Read Yucateco San Mateo 20 Bible Online

San Mateo 20 - Yucateco bible

San Mateo 20

¹U ajawil ca'ane' je'el bix u yuumil jun p'éel cajtalil jóok jach ja'atzcab kiin u ti'al u caxant j meyajo'ob u ti'al ca u yuxo'ob yich u pakal uva.

²Tu ya'alaj u bo'otic ti'ob jun p'éel denario tu yo'olal jun p'éel kiin meyaj ca tu túuxtajo'ob jooch.

³Cu dzo'ocole' jóok míin láas nueve kiine' ca tu yilaj u láak máaco'ob ti' yano'ob kíiwique' tumen mina'an meyaj ti'ob.

⁴Ca tu ya'alaj ti'ob: Xene'ex tac te'ex meyaj ichil in pakalo'ob, cu dzo'ocole' je'el in dzáic te'ex le buca'aj unaj in bo'otic te'exe'. Ca j bino'ob.

⁵Le dzuulo' jóok tu ca'a téen míin chúumuc kiin, bey xan míin las tres u binbal kiine', ca tu beetaj láili' beyo'.

⁶Míin las cinco ocnaj kiine' jóok tu ca'a téen te j kíiwico' ca tu yilaj u láak máaco'ob yano'ob te'elo' mina'an meyaj ti'ob, ca tu ya'alaj ti'ob: ¿Ba'axten way yane'ex bul kiin x ma' meyajile'?

⁷Tu ya'alajo'ob: Tumen mix máac t'ano'on meyaj. Tu ya'alaj túun ti'ob: Xene'ex tac te'ex meyaj ichil in pakalo'ob, cu dzo'ocole' je'el in dzáic te'ex le buca'aj unaj in bo'otic te'exe'.

⁸Le ca j áakabchaje', le dzuulo' tu ya'alaj ti' le máax ilic le meyajo': T'aan le j meyajo'obo' ca a bo'oto'ob, cáajes yéetel le máaxo'ob j ooco'ob tu dzo'oco' ca a dzo'oques yéetel le máaxo'ob j ooco'ob táanilo'.

⁹J taalo'ob túun le máaxo'ob j ooco'ob meyaj míin las cinco ocnaj kiine' ca tu kamo'ob u bo'olil jun p'éel túulis kiin meyaj, lela' jun p'éel denario.

¹⁰Cu dzo'ocole' le ca j taalo'ob le máaxo'ob ooco'ob táanilo', tu tucultajo'ob asab ya'ab cun u kamo'obi'; ba'ale' tu kamajo'ob chéen xan jujun p'éel denario.

¹¹Le ca tu kamajo'obe' jo'op' u tututcchi'ob ti' u yuumil le meyajo',

¹²tu ya'alajo'ob: Lelo'ob j kucho'ob tu dzo'oca' chéen jun p'éel hora meyaj tu beetajo'ob cu dzo'ocole' ta bo'otajo'ob láili' je'el bix ta bo'otajo'on to'ono' máaxo'on t mukyajtaj u meeyjul yéetel u yoxowil jun p'éel túulis kiin.

¹³Ba'ale' le dzuulo' tu núucaj ca tu ya'alaj ti' jun túul ti'obi': In wéet óol, ma' táan in beetic teech mix jun p'éel ba'al kaas. ¿Ma' wa ta éejemtaj a náajaltic jun p'éel denario tu yo'olal jun p'éel kiin meyaji'?

¹⁴Ch'a'a a bo'olale' ca xi'iquech. Tene' in káat in bo'ot le máax j ooc meyaj tu dzo'oco' je'el bix in bo'otiqueche',

¹⁵¿ma' wa tu páajtal in beetic je'el ba'alac in káat yéetel in taakine'? ¿Wa cu yaatal a wóol tumen tene' utz in pucsi'ikal?

¹⁶Bey túuno' le máaxo'ob paachil yano'obo' bíin máanaco'ob táanil, yéetel le máaxo'ob yano'ob táanile' bíin máanaco'ob paachil. Tumen ya'ab le máaxo'ob t'ana'ano'obo', ba'ale' jun p'íit le máaxo'ob yéeya'ano'obo'.

¹⁷Le ca tu ch'a'aj Jesús u bejil Jerusalene', tu bisaj jun páayil u doce aj canbalo'obe' ca tu ya'alaj ti'ob:

¹⁸Je'el bix a wilique'exo' táan c bin Jerusalén tu'ux bíin ku'ubuc u Paal Máac tu kab u nuuctaquil le aj kiino'obo' yéetel tu kab u aj ca'anbesajilo'ob le a'almaj t'aano', máaxo'ob cun xot' kiintic u ti'al ca quíimsa'ac;

¹⁹cu dzo'ocole' cu kubico'ob ti' táanxel lu'umilo'ob u ti'al ca u p'a'asto'ob, ca u ja'ajadzo'ob, yéetel ca u sino'ob ti' cruz; ba'ale' yaan u ca'a púut cuxtal tu yóox p'éel kiin.

²⁰Tu nadzajubáa túun ti' Jesús u maama Jacobo yéetel Juan, u paalal Zebedeo, jun múuch' yéetelo'obe', j xolaj tu táan Jesús u ti'al u káatic jun p'éel ba'al ti'.

²¹Jesuse' tu káat chi'itaj: ¿Ba'ax a káati'? Leti'e' tu ya'alaj: A'al ca culac le in ca'a túul paalalo'oba' jun túule' ta x no'oj, u láake' ta x dzíic, te ta ajawilo'.

²²Ba'ale' Jesuse' tu núucaj ti'ob: Te'exe' ma' a wojele'ex ba'ax ca káatique'exi'. ¿Cu páajtal wa a wukique'ex le ukul bíin in wuko', yéetel a kamique'ex le ocja' bíin in kamo'? Leti'obe' tu ya'alajo'ob: C páajtal.

²³Leti'e' tu ya'alaj ti'ob: Tu jaajile' te'exe' yaan a wukique'ex le ukul bíin in wuko' yéetel yaan a kamique'ex le ocja' bíin in kamo'; ba'ale' le a cuxtale'ex tin x no'oj wa tin dzíico' ma' teen máax dzáiqui', ba'ale' le cúuchilo'oba' nu'ucbesa'an tumen in Taata u ti'al dzaabil ti' le máaxo'ob bíin dza'abaco'.

²⁴Le u láak diez aj canbalo'obo', le ca tu yu'ubajo'obe' j kuuxchajo'ob ti' le ca'a túul sucu'untzilo'oba'.

²⁵Ba'ale' j t'aano'ob tumen Jesuse' ca j a'ala'ab ti'ob: Je'el bix a wojelile'exe', u nuuctaquil le caajo'obo' cu béeytalo'ob bey dzuulo'ob tu yóokolo'obe' yéetel le u nuuctaquil ichilo'obo' cu ye'esico'ob u páajtalil tu yóokolo'ob.

²⁶Ba'ale' ichile'exe' ma' bey cun úuchuli'. Tumen le máax u káat u beet u nojochil ichile'exe', unaj u meyajtic le u láako'obo';

²⁷je'el máaxac ti' te'ex u káat u táanilcuntubáe' unaj u palitzilta'al tumen le u láako'obo'.

²⁸Bey je'el bix u Paal Máac ma' j taal u ti'al ca meyajta'aqui', ba'ale' u ti'al u meyajtic máac, yéetel u ti'al u dzáa u cuxtal bey jun p'éel bo'ol u ti'al u jáalkabta'al ya'abcach máaco'obe'.

²⁹Ca'aliquil táan u jóokolo'ob tu caajil Jericoe' ya'abcach máaco'ob j bino'ob tu paach Jesús.

³⁰Te'elo' yaan ca'a túul ch'óopo'ob culucbalo'ob tu tzéel le bejo'; le ca tu yu'ubajo'ob táan u máan Jesuse' tu yawtaj: ¡Yuumtzil, u Paal David, ch'a'a to'on óotzilil!

³¹J ke'eyo'ob tumen le máaco'obo' u ti'al ca u mac u chi'ob, ba'ale' leti'obe' asab ka'am tu yawto'ob: ¡Yuumtzil, u Paal David, ch'a'a to'on óotzilil!

³²Je'el túun Jesuse', tu t'anaj le ch'óopo'obo' ca tu káat chi'itaj ti'ob: ¿Ba'ax a káate'ex ca in beet ti' te'ex?

³³Leti'obe' tu núucajo'ob ti': Yuumtzil, ca yanac u sáasil c ich.

³⁴Jesús túune' tu ch'a'aj óotzil ti'obe' ca tu péedzkabtaj u yicho'ob. Ti' le jun súutuco' le ch'óopo'obo' yanji u sáasil yicho'obe' ca j bino'ob tu paach Jesús.