca tu yilaj u láak u yéet palitzil máax p'axmajil jun p'íit taakin ti'. Tu machaje', ca jo'op' u bidzic u caal táan u ya'alic: ¡Bo'ot ten a p'aaxo'!

²⁹Le u yéet palitzil túuno' xolaj tu táane' ca tu káat óoltaj ti': Beet utz a pa'atic, je'el in bo'otic teech tuláacale'.

³⁰Ba'ale' le u láako' ma' tu yóoltaji', ca tu túuxtaj kalbil tac quéen u láaj bo'ot u p'aax.

³¹Le u láak palitzilo'obo', le ca tu yilajo'obe jach yaaji tu yóolo'ob ca j bino'obe' ca tu tzicbaltajo'ob ti' u dzuulilo'ob le ba'ax úucha'.

³²Le dzuul túuno' tu túuxtaj t'anbil le palitzila' ca tu ya'alaj ti': ¡Kaakas palitzil! Tene' tin sa'atsaj teech tuláacal a p'aax tumen ta káat óoltaj ten.

³³Teech xane' unaj ca'ach a ch'a'ic óotzilil ti' a wéet palitzilo' je'el bix tin ch'a'ajilac óotzilil ti' techo'.

³⁴Le dzuulo' jach kuuxilnaje' ca tu túuxtaj jadzbil tac quéen u bo'ot tuláacal u p'aax.

³⁵Jesuse' tu dzo'ocsaj u ca'ansaj táan u ya'alic: Bey xan cun u beet ta wéetele'ex in Taata yaan te j ca'ano' wa ma' ta sa'atsique'ex yéetel tuláacal a pucsi'ikale'ex u si'ipilo'ob a sucu'une'ex.