Read Yucateco San Mateo 24 Bible Online

San Mateo 24 - Yucateco bible

San Mateo 24

¹Jóok Jesús te j kulnajo', táan ca'ach u bine' ca tu nadzajuba'ob u j canbalo'obe', ca jo'op' u ye'esico'ob ti'e' u pakilo'ob le kulnajo'.

²Ba'ale' Jesuse' tu ya'alaj ti'ob: ¿Ca wilque'ex wa tuláacal lela'? Tu jaajil quin wa'alic te'exe', te'ela' ma' túun p'áatal mix jun p'éel tuunich yóokol u láak tuunich. Tuláacal yaan u pu'ucul.

³J bino'ob túun tu pu'uquil le olivo'obo'; le ca j culaj Jesús te'elo', le j canbalo'obo' j bino'ob u x mucul a'alo'ob ti': A'al to'on ba'ax kiin quéen úuchuc le ba'alo'oba'. ¿Ba'ax chíiculal cu bin e'esic a taalbal yéetel quéen xu'uluc yóokolcaab?

⁴Jesuse' tu núucaj ti'ob: Canantaba'ex, ma' a tu'usule'ex tumen mix máac.

⁵Tumen ya'ab máax cun j taal tin kaaba' táan u ya'alico'ob: Teen le Cristoo; ya'ab máax cun u tuso'ob.

⁶Te'exe' yaan a wu'uyique'ex u péectzil ba'atelo'ob waye' yéetel te'elo'; ba'ale' ma' u ja'akal a wóole'ex, tumen bey unaj u yúuchul, ba'ale' ma' u xuuli'.

⁷Tumen jun p'éel caaje' yaan u bíin u ba'atel ti' u láak caaj, yéetel jun p'éel lu'ume' yaan u ba'atel ti' u láak lu'um; yéetel yaan u yantal wi'ijil, koja'anil yéetel quíilbal lu'um jejeláas tu'uxo'ob.

⁸Tuláacal lela' chéen u cáajbalil le ba'ax cun mukyajtbilo'.

⁹Bíin ku'ubuque'ex túun u ti'al ca loobilta'aque'ex yéetel bíin quíimsa'aque'ex, yéetel tuláacal yóokolcaab cun p'ectique'ex tin wo'olal.

¹⁰Ti' le kiino'obo' ya'ab cun síistal u yocsaj óolali', yéetel yaan u ch'a'ap'ecticuba'ob, yéetel yaan u paaclan kubicuba'ob yéetel tuus.

¹¹Bíin taalac ya'abcach tuusil máaco'ob bíin u ya'alo'ob táan u t'aano'ob tu kaaba' Junab Ku, ya'abcach máaco'ob cu bin u tuuso'ob

¹²Tu yo'olal le ya'ab kaasil cun antalo', ya'ab cun u jáws u yaabilticuba'obi'.

¹³Ba'ale' le máax cu mu'uka'antal u yóol tac tu xuule', bíin to'ococ.

¹⁴U ma'alob péectzil le ajawilo' bíin tze'ecta'ac ti' tuláacal yóokolcaab, u ti'al ca kaj óolta'ac tumen tuláacal caajo'ob; leti' túun quéen talac u xuul.

¹⁵Aj bóobat Daniele' dzíibnaj tu yo'olal le ba'ax cu pa'apak yéetel cu kascunajo'. Le quéen a wile'ex dzo'oc u kuchul lela' tac te j quili'ich cúuchilo', le máax cu xooque' ca u na'ate',

¹⁶le máaxo'ob túun yano'ob Judeao' unaj u púudzulo'ob tac te j pu'uco'obo'.

¹⁷le máax yaan yóokol u yotoche' ma' u yéemel ca ococ u ch'a'a wa ba'ax,

¹⁸le máax bija'an káaxe' ma' u suut mix u ch'a'a u nook.

¹⁹¡Óotzil le co'olelo'ob koja'ano'ob ti' chan pal ti' le kiino'obo', wa táan u chu'uch u chan palo'obo'!

²⁰Káat óolte'ex ti' Yuum Ku ma' u yaantal a púudzule'ex tu kiinil que'el mix tu kiinil sábado;

²¹tumen bíin yanac táaj ya'ab mukyaj je'el bix mix jun téen yanac cáajic yóokolcaab, mix bíin yanac u láak cu dzo'ocol le je'elo'.

²²Wa Ku ma' tu cóomquintic le kiino'obo', mix máac bíin to'ococ, ba'ale' bíin u cóomquint tu yo'olal u yaacunaj ti' le máaxo'ob u yéeymajo'.

²³Wa máax cu ya'alic te'ex túun: Ile'ex, way yaan le Cristoo', wa, ile'ex ti' yaan te'elo', ma' a wocsaj óoltique'ex.

²⁴Tumen yaan u taal tuusil máaco'ob cu ya'alicuba'ob cristo'ob yéetel yaan u ya'alico'ob táan u t'aano'ob tu kaaba' Junab Ku; yéetel yaan u beetico'ob ya'abcach chíiculalo'ob, yéetel jakbe'en ba'alo'ob u ti'al u tuusico'ob, wa ca páataque' tac le máaxo'ob yéeya'ano'ob tumen Ku.

²⁵Dzo'oc in wa'alic te'ex le ba'alo'oba' ma'ili' úuchuque'.

²⁶Le o'olale' wa cu ya'ala'al ti' te'exe': Ile'ex, ti' yaan te x tocoy lu'umo', ma' a bine'exi'; wa cu ya'ala'al ti' te'ex: Ile'ex, way yaan ich naje', ma' a wocsaj óoltique'ex.

²⁷Tumen je'el bix u léenbal cháac cu yila'al u sáasil j lakin tac j chikine', bey xan cun úuchul le quéen taalac u Paal Máac.

²⁸Je'el tu'uxac ca yanac le quimen wíinclilo', ti' xan cun much'tal le ch'oomo'obo'.

²⁹Tu séeblaquil le quéen máanac u kiinilo'ob le mukyajo', le kiino' bíin éekjoch'eenchajac, le ujo' ma' bíin u dzáa u sáasilil, le eeko'obo' bíin lúubuco'ob, tac u páajtalilo'ob ca'ane' bíin quiquilanquilnaco'ob.

³⁰Leti' túun quéen ila'ac te j ca'ano' u chíiculal u Paal Máac, tuláacal u caajilo'ob yóokolcaab bíin okolnaco'ob, yéetel bíin u yilo'ob u Paal Máac, táan u taal ti' u mukyajilo'ob ca'an yéetel nojoch páajtalil yéetel nojbe'enil.

³¹Yéetel bíin u túuxt u ángelo'ob u ti'al u much'quint yéetel u ka'am juum trompetae' tuláacal le máaxo'ob u yéeymajo' ti' can tiitzil le lu'umo', ti' jun tzéel yóokolcaab tac ti' u láak jun tzéel.

³²Cane'ex le quet t'aana' ti' le higuerao': Le quéen munchajac u kabo'ob yéetel táan u tóop'ol u le'obe', te'exe' a wojele'ex naadz yanil u kiinil kíilcab.

³³Bey xano', le quéen a wile'ex tuláacal le ba'alo'oba', ojéelte'ex naadz yanil u xuul, ti' yaan tu jool naje'.

³⁴Tu jaajil quin wa'alic ti' te'exe' yaan u yúuchul tuláacal le ba'alo'oba' ma'ili' quíimico'ob u cajnáalilo'ob le kiino'oba'.

³⁵Ca'an yéetel lu'ume' bíin máanaco'ob, ba'ale' in t'aano'obe' ma' bíin máanaco'obi'.

³⁶Ba'ale' ba'ax kiin wa ba'ax hora quéen úuchuc, mix máac u yojel, mix u ángelilo'ob ca'an, mix u Paal Máac. Chéen Ku le Taata u yojelo'.

³⁷Je'el bix úuchic tu kiinilo'ob Noee', bey xan bíin úuchuc le quéen taalac u Paal Máac.

³⁸Ti' le kiino'obo', ma'ili' taalac le búulcabalo', le máaco'obo' táan u janalo'ob, táan u yukulo'ob, yéetel táan u dzo'ocol u beelo'ob tac le kiin ca j ooc Noé ichil le nojoch cheemo';

³⁹ma' tu na'atajo'ob mix ba'ali' tac le kiin ca j taal le búulcabalo' ca j láaj bisa'abo'ob. Bey xan bíin úuchuc le quéen talac u Paal Máac.

⁴⁰Ti' le kiino' ca'a túul máaco'ob bíin yanaco'ob káax; jun túul cun bisbili' yéetel jun túul cun p'atbili'.

⁴¹Ti' ca'a túul co'olelo'ob táan u juuch'o'obe', jun túul cun bisbili' yéetel jun túul cun p'atbili'.

⁴²P'il ichnene'ex, tumen ma' a wojele'ex ba'ax hora quéen taalac Yuumtzilo'.

⁴³Ba'ale' ojéelte'ex le ba'ala', wa u yuumil naj u yojel ba'ax hora quéen taalac le j oocolo', je'el u p'áatal x ma' wenlile' yéetel ma' bíin u cha'a u je'ebel u yotoch u ti'al ca ocla'ac.

⁴⁴Le o'olale' te'ex xane', nu'uctaba'ex; tumen le kiin ca tucultique'ex ma' túun taale', leti' quéen taalac u Paal Máac.

⁴⁵¿Máax le palitzil chúucpaja'an u yóol yéetel yaan u na'at, cu p'a'atal tumen u dzuulil u ti'al u táan óolt le máaxo'ob otochnáalo'ob u ti'al ca u dzáa janal ti'ob tu yorailo'?

⁴⁶Qui' yóol le palitzilo' wa le quéen suunac u dzuulilo' cu yilic táan u beetic beyo'.

⁴⁷Tu jaajil quin wa'alic ti' te'exe' le dzuulo' bíin u dzáa u canant tuláacal ba'ax yaan ti'.

⁴⁸Ba'ale' wa le palitzil jun túul kaakas máaco' yéetel cu tucultic yaan u xáantal quéen suunac u dzuulile',

⁴⁹cu jo'op'ol túun u ja'aja'adzic le u láak palitzilo'obo' bey xan cu janal yéetel cu yukul yéetel le cala'ano'obo',

⁵⁰bíin suunac u dzuulil ti' le kiin ma' táan u pa'atique' yéetel ti' le hora ma' u yojelo'

⁵¹bíin dza'abac túun u asab yajil jaadz ti', bíin u bis u jaadzil le j ca'a p'éel icho'obo'. Leti' túun quéen úuchuc okol yéetel jach' coj.