Read Yucateco San Mateo 4 Bible Online

San Mateo 4 - Yucateco bible

San Mateo 4

¹Cu dzo'ocole' ca j bisa'ab Jesús tumen le Pixan ti' jun p'éel x tocoy lu'um u ti'al ca túunta'ac u yóol tumen kasiba'al.

²P'áat cuarenta kiino'ob yéetel cuarenta áakabo'ob x ma' janal, cu dzo'ocole' ca tu yu'ubaj wi'ij.

³Kaasiba'al túune' tu nadzajubáe' ca tu ya'alaj ti' Jesús u ti'al u túuntic u yóol: Wa u paalech Kue' a'al ca suunac waajil le tuunicho'oba'.

⁴Ba'ale' Jesuse' tu núucaj ti': Le Quili'ich Dzíibo' cu ya'alic: Ma' chéen yéetel waaj bíin cuxlac wíiniqui', tac yéetel tuláacal u t'aan Ku.

⁵Le kaasiba'al túuno' tu bisaj Jesús tu quili'ich caajil Jerusalén, ca tu na'acsaj jach tu ca'analil kulnaj,

⁶ca tu ya'alaj ti': Wa u paalech Kue', pulabáa; tumen le Quili'ich Dzíibo' cu ya'alic: Kue' yaan u túuxtic u ángelo'ob u ti'al u canantiquecho'ob. Yéetel u kabo'ob cu bin u machecho'ob u ti'al ma' a t'óochpajal ti' mix jun p'éel tuunich.

⁷Jesuse' tu núucaj ti': Cu ya'alic xan le Quili'ich Dzíibo': Ma' a túuntic u yóol Yuumtzil a Ku.

⁸Ca j bisa'ab tu ca' a téen tumen kasiba'al tu yóokol jun p'éel ca'anal pu'uc ca j e'esa'ab ti'e' tuláacal u nucuch caajilo'ob yóokolcaab, bey xan u ayikalilo'ob,

⁹ca j a'ala'ab ti': Ti' teech bíin in dzáa tuláacal le ba'alo'oba' wa ca xoltal a kulten.

¹⁰Ca túun j a'ala'ab ti' tumen Jesús: Xeen, Satanás, tumen cu ya'alic le Quili'ich Dzíibo': Kult Yuumtzil a Ku, meyajt xan chéen leti'.

¹¹Le kaasiba'al túuno' tu p'ataj Jesús, ca j taal le ángelo'ob meyajtico'.

¹²Ca tu yu'ubaj Jesús dzo'oc u ka'alal Juane', ca j bin tu lu'umil Galilea.

¹³Ba'ale' ma' j p'áat Nazareti', j bin cajtal Capernaum, jun p'éel caaj yaan tu jáal u ka'anabil Galilea, tu lu'umil Zabulon yéetel Neftali.

¹⁴Lela' j úuch tu yo'olal u dzo'ocpajal ba'ax tu dzíibtaj aj bóobataj Isaías:

¹⁵U lu'umil Zabulón yéetel Neftalí, te j bej yaan tu jáal ka'anab tu j lakin Jordano': Galilea tu'ux caja'an le ma' judíobo'.

¹⁶Le máaxo'ob yano'ob ich éekjoch'e'enile' tu yilajo'ob jun p'éel nojoch sáasil, bey xan le máaxo'ob cajacbalo'ob tu bo'oyil quíimile' sáasilcunsa'abo'ob tumen jun p'éel sáasil.

¹⁷Ca tu cáajsaj u tze'ec Jesús, táan u ya'alic: Kex a tuucule'ex tumen u ajawil ca'ane' dzo'oc u náadzal.

¹⁸Táan ca'ach u máan Jesús tu jáal u ka'anabil Galileae', ca tu yilaj ca'a túul sucu'untzilo'ob: jun túule' Simón: máax cu kaaba'intic xan Pedro, le u láak jun túulo' Andrés. Leti'obe' j chuc cayo'ob ca'achi, táan ca'ach u pulico'ob u káanil chuc cay ichil le ja'o'.

¹⁹Jesuse' tu ya'alaj ti'ob: tzay pachtene'exi' ca in beete'ex j chuc wíinique'ex.

²⁰Tu séeblaquil tu p'atajo'ob u káanil u chuc cayo'obe' ca j bino'ob tu yéetel.

²¹Ca j xíimbalnaj Jesús u láak jun p'íite', ca tu yilaj u láak ca'a túul sucu'untzilo'ob: Santiago yéetel Juan, u paalal Zebedeo, ti' yano'ob ca'ach ichil le cheem yéetel u taataobo' táan ca'ach u yutzquintico'ob u káanil u chuc cayo'ob, j t'aano'ob túun tumen Jesús,

²²tu séeblaquil tu p'atajo'ob u taataobe' bey xan le cheemo' ca j bino'ob tu paach.

²³Jesuse' tu xíimbaltaj tuláacal u lu'umil Galilea, táan u ca'anbesaj ti' u sinagogailo'ob le caajo'. Táan u tze'ectic u ma'alob péectzilil u ajawil Ku, táan xan u dzaquic tuláacal koja'anilo'ob yéetel ki'inamil yaan ti' le máaco'obo'.

²⁴U péectzilil Jesuse' j ojéelta'ab ti' tuláacal u lu'umil Siria, ca j taasa'ab tu yicnale' tuláacal le máaxo'ob cu mukyajtico'ob jejeláas koja'anilo'ob yéetel yajilo'ob, bey xan máaxo'ob yaan kaakas pixan ti'obo', le máaxo'ob yaan léequel ti'obo' yéetel le túuch' u wíinclilo'obo'. Ca j tojquinta'ab u yóolo'ob tumen Jesús.

²⁵J tzay pachta'ab tumen ya'ab galileailo'ob, bey xan tumen u cajnáalilo'ob Decápolis, Jerusalén, Judea yéetel le máaxo'ob caja'ano'ob tu j lakin ti' u ja'il Jordan.