Read Yucateco San Mateo 5 Bible Online

San Mateo 5 - Yucateco bible

San Mateo 5

¹Jesuse' le ca tu yilaj le ya'ab máaco'obo' j na'ac te j pu'uco' ca j culaji. Ca j náadz u aj canbalo'obe',

³Qui' u yóolo'ob le máaxo'ob cu kajóoltico'ob u yóotzilil u pixano'obo', tumen u ti'alo'ob u ajawil ca'an.

⁴Qui' u yóolo'ob le máaxo'ob okom u yóolo'obo', tumen Ku bíin qui'imaccunsic u yóolo'ob.

⁵Qui' u yóolo'ob le máaxo'ob cabal u yóol u pucsi'ikalo'obo', tumen bíin u ti'alto'ob le lu'uma'.

⁶Qui' u yóolo'ob le máaxo'ob wi'ijo'ob yéetel ukajo'ob u ti'al u beetico'ob ba'ax utz tu t'aan Ku, tumen leti' cu bin áantico'ob u ti'al u beeto'ob beyo'.

⁷Qui' u yóolo'ob le máaxo'ob cu ch'a'ico'ob óotzilil ti' u láak máaco'obo', tumen bíin ch'a'abac óotzilil ti'ob tumen Ku.

⁸Qui' u yóolo'ob le máaxo'ob sac u pucsi'ikalo'obo', tumen leti'obe' bíin u yilo'ob Ku.

⁹Qui' u yóolo'ob le máaxo'ob cu meyajo'ob u ti'al ca yanac jéedzel óolal ichil máaco'ob, tumen bíin a'ala'aque', leti'obe' u paalalo'ob Ku.

¹⁰Qui' u yóolo'ob le máaxo'ob cu mukyajtico'ob ch'a'apachtajil tu yo'olal u beetico'ob ba'ax utz tu t'aan Ku, tumen u ti'alo'ob u ajawil ca'an.

¹¹Qui' a wóole'ex le quéen po'och'oque'ex tumen máaco'ob, quéen beeta'ac ti' te'ex ba'alo'ob kaastac, bey xan quéen líikesa'ac ta wóokole'ex tuláacal tuuso'ob tin wo'olal.

¹²Qui'ichajac a wóole'ex, tumen bíin a kame'ex jun p'éel nojoch bo'olal te j ca'ano', tumen bey xan ch'a'apachta'abico'ob le aj bóobato'ob j taalo'ob táanil ti' te'exo'.

¹³Te'exe' u ta'abile'ex yóokolcaab. Ba'ale' wa cu sa'atal u ch'óoch'il le ta'abo', ¿bix cu bin ca'a ch'óoch'quinaj? Mix ba'al u biilal ba'ale' chéen u ti'al j pulbil yéetel u ti'al j pepe'echa'atbil tumen máaco'ob.

¹⁴Te'exe' u sáasilil yóokolcaab. Jun p'éel nojoch caaj yaan yóokol jun p'éel pu'uque' ma' tu páajtal u ta'aca'al.

¹⁵Mix cu t'a'abal jun p'éel sáasil u ti'al ca dza'abac yáanal jun p'éel muut; ba'ale' cu dza'abal ca'anal u ti'al ca u sáasilcunt tuláacal le máaxo'ob yano'ob ich najo'.

¹⁶Bey xan te'ex il a wile'ex ca juulnac a sáasile'ex tu táan le máaco'obo', tumen beyo', le quéen u yilo'ob le utz ca beetique'exo', yaan u qui'iquit'antico'ob a Taataex yaan te j ca'ano'.

¹⁷Ma' a tucultique'ex wa j taalen in lukes u ya'almaj t'aan mix xan u ca'anbesaj le aj bóobato'obo': Ma' j taalen in lukesi' ba'ale' j taalen in we'es ba'ax jach u káat u ya'ale.

¹⁸Tumen tu jaajil quin wa'alic ti' te'ex ca'aliquil yaan ca'an yéetel lu'ume' ma' bíin lukesa'ac mix u asab chichanil ti' le a'almaj t'aano' tac quéen dzo'ocpajac tuláacal le ba'ax o'olal dza'ano'.

¹⁹Le beetique' le máax ma' tu dzo'ocbesic je'el máacalmáac ti' le a'almaj t'aano', quex le u jach chichanilo', yéetel ca u ca'anbes ti' máaco'ob beyo', jach chichan bíin ila'ac tu ajawil Ku. Ba'ale' le máax cu dzo'ocbesic yéetel cu ca'anbesic xan ti' máaco'ob u beeto'ob beyo', nojoch bíin ila'ac tu ajawil Ku.

²⁰Tumen quin wa'alic ti' te'exe', wa a cuxtale'ex ma' asab toj ti' u cuxtal u j ca'anbesajilo'ob le a'almaj t'aano' yéetel ti' u cuxtal le fariseobo', ma' bíin ocoque'ex tu ajawil Ku.

²¹Te'exe' a wu'uymaje'ex j a'ala'ab ti' le úuchben máaco'ob: Ma' a quíimsaj wíinic, tumen le máax cu quíimsaj wíinique' bíin p'is óolta'ac.

²²Ba'ale' tene' quin wa'alic ti' te'ex, le máax cu p'u'ujul yéetel u sucu'une', yaan u xot kinta'al. Le máax cu poch'ic u sucu'une' bíin p'is óolta'ac tumen u nuuctaquil le caajo'; le máax xan cu ya'alic j ma' na'at ti' u sucu'une', bíin u najmat u káakil metnal.

²³Bey túuno' wa ca bisic a ti'ibil óolal tu cúuchil kultajile', ba'ale' cu ka'ajal ti' teech, kuux teech a sucu'une',

²⁴p'at a ti'ibil óolal te'elo', xeen táanil a caxant qui'imac óolal yéetel a sucu'un. Cu dzo'ocole' cu páajtal a suut a kub a ti'ibil óolal.

²⁵Wa yaan máax cu taquic a pool ti' aj p'is óole', il a wil a caxtic qui'imac óolal tu yéetele', ca'aliquil ti' yane'ex te j bejo', tu yo'olal ma' u kubiquech ti' aj p'is óol, tumen le aj p'is óolo' je'el u kubiquech u ti'al ca ka'alaquech.

²⁶Tu jaajil quin wa'alic ti' teche', ma' bíin jáalkabta'aquech wa ma' p'is a láaj bo'otic tac u dzooc centavo.

²⁷Te'exe' a wu'uymaje'ex j a'ala'ab ti' le úuchben máaco'obo': Ma' a nup kebantal.

²⁸Ba'ale' tene' quin wa'alic ti' te'exe' je'el máaxac cu pactic jun túul co'olel u ti'al u dzíibolte' dzo'oc u nupkebantal tu pucsi'ikal tu yéetel.

²⁹Le beetique' wa a x no'oj ich cu beetic a lúubul ti' kebane' jóokes a pule, tumen asab ma'alob ca sa'atac jun xet' a wíinclile' ma' ca pu'uluc metnal tuláacal a wíinclil.

³⁰Bey xan wa a x no'oj kab cu beetic a lúubul ti' kebane', xot' a pule, tumen asab ma'alob ca sa'atac jun xéet' a wíinclile' ma' ca pu'uluc metnal tuláacal a wíinclil.

³¹A'ala'ab xan úuche': Je'el máaxac cu xúump'atic u yatane' u najmal u dzáic u ju'unil p'atbáil ti'.

³²Ba'ale' tene' quin wa'alic ti' te'exe', le máax cu xúump'atic u yatan wa ma' tu yo'olal nupkebane', cu beetic u nupkebantal. Le máax cu dzo'ocol u beel yéetel le co'olel xúump'ata'ano' cu nupkebantal xan.

³³Bey xan a wu'uymaje'ex a'ala'ab ti' le úuchben máaco'obo': Bic p'áatac ma' a dzo'ocbesic ba'ax a wa'almaj a beetic tu kaaba' Ku.

³⁴Ba'ale' tene' quin wa'alic, ma' u najmal a jalach t'aane'ex tu yo'olal chéen mix ba'ali'. Ma' u najmal xan a jalach t'aane'ex tu yo'olal ca'an, tumen u jalach káanche' Ku.

³⁵Mix tu yo'olal lu'umi', tumen u cúuchil tu'ux cu t'alcuntic u yooc; mix tu yo'olal Jerusalén, tumen u caajal nojoch Ajaw.

³⁶Mix u najmal a jalach t'aan tu yo'olal a pooli', tumen ma' tu páajtal a saccuntic wa a booxquintic mix jun cúul u tzo'otzel a pool.

³⁷Chéen u najmal a wa'alique'ex, bey, wa ma', tumen tuláacal ba'al cu máan tíip'il ti' lela', ti' kaasiba'al u taal.

³⁸Te'exe' a wu'uymaje'ex j a'ala'ab ti' le úuchen máaco'obo': Ich tu yo'olal Ich yéetel coj tu yo'olal coj.

³⁹Ba'ale' tene' quin wa'alic ti' te'ex: Ma' a sutique'ex le loob cu beetic jun túul kaakas máac, ba'ale' wa cu lajiquech ta x no'oj p'u'uque', suut le u láak a p'u'uc ti'o'.

⁴⁰Wa máax cu taquic a pool tumen u káat u ch'a'a ti' teech a nooke', cha'a u bisic xan a tep'.

⁴¹Wa cu beeta'al a bisic jun p'éel cuuch yóokol táancoch lúube', bis yóokol stet lúub.

⁴²Je'el máaxac ca u káat ti' teech wa ba'axe', dzáa ti'; ma' a sutic a paach ti' jun túul máac cu káatic ti' teech u majant wa ba'ax.

⁴³Bey xan a wu'uymaje'ex j a'ala'ab úuche': Yaabilt a wéet bisajbáa yéetel p'ect a aj p'ec óolo'ob,

⁴⁴Ba'ale' tene' quin wa'alic ti' te'ex: yaabilt a aj p'eeco'ob, payalchi'inene'ex tu yo'olal le máaxo'ob poch'ique'exo' yéetel cu ch'apachtique'exo'.

⁴⁵Beyo' te'exe' bíin paalalta'aque'ex tumen a Taataex yaan te j ca'ano', tumen leti' beetic u jóokol kiin tu yóokol kaakas máaco'ob yéetel tu yóokol utzil máaco'ob; cu túuxtic cháac tu yóokol máaxo'ob toj u cuxtalo'ob yéetel tu yóokol máaxo'ob ma' toj u cuxtalo'obi'.

⁴⁶Tumen wa te'ex ca yaabiltique'ex chéen le máaxo'ob yaabiltique'exo', ¿ba'ax bo'olil bíin a kame'ex tu yo'olal lelo'? Tac le j kam patano'obo' bey u beetico'obo'.

⁴⁷Wa ca tziquique'ex xan chéen a sucu'une'exe', ¿ba'ax ma'alobil ca beetique'ex? Tac le máaxo'ob ma' ocsaj óolo'ob cu beetico'ob beyo'.

⁴⁸Te'ex túune' chuca'anchajac a wutzile'ex je'el bix a Taataex yaan te j ca'ano' chuca'an u yutzil.