Read Yucateco San Marcos 16 Bible Online

San Marcos 16 - Yucateco bible

San Marcos 16

¹Le ca j máan u kiinil sábadoe', María Magdalena, Salomé yéetel María u maama Jacoboe' tu manajo'ob qui'iboc ja' u ti'al u ji'ikabtico'ob u wíinclil Jesús.

²Jach tu ja'atzcabil u yáax kiinil le semanao', j kucho'ob te j mucnalo', dzo'oquili' u jóokol kiine'.

³Táan u ya'alico'ob tu baatzilo'ob: ¿Máax cu bin lukesic le tuunich yaan tu jool le mucnalo'?

⁴Ba'ale' le ca tu pactajo'obe' tu yilajo'ob le nojoch tuunich iquil maca'anil ca'ach le mucnalo' mina'an tu cúuchil.

⁵J ooco'ob te j mucnalo', ca tu yilajo'ob jun túul táanquelem máac culucbal tu x no'ojil le mucnalo', u búuquintmaj jun p'éel chowac sac nook, ca ja'ak u yóolo'ob.

⁶Ba'ale' le ti'e' tu ya'alaj ti'ob: Ma' u ja'akal a wóole'ex. te'exe' táan a caxantique'ex Jesús Nazaretil máax j quíimsa'ab ti' cruz. Ba'ale' leti'e' dzo'oc u ca'a púut cuxtal. mina'an waye'. Ile'ex le cúuchil tu'ux j dzaabo'.

⁷Xeene'ex ca a wa'ale'ex ti' u aj canbalo'ob yéetel ti' Pedroe' leti'e' táan u bin táanil ti' te'ex tac Galilea. Ti' can a wile'exi', je'el bix tu ya'alaj te'exo'.

⁸Le co'olelo'ob túuno' j bino'ob táan u púudzulo'ob ti' le mucnalo', tumen táan u quiquilanquilo'ob jaka'anil u yóolo'ob. Ma' tu ya'alajo'ob mix ba'al ti' mix máaqui', tumen j sajacchajo'ob.

⁹Cu dzo'ocol u ca'a púut cuxtal Jesús tu ja'atzcabil u yáax kiinil le semanao', j chíicpaj táanil ti' María Magdalena, ti' máax tu jóokesaj siete kaakas pixano'ob.

¹⁰Leti'e' j bine' ca tu dzaj u péectzil ti' le máaxo'ob j máano'ob yéetel Jesús, máaxo'ob okomtac u yóolo'ob yéetel táan u yokolo'obo'.

¹¹Le ca tu yu'ubajo'ob cuxa'an Jesús, yéetel dzo'oc u yila'al tumen María Magdalenae', ma' tu yocsaj óolto'obi'.

¹²Cu dzo'ocol lela', Jesuse' chíicpaj jela'an ti' ca'a túul u aj canbalo'ob táan u bino'ob xíimbalil káax.

¹³Leti'obe' j bino'ob ca tu dzajo'ob u péectzilil ti' le u láak j canbalo'obo'. Ba'ale' mix u t'aan leti'ob ocsaj óolta'abi'.

¹⁴Cu dzo'ocole' Jesuse' chíicpaj ti' u once aj canbalo'ob, ca'aliquil culucbalo'ob te j mesao'. Ca tu keyajo'ob tu yo'olal u x ma' ocsaj óolalilo'ob yéetel tu yo'olal u chichil u pucsi'ikalo'ob, tumen ma' tu yocsaj óoltajo'ob u t'aan le máaxo'ob dzo'oc u yilico'ob leti'e' ca'a púut cuxa'an.

¹⁵Ca tu ya'alaj ti'ob: Xeene'ex ti' tuláacal yóokolcaab, yéetel tze'ecte'ex u ma'alob péectzil le tocsajila' ti' tuláacal máac.

¹⁶Le máax cu yocsaj óoltic yéetel cu yocja'e, cu to'ocol. Ba'ale' le máax ma' tu yocsaj óoltique', cu xot kinta'al.

¹⁷Le chíiculalo'ob cu bin ilbil ti' le máaxo'ob tu yocsaj óolo'obo', leti' lelo'oba': Tin kaaba' bíin u jóokeso'ob kaakas pixano'ob; yaan u t'anico'ob túumben t'aano'ob;

¹⁸wa cu machico'ob caano'ob yéetel wa cu yukico'ob loolob ukule', ma' táan u yúuchul mix jun p'éel loob ti'ob. Bey xan yaan u dzáic u kabo'ob yóokol le koja'ano'obo', lelo'oba' cu yutztalo'ob.

¹⁹Cu dzo'ocol u t'aan yéetelo'obe', Yuumtzil Jesuse' j bisa'ab ca'an, ca j culaj tu x no'oj kabil Ku.

²⁰Leti'ob túune' jóoko'ob, ca tu tze'ecto'ob le ma'alob péectzil tuláacal tu'uxo', Yuumtzile' tu yáantajo'ob, bey xan tu jaajcuntaj le ma'alob péectzilo' yéetel le chíiculalo'ob tu beetajo'. Ca béeyac.