Read Yucateco San Mateo 21 Bible Online

San Mateo 21 - Yucateco bible

San Mateo 21

¹Le ca j náadzo'ob Jerusalén ca j kucho'ob tu caajil Betfagé, tu chuun u pu'uquil le Olivo'obo', Jesuse' tu túuxtaj ca'a túul u aj canbalo'obe',

²ca tu ya'alaj ti'ob: Xene'ex ti' le cajtalil yaan te actáano'. Te can a wile'ex jun túul burra kaxa'ani' yéetel jun túul chan burro yaan tu yicnal. Wach'e'ex ca taase'exo'ob ti' teen.

³Wa yaan máax cu ya'alic ti' te'ex wa ba'axe', a'ale'ex ti'e' kabéeto'ob ti' Yuumtzil, séeba'an cun u sutilo'ob.

⁴Lela' j úuche' u ti'al ca dzo'ocpajac ba'ax tu ya'alaj le aj bóobato', le ca tu dzíibtaj:

⁵A'ale'ex ti' u caajil Sión: Ile, a ajawe' táan u taal ti' teech cabal u yóol, u nat'maj jun túul burra, yéetel jun túul chan burro, u yaal jun túul ba'alche' cu cuuch.

⁶J bino'ob túun le aj canbalo'obo' ca tu beetajo'ob je'el bix a'ala'ab ti'obo'.

⁷Tu taasajo'ob le burra yéetel u yaalo' ca tu dzajo'ob nooko'ob tu yóokole', ca j na'at' tumen Jesús.

⁸Le ya'abcach máaco'obo'. Tu jayláanto'ob u nooko'ob tu yóokol le bejo'; u láako'obe' tu ch'a'aclanto'ob u kab che'obe' ca tu dzaalanto'ob te j bejo'.

⁹Le máaco'ob cu bino'ob táanilo' bey xan le cu taalo'ob paachilo' jo'op' u yawtico'ob: ¡Nojbe'enil ti' u Paal David! ¡Qui'iqui' t'antbil máax cu taal tu kaaba' Yuumtzil! ¡Nojbe'enil ti' Yuum Ku!

¹⁰Le ca j ooc Jesús Jerusalene' wóoch'lantáanbanaj tuláacal le caajo', ya'ab máaxo'ob tu káat chi'itajo'ob: ¿Máax lela'?

¹¹Le máaco'obo' tu núucajo'ob: Lela' leti' le aj bóobat Jesuso', le máax Nazaretile' tu lu'umil Galilea.

¹²Cu dzo'ocole' Jesuse' j ooc tu kulnaj Kue' ca tu jóokesaj tuláacal le máaxo'ob cu coonolo'ob yéetel cu máano'ob te'elo'. Tu walkesaj u mesaob le máaxo'ob cu kexico'ob taakino', tu walkesaj xan u káanche' le máaxo'ob cu conico'ob palomaobo';

¹³ca tu ya'alaj ti'ob: Le Quili'ich Dzíibo' cu ya'alic: In wotoche' yaan u kaaba'inta'al u najil payalchi'; Ba'ale' te'exe' dzo'oc a sutique'ex u cúuchil j oocolo'ob.

¹⁴Tu nadzajuba'ob ti' Jesús te j kulnajo', dze'edzec ch'óopo'ob yéetel móocho'ob, leti' túune' tu dzaj u toj óolalo'ob.

¹⁵Ba'ale' u nuuctaquil le aj kiino'ob yéetel u aj ca'anbesajilo'ob le a'almaj t'aano' le ca tu yilajo'ob le chíiculalo'ob cu beetico', yéetel ca tu yu'ubajo'ob táan u yawato'ob le mejen paalalo'ob te j kulnaj táan u ya'alico'ob: ¡Nojbe'enil ti' u Paal David! j kuuxilnajo'obe'

¹⁶ca tu ya'alajo'ob ti' Jesús: ¿Táan a wu'uyic ba'ax cu ya'alico'ob lelo'oba'? Jesuse' tu núucaj ti'ob: Bey táan in wu'uyic. Ba'ale' ¿ma' wa a xocmaje'ex le Quili'ich Dzíib tu'ux cu ya'ala'al le ba'ax cu yúuchula'? Cu ya'alic beya': ¡Ta beetaj u jóokol qui'iqui'i kayo'ob tu chi' le mejen paalalo'obo' yéetel tu chi' le cu chu'ucho'obo'!

¹⁷Tu p'atajo'ob túune' ca j bin tu caajil Betania tu'ux tu máansaj áakab.

¹⁸Le ca j suunaj Jesús Jerusalén tu ja'atzcabile', tu yu'ubaj wi'ij.

¹⁹Tu yilaj jun cúul higuera tu tzéel le bejo' ca tu nadzubai', ba'ale' ma' tu caxtaj mix jun p'éel u yichi', chéen le'ob. Jesús túune' tu ya'alaj ti' le higuerao': ¡Mix bikin ca ichnaquech tu ca'a ten! Tu séeblanquil j tij le higuerao'.

²⁰Le j canbalo'obo', le ca tu yilajo'obe', ja'ak u yóolo'ob ca tu káat chi'itajo'ob ti' Jesús: ¿Bix úuchic u tijil séeba'an le higuerao'?

²¹Jesuse' tu núucaj ti'ob: Tu jaajil quin wa'alic te'exe' wa yaan a wocsaj óolale'exe' yéetel wa mina'an ca'a p'éel óolal ti' te'exe', ma' chéen cu páajtal a beetique'ex le ba'ax tin beetaj yéetel le higueraa', ba'ale' je'el a wa'alique'ex ti' le witzo': Tzelabáa te'ela', pulabáa ka'anab: bey cun úuchulo'.

²²Yéetel je'el ba'alac ca a káate'ex ich payalchi'e', wa ca ocsaj óoltique'exe', yaan a kamique'ex.

²³Cu dzo'ocole', Jesuse' j ooc kulnaj. Ca'aliquil táan u ca'ansaj te'elo', tu nadzajuba'ob ti'e' u nuuctaquil le aj kiino'obo' yéetel u nuuctaquil le judíobo' ca tu káat chi'itajo'ob ti': ¿Yéetel ba'ax páajtalil ca beetic le ba'alo'oba'? ¿Máax dzáa teech le páajtalila'?

²⁴Jesuse' tu núucaj ti'ob: Bey xan teen bíin in ca'aj in káat chi'it te'ex jun p'éel ba'al: Wa ca núuquique'exe', teen xane' quin wa'alic ti' te'ex yéetel ba'ax páajtalil quin beetic le ba'alo'oba'.

²⁵¿Máax túuxt Juan u ti'al u dzáa ocja'? ¿Ku túuxte wa máaco'ob? Ba'ale' jo'op' u ba'atel t'aano'ob tu baatzilo'ob táan u ya'alico'ob: Wa c a'alic Ku túuxte' je'el u núuquic to'one' ¿ba'axten túun ma' ta wocsaj óolte'exi'?

²⁶Wa c a'alic chéen máaco'ob túuxte', sajaco'on ti' le máaco'oba'; tumen tuláacalo'ob ocsaj óoltique' Juane' jun túul aj bóobat.

²⁷Bey túuno' tu ya'alajo'ob ti' Jesús: Ma' c ojeli'. Leti' túune' tu ya'alaj ti'ob: Mix xan teen quin wa'alic te'ex yéetel ba'ax páajtalil quin beetic le ba'alo'oba'.

²⁸Jesuse' tu ya'alaj ti'ob: ¿Ba'ax ca wa'alique'ex tu yo'olal le ba'ala'? Jun túul máaque' yanji ca'a túul u paalal; ca tu ya'alaj ti' jun túul ti' leti'obe': In paal, xeen meyaj ichil in paakal uvaob.

²⁹Le paalo' tu núucaj ti': Ma' in káati'. Ba'ale' cu dzo'ocole' tu kexaj u tuucule' ca j bin meyaj.

³⁰Le taatatzil túuno' bin u yil le u láako' ca tu ya'alaj láili' le ba'ax tu ya'alaj ti' le yáaxo'; lela' tu núucaj: ma'alob taat, je'el in bine', ba'ale' ma' j bini'.

³¹¿Máacal máac ti' le ca'a túul tu beetaj ba'ax u káat u taataobo'? Leti'obe' ca tu ya'alajo'ob: Le yáaxo'. Jesús túune' tu ya'alaj ti'ob: Tu jaajil quin wa'alic ti' te'exe' le j kam patano'ob yéetel le x cáacbacho'obo' yaan u yoclo'ob tu ajawil Ku táanil ti' te'ex.

³²Tumen Juan Bautistae' j taal u ca'anse'ex bix unaj a cuxtale'ex ba'ale' te'exe' ma' ta wocsaj óolte'exi'; ba'ale' le j kam patano'ob yéetel le x cáacbacho'obo' tu yocsaj óoltajo'ob. Te'ex túune' quex ta wilaje'exe' ma' ta kexaj a tuucule'ex u ti'al ca a wocsaj óolte'exi'.

³³U'uye'ex le u láak quet t'aana': U yuumil jun p'éel cajtalile' tu paakaj uvaob tu lu'um, ca tu cotaj u bakpach; tu beetaj xan u cúuchil tu'ux u ye'edzel u kab le uvaobo', yéetel jun p'éel ca'anal cúuchil u ti'al u yantal máax canantic le pakalo'. Cu dzo'ocole' tu dzaj majnil le lu'um ti' dze'edzec j meyajo'obo' ca j bin náachil.

³⁴Le ca j kuch u kiinil u yéemsa'al u yich le pakalo', tu túuxtaj dze'edzec palitzilo'ob u ti'al u káatico'ob ti' le j meyajo'obo' le jaatz cu ti'alintico'.

³⁵Ba'ale' le j meyajo'obo' tu machajo'ob le j palitzilo'obo' tu jatzo'ob jun túuli', tu quíimsajo'ob u láak, yéetel u láake' tu muruxtuntajo'ob.

³⁶Le u yuumilo' tu túuxtaj u láak palitzilo'ob asab ya'ab ti' le tu yáax túuxtajo'; ba'ale' le j meyajo'obo' queet tu beetajo'ob ti'ob je'el bix ti' le yáaxo'obo'.

³⁷Tu dzooque' tu túuxtaj u paal, tumen tu tucultaje': Yaan u tziquico'ob in paal.

³⁸Ba'ale' le ca tu yilajo'ob le paalo', le j meyajo'obo' tu ya'alajo'ob tu baatzilo'ob. Lela' leti' le máax cun ti'alintic le lu'uma', co'ox quíimsic u ti'al ca p'áatac to'on.

³⁹Bey túuno' tu machajo'obe', tu jóokesajo'ob paachil ti' le lu'umo' ca tu quiimsajo'ob.

⁴⁰Jesús túune' tu káat chi'itaj ti'ob: Le quéen suunac u yuumil le lu'umo' ¿ba'ax cun u beet ti' le j meyajo'obo'?

⁴¹Tu ya'alajo'ob ti': Bin u ca'aj u quíims x ma' ch'a'a óotzilil le loolob máaco'obo' yéetel bin u ca'aj u dzáa le lu'umo' ti' u láak meyajo'ob, máaxo'ob je'el u kubico'ob tu kiinil le jun jaatz u yich le pakal cu ti'alintico'.

⁴²Jesuse' tu ya'alaj ti'ob: ¿Mix jun téen a xocmaje'ex le Quili'ich Dzíibo'? Cu ya'alic beya': Le tuunich p'ecta'ab tumen le j pakbalo'obo', j kuch u beet u noj tuunichil le chuun pako'. Lela' j beeta'ab tumen Yuumtzil. To'one' c ilic bey jun p'éel jakbe'en ba'ale'.

⁴³Le o'olal quin wa'alic ti' te'exe' bin u ca'a j lukesbil ti' te'ex u ajawil Ku u ti'al ca dza'abac ti' le máaco'ob je'el u kubico'ob le u yich cu ti'alintic le ajawilo'.

⁴⁴Le máax bíin lúubuc tu yóokol le tuunicha' bíin xe'exet'a'ac, ba'ale' wa le tuunich cu lúubul yóokol wa máaxo', lela' bíin xiixcunta'ac.

⁴⁵U nuuctaquil le aj kiino'obo', yéetel le j fariseobo' le ca tu yu'ubajo'ob le quet t'aano'ob cu ca'ansic Jesuso', tu na'atajo'ob táan u ya'alic tu yo'olalo'ob.

⁴⁶Tu yóoltajo'ob túun u macho'ob ba'ale' sajacchajo'ob ti' le máaco'obo', tumen le máaco'obo' u dzaama tu yóolo'obe' Jesuse' jun túul aj bóobat.