Read Yucateco San Mateo 6 Bible Online

San Mateo 6 - Yucateco bible

San Mateo 6

¹Ma' a beetique'ex a wutzil meyaje'ex tu táan máaco'ob chéen u ti'al ca u yilo'ob. Wa ca beetique'ex beyo', mix jun p'éel bo'olal bíin a kame'ex ti' a Taataex yaan te j ca'ano'.

²Le beetique' le quéen a wáant le óotzilo'obo', ma' a beetic u yusta'al paax ta táan, je'el bix u beetic le j ca'a p'éel icho'ob te tu'ux cu muuch'talo'obo' yéetel te j kíiwico'obo', lelo'oba' cu beetico'ob beyo' u ti'al ca utzil t'antaco'ob tumen máaco'ob. Tu jaajil quin wa'alic te'exe', dzo'oc u kamico'ob u bo'olalo'ob beyo'.

³Ba'ale' teche' le quéen a wáant le óotzilo'obo', il a wil ma' u yila'al mix tumen a jach ma'alob wéet óol;

⁴ilawil a x mucul beetic. A Taata máax táan u yilic ba'ax ca x mucul beetique' leti' bíin u dzáa teech a bo'olal.

⁵Te'exe' le quéen payalchi'inaque'exe', ma' a béeytale'ex je'el bix le ca'a p'éel icho'obo' máaxo'ob utz tu t'ano'ob u wa'atalo'ob payalchi' te tu'ux cu muuch'talo'obo' yéetel te j noj bejo'obo' tu yo'olal u yila'alo'ob tumen máaco'ob. Tu jaajil quin wa'alic te'exe', dzo'oc u kamico'ob u bo'olalo'ob beyo'.

⁶Ba'ale' teche' le quéen payalchi'inaqueche', ooquen ta wotoch, kal u jool naile' ca payalchi'inaquech ti' a Taata chéen ta juunal tu yéetel. A Taata máax táan u yilic ba'ax ca x mucul beetique', leti' bíin u dzáa teech a bo'olal.

⁷Le quéen payalchi'inaqueche', ma' a babal a'alic ma' nu'uca'an t'aano'obi', je'el bix u beetic le máaxo'ob ma' u kaj óolo'ob Ku, tumen cu tucultico'obe' tu yo'olal u sen t'aano'obe' bíin u'uyaco'ob.

⁸Ma' a béeytale'ex je'el bix leti'obo', tumen le Taatao' u yojel ba'ax kabéet te'ex ma'ili' a káate'ex ti'e'.

⁹Te'exe' payalchi'inene'ex beya': C Yuum yanech te j ca'ano', quili'ichcunsa'ac a kaaba'.

¹⁰Talac a ajawil. Beeta'ac ba'ax a káat way lu'ume' je'el bix u beeta'al te j ca'ano'.

¹¹Dzáa to'on bejela'e' le waaj kabéet ti' to'on sáamsamalo'.

¹²Sa'ates to'on le kaas dzo'oc c beetico', je'el bix to'on c sa'atsic le máaxo'ob cu beetic to'on kaaso'.

¹³Ma' a cha'ic c lúubul ti' túuntaj óolal, ba'ale' toco'on ti' kaas. Tumen a ti'al le ajawilo', le páajtalilo' yéetel le nojbe'enilo' u ti'al kiino'ob mina'an u xuul. Amen.

¹⁴Tumen wa te'ex ca sa'atsique'ex le kaas cu beeta'al te'ex tumen máaco'obe', bey xan te'ex bíin sa'atsa'ac a si'ipile'ex tumen a Taataex yaan te j ca'ano',

¹⁵ba'ale' wa ma' táan a sa'atsique'ex le máaxo'ob cu si'ipil ti' te'exo', bey xan a Taataex ma' bíin u sa'ates a si'ipile'exi'.

¹⁶Te'exe' le quéen su'ukinaque'exe' ma' a cha'ique'ex u okom óolta'al a wiche'ex je'el bix u beetic le j ca'a p'éel icho'obo'; tumen leti'obe' bey u beetico'obo' u ti'al ca ila'ac tumen máaco'ob táan u su'ukino'ob. Tu jaajil quin wa'alic te'exe', dzo'oc u kamico'ob u bo'olalo'ob beyo'.

¹⁷Ba'ale' teche' le quéen su'ukinaqueche', p'o'o a wich yéetel qui'ibocquint a pool,

¹⁸u ti'al ma' u kajóolta'al tumen máaco'ob wa táan a su'ukin. A Taata máax yaan tu juunal ta wéetelo', chéen leti' cun ilic, leti'e' bíin u dzáa teech a bo'olal.

¹⁹Ma' a much'quintique'ex ayikalilo'ob way lu'ume', tu'ux cu kascunaj kamas yéetel tu'ux cu cuuxumtal tuláacal ba'al, cu pa'abal najo'ob tumen j oocolo'ob u ti'al u yoocolo'ob.

²⁰Ba'ale' much'quinte'ex ayikalilo'ob te j ca'ano', tu'ux ma' tu kascunaj kamas mix cu cuuxumtal mix ba'al, mix xan tu pa'abal najo'ob tumen j oocolo'ob u ti'al u yoocolo'ob.

²¹Tumen tu'ux yaan a ayikalile'exe', ti' bíin yanac a pucsi'ikale'exi'.

²²A wicho'obe' bey jun p'éel sáasil ti' a wíinclile'; bey túuno' wa ma'alobtac a wicho'obe', tuláacal a wíinclile' yaan u yantal sáasil ti';

²³ba'ale' wa ma' ma'alobtac a wicho'obe', tuláacal a wíinclil cun yantal ich éekjoch'e'enil. Le beetique' wa éekjoch'e'en le sáasil yaan techo', ¡Buca'aj túun booxil le éekjoch'e'enilo'!

²⁴Mix máac cu páajtal u meyajtic ca'a túul dzuul, tumen bíin u p'ect jun tuli' yéetel bíin u yaabilt u láak; wa, bíin u bisubáa yéetel jun túule' yéetel bíin u cúulpachcunt u láak. Ma' tu páajtal a meyajtique'ex Ku wa táan a meyajtique'ex le taakino'.

²⁵Quin wa'alic túun te'exe': Ma' a sen tuucule'ex tu yo'olal a cuxtale'ex, ba'ax can a jaante'ex wa ba'ax can a wuke'ex, mix tu yo'olal a wíinclile'ex, ba'ax can a búuquinte'ex. ¿Ma' wa asab yaan u tojol le cuxtal ti' le janalo', bey xan le wíinclil ti' le nooko'?

²⁶Pacte'ex le ch'íich'o'ob cu xiknalo'obo', ma' tu paakalo'ob mix tu jocho'ob, mix teech u líikesico'ob u yich paakal ti' ch'iilo'ob, ba'ale' a Taata eex yaan te j ca'ano' leti' tzéentico'ob. ¿Ma' wa asab yaab a tojole'ex ti' le ch'íich'o'obo'?

²⁷¿Máax ti' ichile'ex je'el u páajtal u asab ca'analcunsic u wíinclil chéen iquil u sen tuucule'?

²⁸¿Ba'ax ten ca sen tucultique'ex ba'ax can a búuquinte'ex? Ile'ex bix u ch'íijil u nicte'ilo'ob káax, ma' tu meyajo'ob mix tu chuyo'ob.

²⁹Ba'ale' jach tu jaajil quin wa'alic te'exe', mix ajaw Salomón, yéetel tuláacal u co'ocoj nooko'obe' tu búucbesubáa je'el bix jun cúul ti' le nicte'obo'.

³⁰Wa Ku bey u búucbesic le xíiw bejela'e' ti' yaan te j káaxo', sáamal cu tóoca'ale'. ¿Ma' wa je'el u beetic asab yaab utz ti' te'ex, jun p'íit ocsaj óol wíinique'ex?

³¹Le beetique' ma' a sen tuucule'ex táan a wa'alique'ex: ¿Ba'ax c bíin jaante?, wa ¿Ba'ax c bin uke? wa ¿Ba'ax c bin búuquinte?

³²Tumen u cajnáalilo'ob le yóokolcaaba' cu caxtico'ob tuláacal le ba'alo'oba', ba'ale' te'exe' yaan te'ex jun túul Taata te j ca'ano' u yojel kabéet te'ex tuláacal le ba'alo'oba'.

³³Bey túuno' caxte'ex táanil u ajawil Ku yéetel le toj cuxtal utz tu t'aan leti'o', tuláacal túun le ba'alo'oba' bíin dza'abac te'ex xan.

³⁴Ma' a sen tucultique'ex túun u kiinil sáamal, tumen u kiinil sáamale' yaan u kuchul yéetel sen tuuculilo'ob. Tuláacal kiine' cu kuchul yéetel yaayam óolalo'ob.