Read Yucateco San Mateo 23 Bible Online

San Mateo 23 - Yucateco bible

San Mateo 23

¹Tu y a'alaj túun Jesús ti' le máaco'obo' yéetel ti' u aj canbalo'ob:

²U aj ca'anbesajilo'ob le a'almaj t'aano' yéetel le fariseobo' cu tucultico'ob yaan páajtalil ti'ob u ti'al u ya'alico'ob ba'ax cu ca'ansic u ya'almaj t'aan Moisés.

³Le o'olale', u'uye'ex u t'aano'ob yéetel beete'ex tuláacal ba'al ca u ya'alo'ob te'ex; ba'ale' ma' a beetique'ex ba'ax cu beetico'ob, tumen leti'obe' cu ya'alico'ob jun p'éel ba'ale' cu dzo'ocole' cu beetico'ob yaanal ba'al.

⁴Cu kaxico'ob cucho'ob jach táaj aaltac ma' tu páajtal u bisa'al, cu dzo'ocole' cu beetico'ob ca cu'uchuc tumen máaco'ob; ba'ale' leti'obe' ma' u káato'ob mix u péedzkabto'ob mix yéetel u yaal u kabo'obi'.

⁵Tuláacal cu beetico'ob u ti'al ca ila'aco'ob tumen máaco'ob. Utz tu t'aano'ob u bisico'ob tu táanil u poolo'ob yéetel tu kabo'obe' u xóoxot'al le Quili'ich Dzíib dzíibta'an ti' cóochtac tzitzilal nooko'ob, yéetel u chowaccuntico'ob u nooko'ob asab ti' u láak máaco'obo'.

⁶U káato'ob yantal ti' u asab ma'alobil cúuchilo'ob te tu'ux cu yúuchul janalo' bey xan tu káanche'ilo'ob nojbe'enil te tu'ux te j sinagogaobo'.

⁷yéetel u káato'ob ca tzi'iquico'ob tumen máaco'ob te j bejo'obo' yéetel ca a'ala'ac aj ca'anbesaj ti'ob.

⁸Ba'ale' te'exe' ma' a wóoltique'ex ca a'ala'ac te'ex j ca'anbesaj tumen máaco'ob, tumen te'exe' láaj sucu'untzile'ex yéetel yaan te'ex chéen jun túul j ca'anbesaj, leti' le Cristoo'.

⁹Yéetel ti' mix máac a wa'alique'ex taata way yóokolcaabe', tumen yaan te'ex chéen jun túul Taata, Leti' le máax yaan te j ca'ano'.

¹⁰Mix a wóoltique'ex ca a'ala'ac j nojoch ti' te'ex, tumen chéen Cristo a j nojoche'ex.

¹¹Le máax cu meyajtic u láako'obo' leti' u asab nojochil ichile'ex.

¹²Tumen le máax cu ca'analcuntic u yóole' bíin cabalcunta'ac u yóol, ba'ale' le máax cu cabalcuntic u yóole' bíin ca'analcunta'ac u yóol.

¹³¡Óotzile'ex, u ca'anbesajile'ex a'almaj t'aan yéetel fariseoex j ca'a p'éel iche'ex! tumen ca kalique'ex u jool najil u ajawil ca'an u ti'al ma' u yocol u láako'ob. Mix te'ex ca wocle'exi', mix ca cha'ique'ex u yoclo'ob le máaxo'ob u káato'ob oclo'.

¹⁴¡Óotzile'ex u j ca'anbesajile'ex a'almaj t'aan yéetel fariseoex j ca'a p'éel iche'ex! Tumen ca lu'usique'ex u yotoch le x quimen íichamo'obo', cu dzo'ocole' u ti'al a balique'exe' ca beetique'ex chowac payalchi'ob. Tu yo'olal lela' asab nojoch jaadz can a bise'ex.

¹⁵¡Óotzile'ex u j ca'anbesajile'ex a'almaj t'aan yéetel fariseoex, j ca'a p'éel iche'ex! Te'exe' ca máane'ex lu'um yéetel ka'anab u ti'al a beetique'ex u yocsaj óolal jun túul máac je'el bix a wocsaj óolale'ex te'exo', le quéen ocsaj óolnaque' ca beetique'ex u najmatic metnal le máaco' ca'a téen asab ti' te'ex.

¹⁶¡Óotzile'ex ch'óop j nu'uctaj beele'ex! Ca wa'alique'ex: wa máax tu kaaba' le kulnaj cu ya'alic u beetic wa ba'axe', lelo' mix ba'al u biilal; ba'ale' wa tu kaaba' le oroo' yaan te j kulnaj cu ya'alic u beetic wa ba'axo', lelo' cu kaxic u t'aan.

¹⁷¡J ma' na'ate'ex yéetel ch'óope'ex! ¿Máacalmáac u asab nojochil ti' lelo'oba': le oroo' wa le kulnaj cu beetic u quili'ichtal le oroo'?

¹⁸Bey xan ca wa'alique'ex: Wa máax tu kaaba' u multuunil kultaj cu ya'alic u beetic wa ba'axe', lelo' mix ba'al u biilal; ba'ale' wa cu ya'alic u beetic wa ba'ax tu kaaba' ti'ibil óolal yaan tu yóokol le multuunil kultajo', lelo' cu kaxic u t'aan.

¹⁹¡J ma' na'ate'ex yéetel ch'óope'ex! ¿Máacalmáac u asab nojchil ti' lelo'oba': le ti'ibil óolal wa le multuunil kultaj cu beetic u quili'ichtal le ti'ibil óolalo'?

²⁰Tumen le máax cu ya'alic u beetic wa ba'ax tu kaaba' le multuunil kultaje', ma' táan u ya'alic chéen tu kaaba' le multuunil kultajo' ba'ale' tu kaaba' tuláacal ba'al yaan tu yóokol.

²¹Bey xan le máax cu ya'alic u beetic wa ba'ax tu kaaba' le kulnajo' ma' táan u ya'alic chéen tu kaaba' le kulnajo' ba'ale' tu kaaba' xan Ku máax caja'an te j kulnajo'.

²²Bey xan máax cu ya'alic u beetic wa ba'ax tu kaaba' ca'ane', táan u jalach t'aan tu kaaba' u Quili'ich káanche' Ku, yéetel tu kaaba' Junab Ku culucbali'.

²³¡Óotzile'ex u j ca'anbesajile'ex a'almaj t'aan yéetel fariseoex, j ca'a p'éel iche'ex! Te'exe' ca dzáique'ex ti' Ku u diezmoil menta, u neek ánis yéetel comino, ba'ale' ca p'atique'ex jun tzéelil le ca'ansajo'ob asab páaybe'en ti' le a'almaj t'aano', je'el bix le toj cuxtalo', le ch'a'a óotzililo' yéetel le ocsaj óolalo'. Lelo'oba' leti' páaybe'en a beetique'exa' yéetel ma' a p'atique'ex a beetique'ex le u láako'.

²⁴¡Te'exe', ch'óop j nu'uctaj beele'ex, ca máaytique'ex jun túul koxol ba'ale' ca lukique'ex jun túul camello'!

²⁵¡Óotzile'ex u j ca'anbesajile'ex a'almaj t'aan yéetel fariseoex j ca'a p'éel iche'ex! Tumen ca p'o'ique'ex u paach le vaso yéetel le platoo', ba'ale' ichilo'obe' chuuptac yéetel ba'ax yaan te'ex tu yo'olal a wocole'ex yéetel a dzu'utile'ex.

²⁶J ch'óop fariseo, p'o'o táanil ichil le vasoo' yéetel ichil le platoo', bey túuno' cu p'o'ochajal xan u paacho'ob.

²⁷¡Óotzile'ex u j ca'anbesajile'ex a'almaj t'aan yéetel fariseoex j ca'a p'éel iche'ex! Tumen beye'ex mucnalo'ob saccunsa'ano'obe', yo'ocabile' jadzutz u yila'alo'ob, ba'ale' ichile' chuup yéetel u baaquel quimeno'ob yéetel tuláacal ba'alo'ob tu'utaco'ob.

²⁸Te'exe' beye'exo': yo'ocabile' jach utz a wila'ale'ex tumen máaco'ob ba'ale' ichile' chupe'ex yéetel ca'a p'éel ichil bey xan yéetel kaasil.

²⁹¡Óotzile'ex u aj ca'anbesajile'ex a'almaj t'aan yéetel fariseoex, j ca'a p'éel iche'ex! te'ex beetic u mucnal le aj bóobato'obo', yéetel ca jadzutzquintique'ex le cúuchilo'ob beeta'an u ti'al u ka'ajsa'al le máaxo'ob utzo'obo',

³⁰cu dzo'ocole' ca wa'alique'ex: Wa ca cuxlaco'on tu kiinil le c úuchben láako'obo', ma' táan c bin c áant ca'ach u quíimso'ob le aj bóobato'obo'.

³¹Yéetel lela' ca kaj óoltique'ex te'exe' u ch'i'ibale'ex le máaxo'ob tu quíimsajo'ob le aj bóobato'obo'.

³²¡Dzo'ocbese'ex túun a beetique'ex le ba'ax cáajsa'ab tumen a úuchben láake'exo'!

³³¡Caane'ex! ¡U ch'i'ibale'ex caan! ¿Bix can a jechile'ex u jaadzil metnal?

³⁴Le o'olale' bin in ca'aj in túuxt ti' te'ex aj bóobato'ob, aj na'ato'ob yéetel aj ca'anbesajo'ob. Ba'ale' dze'edzec ti'obe' bíin a quiimse'ex yéetel bíin a sine'ex ti' cruz, u láako'obe' bíin a jadze'ex te j sinagogaob yéetel bíin a ch'a'apachte'exo'ob caajal caajo'ob.

³⁵Beyo' ta wóokole'ex cun lúubul u si'ipilil iquil quíimsa'abico'ob tuláacal le máaco'ob utzo'obo', u cáajbal yéetel Abel, le máax toj u cuxtalo', cu dzo'ocol yéetel Zacarías u paal Berequías, le máax ta quíimsaje'ex actáan ti' le kulnaj yéetel naadz ti' le multuunil kultajo'.

³⁶Tu jaajil quin wa'alic te'exe', u si'ipil tuláacal le ba'alo'oba' bíin lúubuc tu yóokol u cajnáalilo'ob le kiino'oba'.

³⁷¡Jerusalén, Jerusalén, teech ca quíimsic le aj bóobato'ob yéetel ca muruxtuuntic u aj bisaj t'aano'ob túuxta'abo'ob teech tumen Ku! ¡Jay téen tin wóoltaj in much'quint a paalal je'el bix le x caax cu much'quintic u mejnilo'ob yáanal u xiiko', ba'ale' ma' ta wóoltaji'!

³⁸Ile'ex túun a cajtalile'exe' yaan u x tocoy cúuchital;

³⁹tumen quin wa'alic ti' te'exe' ma' bíin a ca'a ilene'exi' tac quéen kuchuc u kiinil a wa'alique'exe': ¡Qui'iqui t'antbil le máax cu taal tu kaaba' Yuumtzilo'!