Read Yucateco San Marcos 10 Bible Online

San Marcos 10 - Yucateco bible

San Marcos 10

¹Jesuse' j luk Capernaum ca j bin tu lu'umil Judea yéetel ti' le lu'um yaan tu j lakin u ja'il Jordano'. J much'laj tu ca'a téen le máaco'obo' te tu'ux yaan leti'o', ca tu ca'ansajo'ob tu ca'a téen je'el bix suuc ti'e'.

²Tu nadzajuba'ob túun dze'edzec ti' le fariseob tu yicnal Jesuso' tu yo'olal u beetico'ob u lúubul ti' kass. Ca tu káat chi'ito'ob ti' wa tu beel ca u p'at u yatan jun túul íichamtzil.

³Leti' túune' tu núucaj ti'ob: ¿Ba'ax tu tzolbe'en t'antaj Moisés?

⁴Leti'obe' tu ya'alajo'ob: Moisese' tu cha'aj u dza'abal ti' le atantzilo' u ju'unil p'atbáil, beyo' cu p'a'atal.

⁵Jesús tu ya'alaj túun ti'ob: Moisese' tu dzaj te'ex le tzolbe'en t'aano' tumen chich a pucsi'ikale'ex.

⁶Ba'ale' ti' u cáajbale', le ca tu beetaj Ku tuláacal ba'ale', tu beetaj xiib bey xan co'olel.

⁷Le o'olale', le xiibo' yaan u p'atic u taata yéetel u maamae' u ti'al u nupcubáa yéetel u yatan,

⁸tu ca'a túulil túun bíin jun p'éelchajco'ob. Bey túuno' ma' ca'a túulo'obi', ba'ale' chéen jun túulilo'ob.

⁹Le o'olale', mix máac u najmal u jatzic ba'ax nupa'an tumen Ku.

¹⁰Le ca j ooco'ob ich naje', u aj canbalo'obe' tu káat chi'itajo'ob ti' tu ca'a téen le ba'alo'oba'.

¹¹Jesuse' tu ya'alaj ti'ob: Le máax cu p'atic u yatan u ti'al u dzo'ocol u beel yéetel u láak co'olele', táan u núup keban.

¹²Wa le co'olel cu p'atic u yíicham u ti'al u dzo'ocol u beel yéetel u láake', leti' xane' táan u núup keban.

¹³J taasa'ab túun tu yicnal Jesús dze'edzec mejen paalalo'ob u ti'al ca u péedzkato'ob; ba'ale' u aj canbalo'obe' jo'op' u keyico'ob le máaxo'ob taasico'obo'.

¹⁴Le ca tu yilaj Jesús lela', j kuxinaji' ca tu ya'alaj ti'ob: cha'ex u taal le mejen paalalo'ob tin wicnalo', ma' a wet'ique'ex ti'ob, tumen u Ajawil Kue' u ti'al le máaxo'ob je'el bix leti'obo'.

¹⁵Tu jaajil quin wa'alic ti' te'exe', le máax ma' tu kamic u Ajawil Ku je'el bix u ka'amal tumen jun túul chaan pale', ma' bíin ocoqui'.

¹⁶Ca tu méekajo'ob, ca tu qui'iqui' t'antajo'ob, táan u dzáic u kab tu yóokolo'ob.

¹⁷Le ca jóok u binbal Jesuse', áalcabil taalic jun túul máac, ca j xolaj tu táan ca tu káat chi'itaj ti': Utzil aj ca'anbesaj, ¿ba'ax unaj in beetic u ti'al ca yanac teen le cuxtal mina'an u xuulo'?

¹⁸Jesuse' tu ya'alaj ti': ¿Ba'axten ca wa'alic utzen? Chéen yaan jun túulili' máax utz, leti'e' Ku.

¹⁹Teche' a wojel le a'almaj t'aano'obo': Ma' núup keban. Ma' a quíimsic wíinic. Ma' a woocol. Ma' a tus. Ma' a beetic kaas ti' mix máac. Tzic a taata yéetel a maama.

²⁰Le máaco' tu núucaj ti': Aj ca'anbesaj, palili'en ca jo'op' in dzo'ocbesic tuláacal lela'.

²¹Jesuse' tu pactaj yéetel yaacunaj ca tu ya'alaj ti': Jun p'éel ba'al u bin teech: xeen, con tuláacal ba'ax yaan teche' ca a dzáa ti' le óotzilo'obo'; bey túuno' bíin yanac ti' teech ayikalil te j ca'ano'. Cu dzo'ocole', co'oten, ca taalaquech tin paach, quex u tojolt teech a cuxtal.

²²Ba'ale' le ca tu yu'ubaj lela', le máaco' jech jelpaj u yich ca j bin yéetel okom óolal, tumen jach ayikal.

²³Jesuse' j paacatnaj túun tu bakpache', ca tu ya'alaj ti' u aj canbalo'ob: ¡Jach istiquiaj u yocol le ayikalo'ob tu Ajawil ku!

²⁴Le aj canbalo'obo' ja'ak u yóolo'ob tu yo'olal le u t'aano'oba', ba'ale' Jesuse' tu ya'alaj ti'ob tu ca'a téen: Paalale'ex, ¡Jach istiquiaj u yocol tu ajawil Ku le máaxo'ob u dzaama u yóolo'ob ti' ayikalilo'obo'!

²⁵Asab séeba'an je'el u máan jun túul camello tu jool jun p'éel púudze', ma' ca ococ jun túul ayikal tu ajawil Ku.

²⁶Le ca tu yu'ubajo'ob lela', sen ja'ak u yóolo'ob ca tu káatajo'ob tu baatzilo'ob: Bey túuno'. ¿Máax je'el u páajtal u to'ocole'?

²⁷Ca j pacta'abo'ob tumen Jesuse' ca j a'ala'ab ti'ob: Máaco'obe' ma' tu yutztal u beetico'ob lela', ba'ale' Kue' je'ele'. Tumen mina'an mix ba'al talam u ti'al Ku.

²⁸Pedroe' tu ya'alaj ti' Jesús: Yuumtzil, to'one' dzo'oc c p'atic tuláacal ba'ax yaan to'on, yéetel dzo'oc c taal ta paach.

²⁹Jesuse' tu núucaj ti': Tu jaajil quin wa'alic te'ex, je'el máaxac ca u p'at u yotoch, wa u sucu'uno'ob, wa u quiico'ob, wa u taata, wa u maama, wa u yatan, wa u paalalo'ob, wa u lu'umo'ob tin wo'olale' wa tu yo'olal le u ma'alob péectzilil le tocsajilo',

³⁰yaan u kamic way yóokol le lu'um ti' le kiino'oba' ciento u téenel asab ya'abil: najo'ob, sucu'uno'ob, quiico'ob, maamaob, paalal yéetel lu'umo'ob, quex yéetel ch'a'apachtajilo'ob; yéetel ti' le ca'anil lu'um cu taalo' yaan u kamic cuxtal mina'an u xuul.

³¹Ba'ale' ya'ab ti' le máaxo'ob táanilbe'eno'ob bejela'a' bíin p'áataco'ob tu dzo'oc; yéetel ya'ab ti' le máaxo'ob pachilcunta'ano'ob bejela'a', yaan u máano'ob táanil.

³²Ti' yano'ob ti' le bejo' táan u bino'ob Jerusalén, Jesuse' táanil cu bin ti' le u aj canbalo'obo'. Leti'obe' jaka'an u yóolo'ob, táan u bino'ob tu paach yéetel sajaquilil. Bey túuno' Jesuse' tu ca'a t'aanaj le doce aj canbalo'obo', ca jo'op' u ya'alic ti'ob tu ca'a téen ba'ax cu bin úuchul ti'.

³³Tu ya'alaj ti'ob: Je'el bix ca wilique'exa', táan c bin Jerusalén, tu'ux cu bin kubbil u Paal Máac tu kab u nojchilo'ob le aj kiino'obo' yéetel ti' u aj ca'anbesajilo'ob le a'almaj t'aano'. Lelo'oba' leti'ob cu bin kubic u ti'al ca quíimsa'ac tumen le táanxel lu'umil máaco'ob.

³⁴Yaan u p'a'astico'ob, u jadzico'ob, u túubico'ob yéetel u quíimsico'ob. Ba'ale' tu yóox p'éel kiine' yaan u ca'a púut cuxtal ichil le quimeno'obo'.

³⁵Jacobo yéetel Juan, u paalalo'ob Zebedeoe', tu nadzajuba'ob tu yicnal Jesús ca tu ya'alajo'ob ti': Aj ca'anbesaj, c káat ca a beet to'on le utz c bin c káat techa'.

³⁶Leti' túune' tu ya'alaj ti'ob: ¿Ba'ax a káate'ex ca in beete'?

³⁷Tu ya'alajo'ob ti': Tu kiinil a kamic a Ajawile' beet ca culaco'on jun túule' ta x no'oj, u láake' ta x dzíic.

³⁸Jesuse' tu ya'alaj ti'ob: Te'exe' ma' a wojele'ex ba'ax ca káatique'exi'. ¿Cu páajtal wa a wukique'ex le ukul bíin in wuko', yéetel a kamique'ex le ocja' bíin in kamo'?

³⁹Leti'obe' tu núucajo'ob: C páajtal. Jesuse' tu ya'alaj ti'ob: Tu jaajile' yaan a wukique'ex le ukul bíin in wuko', y éetel yaan a kamique'ex le ocja' bíin in kamo'.

⁴⁰Ba'ale' le a cutale'ex tin x no'oj wa tin x dzíico', tene' ma' tu yutztal in dzáic, ba'ale' bíin dza'abac ti' máaxo'ob nu'uc ta'an u dza'abalo'.

⁴¹Le u láak diez aj canbalo'obo', le ca tu yu'ubajo'ob lela', j kuuxilnajo'ob ti' Jacobo' yéetel Juan.

⁴²Ba'ale' j t'a'ano'ob tumen Jesús, ca j a'ala'ab ti'ob: Je'el bix a wojlile'exe', le máaxo'ob cu nojba'alcunticuba'ob te j caajo'obo' cu beticuba'ob u yuumil tu yóokolo'ob. Bey xan u nuuctaquil ichilo'obo' cu ye'esico'ob u páajtalil tu yóokolo'ob.

⁴³Ba'ale' ma' bey cu bin úuchul ichile'exi'. Tumen ichile'exe' le máax u káat u nojochcuntubae', unaj u meyajtic le u láako'obo'.

⁴⁴Le máax ti' ichile'ex u káat u tanilcuntubae', unaj u palitzilta'al tumen tuláacal.

⁴⁵Tumen tac u Paal Máaque' ma' j taal u ti'al ca meyajta'aqui', ba'ale' u ti'al meyaj yéetel u ti'al u dzáa u cuxtal bey jun p'éel bo'ol u ti'al tocsajil ti' ya'abcach máaco'obe'.

⁴⁶J kucho'ob tac Jericó. Táan ca'ach u jóokol Jesús ti' le caaj yéetel u aj canbalo'ob yéetel xan ya'abcach máaco'ob. Culucbal tu tzéel le bejo' jun túul ch'óop, Bartimeo u kaaba', u paal Timeo, táan u káat yaatzil.

⁴⁷Le ca tu yu'ubaj táan u náadzal Jesús Nazaretile', le ch'óopo' jo'op' u yawat: Jesús, u Paal David, ch'a'aten óotzilil.

⁴⁸J ke'ekeya'ab tumen ya'abcach máaco'ob u ti'al ca u mac u chi', ba'ale' leti'e' láili' j awatnaj jach ka'ame': U Paal David, ch'a'aten óotzilil.

⁴⁹Je'el túun Jesuse' ca tu ya'alaj: T'ane'ex. Ca j t'a'an le ch'óopo' ca tu ya'alajo'ob ti': Yanac a wóol, líiken, tumen táan u t'anquech.

⁵⁰Leti' túune' tu píicch'intaj u teep'e' ca j síit'naje', ca tu nadzajubáa tu yicnal Jesús.

⁵¹Jesuse' tu káat chi'itaj ti': ¿Ba'ax a káat ca in beet ti' teech? Le ch'óopo' ca tu núucaj ti': Aj ca'anbesaj, in káat paacat.

⁵²Jesuse' tu ya'alaj ti': Cu páajtal a bin. Dzo'oc a wutztal, tumen ocsaj óolnajech. Ti' le jun súutuco' le ch'óopo' j páatji u paacat ca bin tu paach Jesús ti' le bejo'.