Read Yucateco San Mateo 27 Bible Online

San Mateo 27 - Yucateco bible

San Mateo 27

¹Le ca sáaschaje', tuláacal u nuuctaquil le aj kiino'obo', yéetel u nuuctaquil le judíobo' tu múuch' tucultajo'ob bix cu bin u quiimsico'ob Jesús.

²Kaxa'an tu bisilaco'ob ca tu kubajo'ob ti' Poncio Pilato le jalach wíinico'.

³Judas le máax j kubo', le ca tu yilaj dzo'oc u xotkinta'al Jesús u ti'al quíimile yaji u yóole' ca tu sutaj le treinta u taakinil platao' ti' u nuuctaquil le aj kiino'obo' yéetel ti' u nuuctaquil le caajo'

⁴ca tu ya'alaj ti'ob: Tene' kebanchajen iquil tin kubilac u ti'al ca quíimsa'ac jun túul máac mina'an u si'ipil. Ba'ale' leti'obe' tu núucajo'ob ti': ¿Ba'ax yaan c il to'on yéetel lelo'? ¡Teech a ca'acaj yéetel!

⁵Judas túune' tu píicch'intaj le taakin te j kulnajo ca j bine' ca tu jich'aj u caal.

⁶U nuuctaquil le aj kiino'obo' tu molajo'ob le taakino' ca tu ya'alajo'ob: Ma' tu páajtal c dzáic le takiina' tu cúuchil le ti'ibil óolalo' tumen u tojol ma'anic ki'ik.

⁷Cu dzo'ocole' tu múuch' tucultajo'ob u manico'ob yéetel le taakino' u Lu'um le J patkato', u ti'al ca yanac jun p'éel cúuchil tu'ux u mu'ucul le j táanxel lu'umilo'obo'.

⁸Le o'olale' cu kaaba'inta'al le lu'umo' tac tu kiinil bejela'e' U Lu'umil Ki'ik.

⁹Bey dzo'ocpajic le ba'ax a'ala'ab tumen aj bóobat Jeremías: Tu ch'a'ajo'ob le treinta u taakinil platao' (le u tojol dza'ab ti' tumen le j israelitaobo'),

¹⁰tu yéetele' tu manajo'ob u lu'um le j patkato', je'el bix tu ya'alajilac teen Yuumtzilo'.

¹¹Jesuse' j bisa'ab tu táan le jalach wíinico', máax tu káatchi'itaj ti': ¿Teech wa u ajaw le j judíobo'? Jesuse' tu ya'alaj ti': Beyo', je'el bix dzo'oc a wa'alico'.

¹²Le ca j ta'ac u pool tumen u nuuctaquil le aj kiino'obo' yéetel u nuuctaquil le caajo' Jesuse' ma' tu núucaj mix ba'ali'.

¹³Pilato túune' tu ya'alaj ti': ¿Ma' wa ta wu'uyic buca'aj ba'alo'ob cu ya'ala'al ta wo'olalo'?

¹⁴Ba'ale' Jesuse' mix ba'al tu núucaj ti'; le jalach wíinic túuno' sen ja'ak u yóol.

¹⁵Tu kiinil u kiinbesajil le Táadz máanbalo' suucja'an ti' le jalach wíinico' u jáalkabtic jun túul máac kala'an, je'el máacalmáac ca u yéey le caajo'.

¹⁶Yaan jun túul máax kala'an jach kaj óola'ane', u kaaba'e' Barrabás;

¹⁷le ca j much'lajo'obe' Pilatoe' tu káat chi'itaj ti'ob: ¿Máax a káate'ex ca in jáalkabte, Barrabás wa Jesús máax cu ya'ala'al le Cristoo'?

¹⁸Tumen dzo'oc u yilique' tu yo'olal u kaakas tuuculo'ob tu kubajo'ob Jesús ti'.

¹⁹Ca'aliquil Pilato culucbal tu jalach káanche'e', u yatane' tu túuxtaj a'albil ti': Ma' a wocsicabáa yéetel le utzil máaco', tumen bejela'e' tin wayaktaj jakbe'en ba'alo'ob tu yo'olal leti'.

²⁰Ba'ale' u nuuctaquil le aj kiino'obo' yéetel u nuuctaquil le caajo' tu dzajo'ob tu tuucul le máaco'obo' ca u káato'ob ca jáalkabta'ac Barrabás yéetel ca quíimsa'ac Jesús.

²¹Le jalach wíinico' tu káat chi'itaj ti'ob tu ca'a téen: ¿Máacal máac ti' le ca'a túul a káate'ex ca in jáalkabte'exo'? Leti'obe' tu ya'alajo'ob: Jáalkabt to'on Barrabás.

²²Pilatoe' tu káat chi'itaj ti'ob: ¿Ba'ax túun quin in beet yéetel Jesús le máax cu ya'ala'al le Cristoo'? Tuláacalo'ob tu núucajo'ob: ¡Sin ti' cruz!

²³Pilato túune' tu ya'alaj ti'ob: ¿Ba'ax kaasil u beetmaj? Ba'ale' leti'obe' tu sen awto'ob: ¡Sin ti' Cruz!

²⁴Le ca tu yilaj Pilato mix ba'al cu jo'osique', ba'ale' táan u wo'och'táanbal le máaco'obo', tu túuxtaj taasbil ja'e' ca tu p'o'aj u kab tu táan le máaco'obo' táan u ya'alic: Tene' mina'an in si'ipil iquil cun quíimil le utzil máaca', a ca'acaje'ex te'ex.

²⁵Tuláacal le máaco'obo' tu núucajo'ob: ¡Ca lúubuc u ki'ikel t óokol yéetel tu yóokol c paalal!

²⁶Pilato túune' tu jáalkabtaj Barrabás ti'ob; cu dzo'ocole' tu túuxtaj ja'aja'adzbi Jesuse' ca tu kubaj u ti'al ca si'inic ti' cruz.

²⁷Cu dzo'ocole' u aj ba'atelo'ob le jalach wíinico' tu bisajo'ob Jesús te j chúumuc najo', ca tu láaj much'juba'ob tu bakpach.

²⁸Cu dzo'ocole' tu pitajo'ob u nooke' ca tu búucbesajo'ob yéetel jun p'éel chac nook,

²⁹ca tu dzajo'ob tu pool jun p'éel péet jo'ol jit'a'an yéetel ki'ixo'ob, tu dzajo'ob xan jun p'éel che' tu x no'oj kab. Cu dzo'ocole' xolajo'ob tu táane', ca jo'op' u p'a'astico'ob, táan u ya'alico'ob ti': ¡Qui'iqui' óolil ti' u Ajaw le judíobo'!

³⁰Tu túubajo'ob xan, yéetel tu ch'a'ajo'ob le che' yaan tu kabo' ca tu ko'okolajo'ob u pool yéetel.

³¹Cu dzo'ocol u p'a'astico'ob beyo', tu pitajo'ob le chac nook ti'o', ca tu búucbesajo'ob yéetel u nook, cu dzo'ocole' ca tu bisajo'ob u ti'al u sino'ob ti' cruz.

³²Táan u jóokolo'obe' ca tu yilajo'ob jun túul máax Cirenéil, u kaaba'e Simón, ca tu beetajo'ob u bisic u cruz Jesús.

³³Bey kuchico'ob ti' jun p'éel cúuchil u kaaba'e Gólgota, (lela' u káat u ya'ale' u Cúuchil u baaquel Pool)

³⁴te'elo' tu dzajo'ob u yuk Jesús vino xa'akta'an yéetel káaj; ba'ale' cu dzo'ocol u túuntique' Jesuse' ma' tu yóoltaj u yuki'.

³⁵Cu dzo'ocol u sinico'ob ti' cruze', le aj ba'atelo'obo' tu bulajo'ob u nook Jesús u ti'al u t'oxico'ob ichilo'ob. Bey dzo'ocpajic le ba'ax tu ya'alaj le aj bóobato': Tu t'oxajo'ob in nook ichilo'ob yéetel buul.

³⁶Cu dzo'ocole' j culajo'ob te'elo' u ti'al u cananto'ob Jesús.

³⁷Tu yóokol u poole' tu dzajo'ob jun p'éel dzíib cu ya'alic ba'ax o'olal si'in ti' cruz. Le dzíibo' cu ya'alic: Lela' Jesús, u ajaw le judíobo'.

³⁸Si'in xan ti' cruz ca'a túul j oocolo'ob tu yéetel, jun túule' tu x no'oj u láake' tu x dzíic.

³⁹Le máaxo'ob cu máano'obo' cu poch'ico'ob, táan u yúuntico'ob u poolo'ob yéetel

⁴⁰táan u ya'alico'ob: ¡Teech ca jenic kulnaj yéetel ca líikesic tu ca'a téen ichil óox p'éel kiine', tocabáa! ¡Wa u Paalech Kue' éemen ti' le cruzo'!

⁴¹Bey xan, bey p'a'astabic tumen u nuuctaquil le aj kiino'obo', u ca'anbesajilo'ob le a'almaj t'aano', le j fariseobo' yéetel u nuuctaquil le caajo', táan u ya'alico'ob tu baatzilo'ob:

⁴²Tu tocaj u láako'ob, ba'ale' leti'e' ma' tu páajtal u toquicubáa. Wa tu jaajil u ajaw Israele', ¡éemec ti' le cruzo', u ti'al ca c ocsaj óolte!

⁴³Tu dzaj u alab óolal ti' Yuum Ku, ¡To'ococ túun bejela'a tumen Ku, wa tu jaajil u yaabiltmaj! tumen tu ya'alaje': U Paalen Ku.

⁴⁴J po'och' xan tumen le j oocolo'ob sina'ano'ob ti' cruz tu yéetelo'.

⁴⁵Ekjoch'e'enchaj túun tuláacal yóokolcaab, cáajic chúumuc kiine' tac láas tres u binbal kiin.

⁴⁶Ti' le horao' Jesuse' tu ka'am a'alaj: Eli, Eli, ¿Lama sabactaní? u káat ya'ale': In Ku, in Ku, ¿Ba'axten dzo'oc a p'atiquen?

⁴⁷Dze'edzec ti' le yano'ob te'elo' tu yu'ubajo'obe' ca tu ya'alajo'ob: Le máaca' táan u t'anic aj bóobat Elías.

⁴⁸Ti' le jun súutuco' jun túul ti' leti'obe' j bin áalcabil u taas jun p'éel esponja, cu dzo'ocol u ch'ulic yéetel su'udz vinoe', tu dzaj ti' jun p'éel chowac che'e ca tu nadzaj tu chi' u ti'al ca u yuke.

⁴⁹Ba'ale' le u láako'obo' tu ya'alajo'ob: P'ate, co'ox ilic wa cu taal Elías u ti'al toquic.

⁵⁰Jesús túune' ka'am awatnaj tu ca'a téene' ca j quíimi'.

⁵¹Ti' le jun súutuco' u káasab nookil le kulnajo' jáat chúumuc, ca'anal tac cabal. Quíilbanaj le lu'umo', xíiclaj le tuunicho'obo'

⁵²yéetel je'epaj le mucnalo'obo'; tac u wíinclil ya'abcach u yocsaj óolalo'ob Ku dzo'oc ca'ach u quíimilo'obe' ca'a púut cuxquinta'abo'ob.

⁵³Lelo'oba' jóoko'ob ti' le mucnalo'obo', cu dzo'ocol u ca'a púut cuxtal Jesuse' ca j ooco'ob tu quili'ich caajil Jerusalén, tu'ux ila'abo'ob tumen ya'abcach máaco'ob.

⁵⁴Le centurion túuno' yéetel le máaxo'ob táan u canantico'ob Jesús tu yéetelo', le ca tu yilajo'ob u quíilbal le lu'umo' yéetel le u láak ba'alo'ob úucho', jach sajacchajo'obe' ca tu ya'alajo'ob: ¡Tu jaajil, le máaca' u Paal Ku!

⁵⁵Ya'abcach co'olelo'ob máaxo'ob j taalo'ob tu paach Jesús le ca j luk Galileae' yéetel tu yáantajo'obe', ti' yano'ob náachile' táan u pactico'ob le ba'alo'oba'.

⁵⁶Ichilo'obe' ti' yaan María Magdalena, María u maama Jacobo yéetel José, bey xan u maama u paalal Zebedeo.

⁵⁷Ti' le oca'an kiino' j taal jun túul ayikal máac, u kaaba'e' José Arimateail, máax u j tzaypach Jesús xan.

⁵⁸Leti' túune' j bin u yil Pilatoe' ca tu káataj u wíinclil Jesús ti'. Pilato' túune' tu ya'alaj ca dza'abac ti'.

⁵⁹Josee' tu ch'a'aj le wíinclilo' ca tu to'aj yéetel jun p'éel nojoch sac nooke',

⁶⁰ca tu dzaj ti' u túumben mucnal, u beetmaj u po'otol ti' le tuunicho'. Cu dzo'ocol u balkesic jun p'éel nojoch tuunich tu jool le mucnalo' ca j bini'.

⁶¹Ti' yano'ob María Magdalena yéetel le u láak Mariao' culucbalo'ob tu táan le mucnalo'.

⁶²Tu láak kiine', u káat ya'ale', cu dzo'ocol u nu'uctajil u ti'al u kiinil sábadoe', u nuuctaquil le aj kiino'obo' yéetel le j fariseobo', bino'ob u yilo'ob Pilatoe

⁶³ca tu ya'alajo'ob ti': Yuumtzil, cu ka'ajal to'one' le j tuus wíinico' ca'aliquil cuxa'ane' tu ya'alaj: Yaan in ca'a púut cuxtal tu yóox p'éel kiin.

⁶⁴Le o'olale', túuxt canatbil le mucnal tac tu yóox p'éel, kiino', u ti'al ma' taal u canbalo'ob yéetel áakabe' ca u yocolto'ob le wíinclilo', cu dzo'ocole' ca u ya'alo'ob ti' máaco'obe': Dzo'oc u ca'a púut cuxtal ti' le quíimilo'. Wa cu yúuchul beyo', le dzo'oc tuusa' asab kaas ti' le yáaxo'.

⁶⁵Pilatoe' tu ya'alaj ti'ob: Je'el jun jaatz aj ba'atelo'ob, xene'exe' ca a wile'ex ca cananta'ac u asab ma'alobil ca páatac.

⁶⁶J bino'ob túune' ca tu yilajo'ob ca cananta'ac ma'alob le mucnalo', tu dzajo'ob jun p'éel chíiculal tu yóokol le tuunich yaan tu joolo' ca tu p'atajo'ob le aj ba'atelo'ob te'elo'.