Read Yucateco San Mateo 28 Bible Online

San Mateo 28 - Yucateco bible

San Mateo 28

¹Le ca j máan u kiinil je'elele', yéetel táan u sáastal u yáax kiinil le semanao', María Magdalena yéetel le u láak Mariao' j bin u yilo'ob le mucnalo'.

²Ca téec quíilbanaj le lu'umo', tumen jun túul u ángel Yuumtzile' j éem ca'ane', ca j kuch tac tu'ux yaan le mucnalo' ca tu balkesaj le tuunicho' ca j culaj tu yóokol.

³Sáasjome'en je'el bix u léenbal cháaque', yéetel u nooke' jach sac.

⁴Le aj ba'atelo'obo' sajacchajo'obe' ca jo'op' u quiquilanquilo'ob ca j p'ato'ob bey quimeno'obe'.

⁵Le ángel túuno' tu ya'alaj ti' le co'olelo'obo': Ma' a ch'a'ique'ex sajaquil tene' in wojel táan a caxtique'ex Jesús le máax si'in ti' cruzo'.

⁶Mina'an waye', dzo'oc u ca'a púut cuxtal je'el bix tu ya'alajilaco'. Co'otene'ex a wile'ex le cúuchil tu'ux j dza'abo'.

⁷Xeene'ex tu séeblaquil, ca a wa'ale'ex ti' u aj canbalo'ob: Leti'e' dzo'oc u ca'a púut cuxtal ti' le quimeno'obo' yéetel táan u bin Galilea táanil ti' te'ex; ti' can a wile'exi'. Dzo'oc in wa'alic ti' te'ex.

⁸Le co'olelo'ob túuno' j luko'ob tu séeblaquil ti' le mucnalo' yéetel sajaquil ba'ale' yéetel nojoch qui'imac óolal xan; ca j bino'ob áalcabil u biso'ob le ma'alob péectzila' ti' le j canbalo'obo'.

⁹Ti' lelo', Jesuse' tu dzajubáa tu táano'obe' ca tu ya'alaj: Jedzel óolil ti' te'ex. Leti'obe' tu nadzajuba'ob túun ti' Jesuse' ca tu kultajo'ob táan u méekico'ob u yooc,

¹⁰Leti'e' tu ya'alaj ti'ob: Ma' a ch'a'ique'ex sajaquil. Xeene'ex a wa'ale'ex ti' in sucu'uno'obe' unaj u bino'ob tac Galilea, ti' cun u yileno'obi'.

¹¹Ca'aliquil táan u bin le co'olelo'obo', dze'edzec ti' le aj ba'atelo'ob j p'áato'ob canan ca'acho' j bino'ob tac te j caajo' ca tu tzicbaltajo'ob ti' u nuuctaquil le aj kiino'obo' tuláacal le ba'ax j úucho'.

¹²Lelo'oba' j bino'ob t'aan yéetel u nuuctaquil le caajo' u ti'al ca yanac jun p'éelili' tuucul ti'ob. Ca tu dzajo'ob ya'ab taakin ti' le aj ba'atelo'obo'

¹³ca tu ya'alajo'ob ti'ob: Te'exe' yaan a wa'alique'ex: Ca'aliquil táan c wenele', u aj canbalo'ob Jesuse' j taalo'ob yéetel áakabe' ca tu yocoltajo'ob u wíinclil.

¹⁴Wa le jalach wíinic cu kuchul u yojéelte', to'one' je'el c t'aan tu yéetele' u ti'al c ilic ma' u beeta'al te'ex mix jun p'éel kaas.

¹⁵Le aj ba'atelo'ob túuno' tu kamajo'ob le taakino', ca j bino'ob u beeto'ob le ba'ax a'ala'ab ti'obo'. Bey u tzolico'ob le judíob tac tu kiinil bejela'e'.

¹⁶Bey túuno' le once aj canbalo'obo' j bino'ob tac Galilea, ti' le pu'uc a'ala'ab ti'ob tumen Jesuso'.

¹⁷Le ca tu yilajo'ob Jesuse' tu kultajo'ob quex yaan dze'edzec ti'obe' ca'a p'éel u y óolo'obi'.

¹⁸Jesús túune' tu nadzajubáe' ca tu ya'alaj ti'ob: Ti' ten dza'an tuláacal páajtalil ca'an yéetel lu'um.

¹⁹Xeene'ex túun ti' u cajnáalilo'ob tuláacal caajo'obe' ca a beete'exo'ob aj canbalo'ob; yéetel dza'ex u yocja'ob tu kaaba' le Taatao, le Paalo' yéetel le Quili'ich Pixano',

²⁰yéetel ca'anse'exo'ob u dzo'ocbeso'ob tuláacal ba'ax in wa'almaj ti' te'ex. Yéetel ojéelte'exe tene' ti' yanen ta wéetele'exe' tuláacal kiino'ob tac tu xuul yokóolcaab. Amen.