Read Yucateco San Marcos 15 Bible Online

San Marcos 15 - Yucateco bible

San Marcos 15

¹Le ca j sáasjie', u nuuctaquil le aj kiino'obo' tu much'uba'ob yéetel le anciano'obo', u aj ca'anbesajilo'ob le a'almaj t'aano' yéetel tuláacal u yéet nuuctaquilo'obo'. Ca tu bisajo'ob Jesús kaxa'an, ca tu kubajo'ob ti' Pilato'.

²Pilatoe' tu káat chi'itaj ti': ¿Teech wa u ajaw le judíobo'? Jesuse' tu núucaj ti': Beyo', je'el bix ta wa'alajo'.

³Le u nuuctaquil le aj kiino'obo' tu tacajo'ob u pool tu yo'olal ya'abcach ba'alo'ob.

⁴Bey túuno' Pilatoe' tu ca'a káat chi'itaj ti', táan u ya'alic: ¿Ma' ta núuquic mix ba'al? Il tu yo'olal buca'aj ba'alo'ob cu taquico'ob a pool.

⁵Ba'ale' Jesuse' ma' tu núucaj mixba'ali'. Bey túuno' Pilatoe' ma' tu caxtaj ba'ax u tuculti'.

⁶Suuca'an ti' Pilato u jáalkabtic jun túul máac kala'an ti' u kiinilo'ob le kiinbesajo', je'el máacalmáac ca káata'ac tumen le máaco'obo'.

⁷Kala'an túun jun múuch' yéetel u láak máaco'obe' jun túul máac u kaaba'e' Barrabás; lelo'oba' u quíimsmajo'ob wíinico'ob ti' jun p'éel líiksaj óolal.

⁸Le máaco'obo' j taalo'ob ca jo'op' u káatico'ob ti' Pilato ca u beet je'el bix sucja'anil ti'e'.

⁹Pilatoe' tu núucaj ti'ob: ¿A káate'ex ca in jáalkabt u Ajaw le Judiobo'?

¹⁰Tumen leti'e' táan u yilic j ku'ub Jesús tu yo'olal u p'eca'anil tumen le u nuuctaquil le aj kiino'obo'.

¹¹Ba'ale' u nuuctaquil le aj kiino'obo' tu p'u'ujsajo'ob u yóol le máaco'obo' u ti'al ca u káato'ob ca jáalkabta'ac Barrabás.

¹²Pilatoe' tu káataj ti'ob tu ca'a téen: ¿Ba'ax a káate'ex ca in beet yéetel le ca wa'alique'ex u ajaw le judíobo'?

¹³Leti'ob túune' tu yawat núucajo'ob: ¡Quiimsa'ac ti' cruz!

¹⁴Pilatoe' tu ya'alaj ti'ob: ¿Ba'ax kaasil u beetmaj? Ba'ale' leti'obe' tu yawat a'alo'ob tu ca'a téen: ¡Quíimsa'ac ti' Cruz!

¹⁵Pilatoe' tu yóoltaj túun yantal ma'alob tu táan le máaco'obo' ca tu jáalkabtaj Barrabás. Cu dzo'ocol u túuxtic jadzbil Jesuse', tu kubaj u ti'al ca quíimsa'ac ti' cruz.

¹⁶Le aj ba'atelo'ob túuno' tu bisajo'ob Jesús tu táancabil le chúumuc najo' ca tu láaj much'ajuba'ob tu yicnal.

¹⁷Ca tu búucbesajo'ob yéetel jun p'éel chacjome'en nook, bey xan tu dzajo'ob tu pool jun p'éel péet jo'ol jit'a'an yéetel ki'ix.

¹⁸Ca jo'op' u yawtico'ob ti': ¡Papaxkabta'ac u ajaw le judíobo'!

¹⁹Cu dzo'ocole' tu ko'okolajo'ob u pool yéetel jun p'éel che', yéetel tu túubajo'ob; xolajo'ob xan tu táan u ti'al u chíinpoltico'ob.

²⁰Cu dzo'ocol u p'a'astico'obe' tu lukesajo'ob le chacjome'en nook ti'o' ca tu dzajo'ob u nook. Cu dzo'ocole' tu jóokesajo'ob u ti'al u quíimsico'ob ti' cruz.

²¹Jun túul cireneil máac, Simón u kaaba', u taata Alejandro yéetel Rufoe', táan u yúul káax, ca tu beetajo'ob u cuchic u cruz Jesús.

²²Tu bisajo'ob Jesús ti' jun p'éel cúuchil u kaaba'e' Golgota, u káat ya'ale' u Cúuchil Baaquel Pool.

²³Ca tu dzajo'ob vino ti' xa'akta'an yéetel Mirra, ba'ale' Jesuse' ma' tu yukaji'.

²⁴Ca tu sinajo'ob Jesús ti' cruz. Le aj ba'atelo'obo' tu bulajo'ob ichilo'ob u nook Jesús, u ti'al ca u yilo'ob ba'ax cu bin u ti'alint jujun túulil.

²⁵Las nueve kiin ca tu sinajo'ob ti' cruz.

²⁶J dzaab tu yóokol le cruzo' jun p'éel dzíib iquil u tzo'olol ba'ax o'olal cu quíimsico'ob. Le dzíibo' cu ya'alic beya': U ajaw le judíobo'.

²⁷yéetel leti'e' tu sinajo'ob ti' cruz ca'a túul j oocolo'ob, jun túul tu x no'oji', u láake' tu x dzíic.

²⁸Bey dzo'ocbesa'abic le Quili'ich Dzíib cu ya'alic beya': J xo'oc ichil le kaakas máaco'obo'.

²⁹Le máaxo'ob cu máano'obo' cu poch'ico'ob Jesús, cu yúuntico'ob u poolo'ob, táan u ya'alico'ob: ¡Je'elo'! Teech ca jenic le kulnajo', yéetel ca líikesic tu ca'a téen ichil óox p'éel kiine',

³⁰tocabáa, éemen ti' le cruzo'.

³¹Bey xan u nuuctaquil le aj kiino'obo' yéetel u aj ca'anbesajilo'ob le a'almaj t'aano' tu p'a'astajo'ob, táan u ya'alico'ob tu baatzilo'ob: Tu tocaj u láako'ob, ba'ale' leti'e' ma' tu páajtal u toquicubáa.

³²Wa le Cristo u ajaw le judíobo', c ilic u yéemel ti' le cruz beoraa', bey túuno' je'el c ocsaj óoltique'. J po'och' xan tumen le sina'ano'ob ti' cruz tu yéetelo'.

³³Le ca j kuch chúumuc kiine', éekjoch'e'enchaj tuláacal lu'um tac las tres u binbal kiin.

³⁴Ti' le horao' Jesuse' tu ka'am a'alaj: Eloi, Eloi, ¿Lama sabactaní? u káat ya'ale': In Ku, in Ku. ¿Ba'axten dzo'oc a p'atiquen?

³⁵Dze'edzec ti' le yano'ob te'elo' tu yu'ubajo'ob lela' ca tu ya'alajo'ob: U'uye'ex, táan u t'anic aj bóobat Elías.

³⁶Jun túul ti' leti'obe' áalcabnaj túun, cu dzo'ocol u ch'ulic jun p'éel esponja yéetel su'udz vinoe, tu dzaj ti' jun p'éel chowac che'e, ca tu nadzaj ti' u ti'al u yuke, táan u ya'alic: Cha'ex, co'ox ilic wa cu taal Elías éemsic.

³⁷Jesuse' j ka'am awatnaje' ca j quíimi'.

³⁸U cortinail le kulnajo' jáat chúumuc, ca'anal tac cabal.

³⁹Le máax cu canano' wa'alacbal actáan ti' Jesuse', le ca tu yu'ubaj bix awatnajic yéetel bix quíimique', tu ya'alaj: Tu jaajile' le máaca' u Paal Ku.

⁴⁰Bey xan yaan dze'edzec co'olelo'ob táan u pactico'ob náachil, le ba'ax cu yúuchulo'; ichilo'obe' ti' yaan María Magdalena, Salomé, yéetel María u maama Jacobo le chichano' yéetel José.

⁴¹Le co'olelo'oba' tu tzaypachtajo'ob, yéetel tu yáantajo'ob Jesús le ca'ach táan u xíimbaltic Galileao'. Bey xan yaan ca'ach te'elo' u láak ya'abcach co'olelo'ob j bino'ob yéetel Jesús tac Jerusalén.

⁴²Ti' le oca'an kiino', tumen u kiinil le nu'uctajilo', u káat u ya'ale', naadz yanil u kiinil sábado,

⁴³J taal José Arimateail, jun túul máac nojoch ichil le u múuch'ul le nuuctaquilo'obo', máax táan u pa'atic u ajawil Ku. Ca j ooc x ma' sajaquil tac tu'ux yaan Pilato, ca tu káataj u wíinclil Jesús ti'.

⁴⁴Pilatoe' ja'ak u yóol ca tu yu'ubaj dzo'oc u quíimil Jesús, ca tu t'anaj le aj ba'atelo' u ti'al u káat chi'itic ti' wa tu jaajil beyo'.

⁴⁵Le ca j a'ala'ab tumen le aj ba'atel jaaj dzo'oc u quíimile', Pilatoe' tu dzaj le wíinclil ti' Joseo'.

⁴⁶Josee' tu manaj túun jun p'éel ma'alob sac nooke', ca tu yéemsaj le wíinclilo', ca tu to'aj yéetel. Cu dzo'ocole' tu dzaj ti' jun p'éel mucnal pota'an ti' tuunich, ca tu balkesaj jun p'éel tuunich tu jool le mucnalo'.

⁴⁷María Magdalena yéetel María u maama Josee' tu yilajo'ob tu'ux j mu'uqui.