Read Yucateco San Marcos 6 Bible Online

San Marcos 6 - Yucateco bible

San Marcos 6

¹Jesuse' j luk te'elo' ca j suunaj tu lu'um, u aj canbalo'obe' j bino'ob yéetel.

²Le ca j kuch u kiinil sábadoe', chu'unpaj u ca'ansaj te j sinagogao'. ya'ab ti' le máaxo'ob j u'uyo' ja'ak u yóolo'ob ca tu ya'alajo'ob: ¿Tu'ux tu canaj le máac tuláacal le ba'alo'oba'? ¿Ba'ax le sen na'at dza'an ti'a'? ¿Cux le chíiculalo'ob cu beetica'?

³¿Lela' ma' wa leti' le carpintero u paal María yéetel u sucu'un Jacobo, José, Judas yéetel Simón? ¿Ma' wa way cajnáalo'ob xan ichilo'on u x ch'upul íidzino'obe? Le t o'olale' tu kéex óoltajo'ob.

⁴Ba'ale' Jesuse' tu ya'alaj ti'ob: Jun túul aj bóobate' cu yaabilta'al tumen tuláacal máaco'ob, ba'ale' ma' tu yaabilta'al; tumen u yéet caajalo'ob, u láako'ob, mix tumen u yéet otochnáalo'ob.

⁵Ma' j páatji u beetic mix jun p'éel chíiculal te'elo', chéen tu dzaj u kab yóokol dze'edzec koja'ano'ob ca tu dzaj u toj óolalo'ob.

⁶Leti'e' jaka'an u yóol tumen leti'obe' ma' tu yocsaj óoltico'ob. Cu dzo'ocole' Jesuse' tu xíimbaltaj le mejen caajo'ob naadztaco'obo' táan u ca'anbesaji'.

⁷Ca tu t'anaj le doce aj canbalo'obo', ca jo'op' u túuxtico'ob ca'a ca'a túulil, ca tu dzaj páajtalil ti'ob u ti'al u jóokesico'ob le kaakas pixano'obo'.

⁸Ca tu ya'alaj ti'ob ma' u bisico'ob mix ba'al bej, chéen u xóolte'ob. Ma' u unaj u bisico'ob sáabucani', mix waaj, mix taakin.

⁹Unaj u dzáico'ob xanab kéewel yéetel chéen jun wal u nook ma' ca'a p'éeli'.

¹⁰Ca tu ya'alaj ti'ob: Le quéen ocoque'ex ti' jun p'éel naje', ti' a p'áatale'exi' ca'aliquil ma' xi'ique'ex táanxeli'.

¹¹Wa yaan tu'ux ma' ta ka'amle'ex, mix u káato'ob u yu'ubo'obe'exe', jóokene'exi', tíite'ex u lu'umil a wooque'ex u ti'al chíiculal ti'ob. Tu jaajil quin wa'alic ti' te'exe' tu kiinil p'is óole' asab ya'ab cu bin j mukyaj u cajnáalilo'ob le caajo' ti' sodomailo'ob yéetel gomorrailo'ob.

¹²Leti'ob túune' jóoko'obe' ca tu tze'ectajo'ob kabéet u kexic u tuucul máaco'ob.

¹³Tu jóokeso'ob xan ya'abcach kaakas pixano'ob, ca tu ji'ikabto'ob yéetel aceite ya'abcach koja'ano'obe', ca j tojchaj u yóolo'ob.

¹⁴Ajaw Herodese' tu yojéeltaj lela', tumen u ma'alob péectzilil Jesuse' j ki'itpaj tuláacal tu'ux. Ca tu ya'alaj Herodes: Dzo'oc u ca'a púut cuxtal Juan Bautista ti' ichil le quimeno'obo'; le o'olale' yaan le páajtalil ti'a'.

¹⁵U láak máaco'obe' cu ya'alico'ob: Lela' aj bóobat Elías. Yaan u láak máaco'obe' cu ya'alico'ob: Lela' jun túul aj bóobat je'el bix le úuchben aj bóobato'obo'.

¹⁶Le ca tu yu'ubaj Herodes lela', tu ya'alaj: Lela' Juan, le máax tin túuxtaj cúulch'acbil u caale', bejela'e' dzo'oc u ca'a put cuxtal ti' ichil le quimeno'obo'.

¹⁷Tumen Herodese' tu túuxtaj kalbil Juan, ca j ka'ax yéetel cadena ti' le kalabilo' tu yo'olal Herodías. Tumen Herodiase' u yatan ca'ach Felipe u sucu'un Herodes, ba'ale' Herodese' tu ch'a'aj u ti'al ca cajlac yéetel.

¹⁸Juane' tu ya'alaj túun ti' Herodes: Ma' utz a cajtal yéetel u yatan u sucu'uni'.

¹⁹Herodías túune' jach u ch'a'ap'ectmaj Juan yéetel u káat u quiimse, ba'ale' ma' j páatchaji',

²⁰tumen Herodese' u yojéeltmaje' Juane' jun túul máac toj yéetel quili'ich u cuxtal, le o'olal u ch'a'amaj sajaquil ti'. Le beetique' ma' tu cha'aj u loobilta'al tumen le co'olelo'. Herodese', quex ma' tu jach na'atic le ba'ax cu ya'alic Juane', cu yu'ubic yéetel qui'imac óolal.

²¹Ba'ale' Herodiase' tu yilaj jun p'éel kiin jach ti'ibil le ca tu kiinbesaj Herodes u kiin u kaaba', tumen tu dzaj jun p'éel nojoch janal ti' tuláacal u jalachilo'ob, u nojocho'ob le aj ba'atelo'obo' yéetel u nojochilo'ob Galilea.

²²U x ch'upul paal Herodiase' j ooc ti' u cúuchil le nojoch janalo' ca j óokotnaji; le óokoto' j lúub jach utzil ti' Herodes yéetel ti' tuláacal le cu janalo'ob yéetelo'. Le ajawo' tu ya'alaj túun ti' le x ch'úupalo': Káat ti' teen je'el ba'alac a káate', tene' je'el in dzáic ti' teche'.

²³Ca tu jalach t'aantaj ti', je'el u dzáic je'el ba'alac ca u káate', tac táanchumuc le lu'um tu'ux cu beetic u jalachilo'.

²⁴Le x ch'úupalo' jóoke' ca tu ya'alaj ti' u maama: ¿Ba'ax je'el in káatic ti'e'? u maamae' tu ya'alaj ti': Káat u pool Juan Bautista ti'.

²⁵Tu séeblaquil j ooc le x ch'úupal tac tu'ux yaan le ajawo', ca tu ya'alaj ti': In káat u ca a dzáa ti' teen tu séeblaquil ti' jun p'éel platoe' u pool Juan Bautista.

²⁶Le ajaw túuno' jach j lúub u yóol; ba'ale' tumen u ya'almaj tu táan Ku yéetel u'uya'ab tumen u yu'ula'obe', ma' tu yóoltaj u ya'al ma'il ti' ba'ax káata'ab ti'i'.

²⁷Tu séeblaquil ajawe' tu túuxtaj jun túul aj ba'atel u ti'al taasic u pool Juan.

²⁸Le aj ba'atelo' j bin te j kalabilo', ca tu cúulch'actaj u caal Juan, ca tu dzaj ti' le x ch'úupalo', le x ch'úupalo' tu kubaj ti' u maama.

²⁹Le ca j ojéelta'ab tumen u j tzaypacho'ob Juane', tu ch'a'ajo'ob u wíinclil ca tu dzajo'ob ti' jun p'éel mucnal.

³⁰Cu dzo'ocole' Le aj canbalo'obo' j much'lajo'ob yéetel Jesús ca tu tzicbaltajo'ob ti' tuláacal ba'ax tu beeto'ob yéetel ba'ax tu ca'ansajo'ob.

³¹Jesuse' tu ya'alaj ti'ob: Co'otene'ex, co'ox je'elel jun p'íit ti' jun p'éel cúuchil jun páaycunta'an. Tumen ya'abcach máaco'ob cu bino'ob yéetel cu taalo'ob, mina'an u yorail mix u ti'al u janalo'ob.

³²Bey túuno' Jesús yéetel u aj canbalo'obe' j bino'ob tu juunalo'ob ti' jun p'éel cheem tac ti' jun páay cúuchil.

³³Ba'ale' ya'ab tu yilo'ob u bino'obe', ca tu kaj óoltajo'ob Jesús. Lelo'oba' jóoko'ob ti' tuláacal le caajo'obo' ca j bino'ob áalcabil tac te'elo', ca j kucho'ob táanil ti'ob.

³⁴Le ca jóok Jesús ti' le cheemo', tu yilaj ya'abcach máaco'ob, ca tu ch'a'aj óotzilil ti'ob, tumen beyo'ob j taman mina'an máax canantico'obe', ca jo'op' u ca'ansic ti'ob ya'abcach ba'alo'ob.

³⁵U ti'al u t'úubul kiine' u aj canbalo'obe' j taalo'ob ca tu ya'alajo'ob ti': Táan u t'úubul kiin, yéetel mix máac cajacbal ti' le cúuchila'.

³⁶Túuxt le máaco'obo' u ti'al ca xi'ico'ob ti' coolo'ob yéetel ti' mejen caajo'ob naadztaco'ob u ti'al u máano'ob waaj, tumen mina'an ba'al u jaanto'ob.

³⁷Ba'ale' Jesuse' tu núucaj ti'ob: Dza'ex ba'al u jaanto'ob. Leti'obe' tu ya'alajo'ob: ¿Cu páajtal wa c bin c man doscientos denarios waaj, u ti'al c dzáic ba'al u jaanto'ob?

³⁸Jesuse' tu ya'alaj ti'ob: ¿Jay p'éel waaj yaan ti' te'ex? Le ca tu yojéeltajo'obe', tu ya'alajo'ob ti': cinco waajo'ob yéetel ca'a túul cayo'ob.

³⁹Ca túun tu ya'alaj ca culac le máaco'obo' jujun múuch'il yóokol le ya'ax su'uco';

⁴⁰ca j culajo'ob jujun múuch' a cientoil yéetel a cincuentail.

⁴¹Ca túun tu machaj Jesús le cinco waajo'ob yéetel le ca'a túul cayo'obo' ca tu dzáa nib óolal ti' Yuum Ku. Tu xet'aj le waajo' ca tu dzaj ti' u aj canbalo'ob u ti'al ca u t'oxo'ob ti' le máaco'obo'. Tu t'oxaj xan le ca'a túul cayo' ti' tuláacal.

⁴²Tuláacal jaano'ob ca j na'ajchajo'ob.

⁴³Cu dzo'ocole' tu chupo'ob doce xaaco'ob yéetel u xéexet'al le waaj yéetel le cay j p'áato'.

⁴⁴Le máaxo'ob tu jaanto'ob le waajo' míin cinco mil máaco'ob.

⁴⁵Cu dzo'ocole' Jesuse' tu beetaj u yocol u aj canbalo'ob ti' le cheemo' u ti'al ca xi'ico'ob tac Betsaida táanil ti', tu táanxel tzéel le ka'anabo', ca'aliquil táan u yutzil túuxtic le máaco'obo'.

⁴⁶Le ca tu láaj utzil túuxtajo'obe' ca j bin paach pu'uc.

⁴⁷Le ca j áakabchaje', le cheemo' dzo'oc u kuchul chúumuc le ka'anabo', Jesuse' ti' yaan tu juunal lu'ume'.

⁴⁸Tu yilaj istiquiaj u bisico'ob le cheemo', tumen le iiko' actáan ti'ob u taal. U ti'al u sáastale' Jesuse' tu nadzajubáa ti'ob, táan u xíimbal yóokol le ja'o', óolac máanac táanil ti' leti'ob.

⁴⁹Le ca tu yilajo'ob táan u xíimbal yóokol le ja'o', tu tuclajo'ob jun túul ja'asaj óol, ca j awatnajo'ob;

⁵⁰tumen tuláacal j ile ca ja'ak u yóolo'ob. Ba'ale' leti'e' j t'aanaji' ca tu ya'alaj ti'ob: Yanac a wóole'ex, teen lela' ma' a sajactale'ex.

⁵¹Ca j na'ac ti' le cheem tu'ux yano'obo', ca jedzlaj le iiko'. Leti'ob túune' j p'áat jaajap u chi'ob yéetel jaka'an u yóolo'ob.

⁵²Tumen ma' tu na'atajo'ob u chíiculalil le waajo', tumen láili' dzu'uy u pucsi'ikalo'obe'.

⁵³Jóoko'ob táanxel tzéelil le ka'anabo' ca j kucho'ob tu lu'umil Genezaret, tu'ux tu káaxo'ob le cheem tu jáal ja'.

⁵⁴Jach le cu jóoklo'ob te j cheemo' ca j kaj óolta'ab Jesús tumen le máaco'obo'.

⁵⁵Ca j máano'ob ti' tuláacal le lu'umo', ca jo'op' u taasico'ob le koja'ano'ob ti' kóochche'ob tac tu'ux cu yu'ubico'ob u ya'ala'al ti' yaan Jesuso'.

⁵⁶Yéetel je'el tu'uxac ca ocoque', ti' mejen cajtalilo'ob, ti' caajo'ob wa ti' káaxo'obo', cu dza'abal le koja'ano'ob ti' le noj bejo' yéetel cu káat óoltico'ob ti' Jesús ca u cha'a u péedzkabto'ob quex chéen u chi' u nook; tuláacal túun le je'enquex tu péedzkabtajo'obo' j tojchaj u yóolo'ob.