Read Yucateco San Marcos 7 Bible Online

San Marcos 7 - Yucateco bible

San Marcos 7

¹Le fariseob yéetel dze'edzec ti' u aj ca'anbesajilo'ob le a'almaj t'aano' tu nadzajuba'ob tu yicnal Jesús, leti'obe' Jerusalén u taalo'ob.

²Tu yilajo'ob túun dze'edzec ti' u aj canbalo'ob Jesús táan u janalo'ob quex ma' tu p'o'aj u kabo'ob je'el bix cu ya'alic le a'almaj t'aano'. Le o'olale' jo'op' u ya'alico'ob ba'al.

³(Tumen le fariseob yéetel tuláacal le judíobo', cu beetico'ob ba'ax ca'ansa'an tumen u anciano'obo', ma' u janalo'ob wa ma' tu p'o'ic u kabo'ob ya'ab u téenel.

⁴Le o'olale' le quéen suunaco'ob dzo'oc u lukulo'ob kíiwique', yaan u p'o'icuba'ob u ti'al u janalo'ob je'el bix ca'ansa'anil ti'obe'. Yaan xan u láak ba'alo'ob suuc u beetico'ob, je'el bix u p'o'ico'ob u luuchilo'ob ukul, le p'úulo'obo', ch'óoyo'ob yéetel u nu'ucul u wenelo'ob.)

⁵Bey túuno' le fariseob yéetel u ca'anbesajilo'ob le a'almaj t'aano' tu káat chi'ito'ob ti': ¿Ba'ax teen a aj canbalo'obe' ma' tu dzo'ocbesico'ob u ya'almaj t'aan le anciano'obo'? ¿Ba'ax teen ma' tu p'o'aj u kabo'ob u ti'al u janalo'obi'?

⁶Jesuse' tu núucaj ti'ob: Tu beel ba'ax tu ya'alaj aj bóobat Isaías te'exe' j ca'a p'éel iche'ex, le ca tu dzíibtaj beya': Le máaco'oba' cu tziquiqueno'ob chéen yéetel u bóoxel u chi'ob, ba'ale' u pucsi'ikalo'obe' náach yaan ti' teen.

⁷Mix ba'al u biilal u tziquiqueno'ob, tumen u ca'ansajo'obe' chéen u ya'almaj t'aan máaco'ob.

⁸Tumen te'exe' ca p'atique'ex u ya'almaj t'aan Ku u ti'al a beetique'ex u ya'almaj t'aan máaco'ob: je'el bix a p'o'ique'ex le p'úulo'obo' bey xan u luuchilo'ob, yéetel u láak ya'abcach ba'alo'ob je'el bix lelo'oba'.

⁹Bey tu ya'alaj ti'ob: U ti'al a beetique'ex a wa'almaj t'aane'exe', ca p'atique'ex jun tzéelil u ya'almaj t'aan Ku.

¹⁰Tumen Moisese' tu ya'alaj: Tzic a taata yéetel a maama, bey xan le máax cu ya'alic ba'al ti' u taata wa ti' u maamae', quíimic.

¹¹Ba'ale' te'exe' ca wa'alique'exe', jun túul máaque' cu páajtal u ya'alic ti' u taata wa ti' u maamae': Ma' tu páajtal in wáantiquech, tumen tuláacal ba'al yaan tene' corbán (u káat ya'ale' ti'ibil óolal ti' Ku);

¹²Wa cu ya'alic beyo', te'exe' ca wa'alique'ex túune' mina'an u yáantic u taata mix u maama.

¹³Bey túuno' te'exe' ca mixba'alcuntique'ex u ya'almaj t'aan Ku tu yo'olal le tzolbe'en t'aan ca ca'ansique'ex ta baatzile'exo'. Yéetel ca beetique'ex ya'abcach ba'alo'ob je'el bix lelo'oba'.

¹⁴Jesuse' tu t'anaj tu ca'a téen le máaco'obo' ca tu ya'alaj ti'ob: U'uyene'ex tuláacale'ex, ca na'ate'ex:

¹⁵Mix ba'al ti' le yo'ocabil ba'alo'ob cu yocol ti' máac cu páajtal u kascuntic máaco'. Le ba'ax cu jóokol te j pucsi'ikalo' le kaskuntic máac.

¹⁶Te'ex yaan a xiquine'exe', u'uyajnene'ex.

¹⁷Le ca tu p'ataj Jesús le máaco'obo', ca j ooc ich naje', u aj canbalo'obe' tu káat chi'itajo'ob ti' ba'ax u káat u ya'al le queet t'aano'.

¹⁸Leti'e' ca tu ya'alaj ti'ob: ¿Mix te'ex ca na'atique'ex lela'? ¿Ma' wa táan a na'atique'ex tuláacal le yo'ocabil ba'alo'ob cu yocol ti' máaco' ma' tu páajtal u kascuntic máac,

¹⁹tumen ma' táan u yocol tu pucsi'ikal, chéen ti' u nak, cu dzo'ocole' cu jóokol ti' u wíinclil? Beyo' tu yóoltaj u ya'ale' tuláacal janal ma'alob.

²⁰Tu ya'alaj xan: Ba'ax cu jóokol ti' máaque', lelo' cu kascuntic máac,

²¹tumen ti' u pucsi'ikal máaco'ob cu jóokol le kaakas tuuculo'obo',

²²le oocolo'obo', u dzíibolta'al ba'ax u ti'al yaanal máaco', le loobilo'obo', le tuuso'obo', le kaakas cuxtalo', le u pochilta'al ba'alo'ob ma' unajo', le kaakas péectzilo'obo', le ca'anal ichilo', le x ma' na'atilo'.

²³Tuláacal le kaakas ba'alo'oba' ti' u pucsi'ikal máac cu jóokol, le o'olale' cu kascuntic máac.

²⁴J luk Jesús te'elo' ca j bin tu lu'umil Tiro yéetel Sidón. J ooc ti' jun p'éel naj. Ma' u káat ca ojéelta'ac tumen mix máac wa ti' yaan te'elo', ba'ale' ma' j páatji u ta'acbesicubái'.

²⁵Tu séeblaquil u maama jun túul x ch'úupal yaan jun túul kaakas pixan ti'e' tu yojéeltaj ti' yaan te'elo', ca j taale' ca j xolaj tu táan Jesús.

²⁶Le co'olela' táanxel lu'umil, sirofenicia u ch'i'ibal. J taale' ca tu káat óoltaj ti' Jesús ca u jóokes le kaakas pixan yaan ti' u x ch'úupalo'.

²⁷Ba'ale' Jesuse' tu ya'alaj ti': Cha' u janal táanil le paalalo'obo', tumen ma' utz u lukesa'al le waaj ti' le paalalo'obo' u ti'al ca dza'abac ti' le mejen peeko'obo'.

²⁸Leti'e' tu núucaj: Bey, Yuumtzil: ba'ale' tac le mejen peeko'ob yano'ob yáanal le mesao' cu jaantico'ob u xéexet'al le waaj cu lúubul ti' le paalalo'obo'.

²⁹Jesuse' tu ya'alaj túun ti': Ba'al jaaj ta wa'alaj: xeen, le kaakas pixano' dzo'oc u jóokol ti' a x ch'úupal.

³⁰Le ca j kuch tu yotoche' tu yilaj chilicbal le x ch'úupalo', dzo'oc u jóokol le kaakas pixan ti'o'.

³¹Jesuse' jóok tu ca'a téen tu lu'umil Tiro, j máan Sidón yéetel tu caajilo'ob u lu'umil Decapolis, ca j kuch tac tu ka'anabil Galilea.

³²J taasa'ab tu yicnal Jesús jun túul máac cóoc yéetel toot, ca j káat óolta'ab ti' ca u dzáa u kab tu yóokol.

³³Jesuse' tu bisaj jun tzéelil, jun páayil ti' le máaco'obo', ca tu yocsaj u yaal u kab tu xiquin le máaco', ca j túubnaji ca tu péedzkabtaj u yaak le máaco'.

³⁴Cu dzo'ocole' Jesús j paacatnaj ca'an, ca jajak iiknaji' ca tu ya'alaj ti': ¡Efata! u káat ya'ale': ¡Je'aba!

³⁵Tu séeblaquil je'epaj u xiquin le cóoco', ca j utzchaj u yaak, ca j páatji' u t'aan ma'alob.

³⁶Jesuse' tu kubentaj ti'ob ma' u ya'alico'ob ti' mix máac. Ba'ale' quex táan u sen kubentic ti'ob lela', láili' cu sen tzicbaltico'obe'.

³⁷Ca j sen ja'ak u yóolo'ob, ca tu ya'alajo'ob: Tuláacal ba'al ma'alob u beetic; cu beetic tac u yu'ubaj le cóoco'obo' yéetel u t'aan le tooto'obo'.