Read Yucateco San Mateo 25 Bible Online

San Mateo 25 - Yucateco bible

San Mateo 25

¹U ajawil ca'an túune' bey diez x ch'úupalal tu ch'a'ajo'ob u x t'uchub sáasilo'obe' ca j bino'ob ti' jun p'éel dzo'ocol beel u ti'al u jóokolo'ob u kamo'ob u beel le íichamtzilo'.

²Cinco ti' leti'obe' x ma' na'ato'ob u láak cincoe' jach yaan u na'ato'ob.

³Le x ma' na'ato'obo', le ca tu ch'a'ajo'ob u xt'uchub sáasilo'obe', ma' tu ch'a'ajo'ob aceite u ti'al u chupico'ob tu ca'a téeni';

⁴ba'ale' le yaan u na'ato'obo' tu ch'a'ajo'ob aceite le ca tu ch'a'ajo'ob u x t'uchub sáasilo'.

⁵Tumen xaanji u taal le íichamtzilo' tuláacal jach taacchaj u wenelo'obe', ca j weeno'ob.

⁶Míin chúumuc áakabe' u'uya'ab jun p'éel awat: ¡Táan u taal le íichamtzilo' jóokene'ex a kame'ex!

⁷Tuláacal le x ch'úupalalo'obo' líiko'obe' ca jo'op' u t'abico'ob u x t'uchub sáasilo'ob.

⁸Le cinco x ma' na'ato'obo' tu ya'alajo'ob ti' le cinco yaan u na'ato'obo': Dza'ex to'on jun p'íit aceite tumen táan u tu'upul le c x t'uchub sáasilo'oba'.

⁹Ba'ale' le x ch'úupalalo'ob yaan u na'ato'obo' tu ya'alajo'ob: Ma', tumen beyo' ma' túun chúucpajal mix ti' te'exi' mix ti' to'oni'. Asab ma'alob ca xi'ique'ex te tu'ux cu co'onolo' ca a mana'ex a ti'ale'exi'.

¹⁰Ba'ale' ca'aliquil le cinco x ch'úupalalo'ob x ma' na'ato'ob bija'ano'ob u máano'ob aceiteo' j kuch le íichamtzilo'. Le cinco x ch'úupalalo'ob u nu'ucbesmuba'obo' j ooco'ob yéetel te j dzo'ocol beelo', ca j ka'al le jool najo'.

¹¹Cu dzo'ocole' j kuch le u láak x ch'úupalalo'obo', ca tu ya'alajo'ob: ¡In Yuumtzil, Yuumtzil! je'e to'on le jool najo'.

¹²Ba'ale' leti'e' tu núucaj ti'ob: U jaajile' ma' in kaj óole'exi'.

¹³Jesuse' tu ya'alaj túun ti'obe': Ma' a wenle'ex, tumen ma' a wojele'ex u kiinil mix u yorail quéen taalac u Paal Máac.

¹⁴U ajawil ca'ane' je'el bix jun túul máac, ma'ili' jóokoc u binbal táaxel lu'ume', tu t'anaj u palitzilo'obe' ca tu kubentaj u taakin ti'ob.

¹⁵Ti' jun túule' tu dzáa cinco mil taakino'ob, ti' u láake' dos mil, ti' u láake' mil, ti' tu jujun túulile' je'el bix cu páajtal u meyajtique'. Cu dzo'ocole' ca j bini'.

¹⁶Le j palitzil tu kamaj cinco mil taakino'obe' meyajnaj yéetele' c a tu náajaltaj u láak cinco mil taakino'ob tu yóokol.

¹⁷Bey xan le tu kamaj dos mil taakino'obo' tu náajaltaj u láak dos mil tu yóokol.

¹⁸Ba'ale' le máax tu kamaj mil taakino'obo', j bine' ca tu ta'acaj u taakin u dzuulil ti' jun p'éel jool tu páanaj te j lu'umo'.

¹⁹Cu dzo'ocol u máan ya'ab kiino'obe' j suunaj u dzuulil le j palitzilo'obo', ca jo'op' u káatic ti'ob ba'ax tu beetajo'ob yéetel le taakino'.

²⁰Táanile' j kuch le máax tu kamaj le cinco mil taakino'obo', ca tu kubaj ti' u dzuulil u láak cinco mil tu yóokol táan u ya'alic: Yuumtzil cinco mil taakino'ob ta dzaj ti' teen je'el u láak cinco mil tin náajaltaja'.

²¹Le dzuulo' tu ya'alaj ti': Jach ma'alob, teche' jun túul palitzil utzech yéetel chuca'an a wóol; tumen chúucpaj a wóol tu yóokol le jun p'íita', bin in ca'aj in dzáech tu yóokol u ya'abil. Oquen, qui'imacchajac a wóol tin wéetel.

²²Cu dzo'ocole' ca j kuch le máax tu kamaj le dos mil taakino'obo', ca tu ya'alaj: Yuumtzil, dos mil taakino'ob ta dzaj ti' teen, je'el u láak dos mil tin náajaltaja'.

²³U dzuulile' tu ya'alaj ti': Jach ma'alob, teche' jun túul palitzil utzech yéetel chuca'an a wóol; tumen chúucpaj a wóol ti' le jun p'íita', bin in ca'aj in dzáech tu yóokol u ya'abil. Ooquen, qui'imacchajac a wóol tin wéetel.

²⁴Ba'ale' le ca j kuch le palitzil tu kamaj le mil taakino'obo', tu ya'alaj ti' u dzuulil: Yuumtzil tene' in wojel teche' jun túul máac chich a pucsi'ikal, ca jooch tu'ux ma' pakalnajechi' yéetel ca mol tu'ux ma' ta ki'itbesaj mix ba'ali'.

²⁵Le o'olal sajacchajene' ca j binen in ta'ac a taakin te j lu'umo'. Je'el ba'al a ti'ala'.

²⁶Le dzuulo' tu núucaj ti': Kaakas yéetel mákol palitzil, wa a wojel túun quin jooch tu'ux ma' pakalnajeni', yéetel quin mol tu'ux mix ba'al tin ki'itbesaje',

²⁷le o'olale' unaj a dzáic ca'ach in taakin te tu'ux cu beeta'al le meyajo' le quéen suunaquen túuno' cu páajtal ca'ach in kamic ba'ax in ti'al yéetel buca'aj tu náajaltajo'.

²⁸Ca tu ya'alaj ti' le máaxo'ob yano'ob te'elo': Lukese'ex le mil taakino'ob yaan ti'o' ca a dza'ex ti' le máax yaan diez mil ti'o'.

²⁹Tumen le máax yaan ti'o' bíin dza'abac u láak ti'e', u ti'al ca yanac u asabil ti'. Ba'ale' le máax mina'an ti'o', tac le jun p'íit yaan ti'o' bíin lukesa'ac ti'.

³⁰Le palitzil mix ba'al u bilala', pule'ex ti' u éekjoche'enil táancab, tu'ux bíin úuchuc okol yéetel jach' coj.

³¹Le quéen taalac u Paal Máac je'el bix ajawe', bakpachta'an tumen tuláacal u ángelo'obe', bíin culac tu jalach káanche'.

³²Bíin muuch'lac tu táane' u cajnáalilo'ob tuláacal caajo'ob, leti' túune' bíin u jatzláanto'ob jun túul ti' u láak je'el bix jun túul j canan taman cu jatzláantic u j tamano'ob ti' le yuuco'obo'.

³³Bíin u dzáa le j tamano'ob tu x no'oj kabo' yéetel le yuuco'ob tu x dzíic kabo'.

³⁴Ajaw túune' bíin u ya'al ti' le máaxo'ob yano'ob tu x no'oj kabo': Co'otene'ex te'ex máaxe'ex qui'iqui' t'anta'ane'ex tumen in Taata, kame'ex le ajawil nu'ucta'an a ti'ale'ex le ca tu beetaj Ku yóokolcaabo'.

³⁵Tumen wi'ijchajene' ca ta dzaje'ex teen ba'al in jaante'; ukajchajene' ca ta dzaje'ex teen ba'al in wuke; máanen bey táanxel lu'umilene' ca ta dzaje'ex teen tu'ux in kuchul.

³⁶Mina'anchaj in nooke' ca ta dzaje'ex teen nook; koja'anchajene' ca ta xíimbatene'ex; ka'alene' ca j taale'ex a wilene'ex.

³⁷Le máaxo'ob toj u cuxtalo'obo' bíin u ya'alo'ob: Yuumtzil, ¿ba'ax kiin t ilajech wi'ijech ca t dzaj ti' teech ba'al a jaante'? ¿Wa ba'ax kiin t ilajech ukajech ca t dza teech ba'al a wuke?

³⁸¿Wa ba'ax kiin t ilajech beyech j táanxel lu'umil ca t dzaj ti' tech tu'ux a kuchul, wa mina'an a nook ca t dzaj ti' teech nook a búuquinte?

³⁹¿Wa ba'ax kiin t ilajech koja'anech wa kala'anech j bino'on c ilech?

⁴⁰Ajaw túune' bíin u núuc ti'ob: Tu jaajil quin wa'alic te'exe' tuláacal ba'al ta beetaje'ex ti' jun túul u asab chichanil ti' le in sucu'uno'oba' ti' teen ta beetaje'ex.

⁴¹Ajaw túuno' bíin u ya'al ti' le máaxo'ob yano'ob tu x dzíic kabo': Tzelaba'ex tin táan, te'ex máaxe'ex yane'ex yáanal kaakas t'aan; xeene'ex ti' le káak cu yéelel mantadz nu'ucta'an u ti'al kasiba'al yéetel u ángelo'ob.

⁴²Tumen wi'ijchajene', te'exe' ma' ta dzaje'ex ba'al in jaanti'; ukajchajene', ma' ta dzaje'ex teen ba'al in wuki';

⁴³j máanen bey jun túul táanxel lu'umile' ma' ta dzaje'ex teen tu'ux in kuchuli'. Mina'anchaj in nooke', te'exe' ma' ta dzaje'ex teen nooki'; koja'anchajen yéetel ka'alene', te'exe' ma' taale'ex a xíimbatene'exi'.

⁴⁴Leti'obe' bíin u ya'alo'ob ti': Yuumtzil, ¿ba'ax kiin t ilajech wi'ijech, wa ukajech, wa beyech táanxel lu'umile', wa mina'an a nook, wa koja'anech, wa kala'anech, cu dzo'ocole' ma' t áantechi'?

⁴⁵Ajaw túune' bíin u núuc ti'ob: Tu jaajil quin wa'alic ti' te'exe', tuláacal ba'ax ma' ta beetaje'ex ti' jun túul u asab chichanil le máaco'oba', mix ti' teen ta beetaje'ex.

⁴⁶Cu dzo'ocole' lelo'oba' bíin xi'ico'ob ti' le mukyaj mina'an u xuulo', yéetel le máaxo'ob toj u cuxtalo'obo' bíin xi'ico'ob ti' le cuxtal mina'an u xuulo'.