Read Yucateco San Lucas 10 Bible Online

San Lucas 10 - Yucateco bible

San Lucas 10

¹Cu dzo'ocol lela', Yuumtzil tu yéeyaj xan u láak setenta yéetel ca'a túul aj canbalo'ob, ca tu túuxtajo'ob ca'aca'a túulil táanil ti' u ti'al u xíimbalto'ob tuláacal le caajo'ob yéetel le cúuchilo'ob tu'ux yaan u bino'.

²Ca tu ya'alaj ti'ob: Jach tu jaajile' sen ya'ab le cool kaabéet u jo'ocholo', ba'ale' le j meyajo'obo' jach jun p'íito'ob. Le beetique' káat óolte'ex ti' u yuumil le coolo' ca u túuxt u láak meyajo'ob u ti'al joch.

³Xeene'ex; je'el túuna' tene' táan in túuxtique'ex bey j tamano'ob ichil j chacmo'olo'ob.

⁴Ma' a bisique'ex sáabucan mix taakin, mix xanab, mix a wa'atale'ex a tzique'ex mix máac te j bejo'.

⁵Le quéen ocoque'ex ti' jun p'éel naje', a'ale'ex táanil: Jéedzel ti' le naja'.

⁶Wa yaan máax cuxa'an ich jéedzel te'elo', cu kamic le jéedzelo', ba'ale' wa mina'ane' cu suut ti' te'ex.

⁷P'áatene'ex chéen te j najo', jaante'ex yéetel uke'ex le ba'ax cu dza'abal te'exo', tumen jun túul j meyaje' unaj u bo'ota'al. Ma' a máane'ex chi'ichi' naj.

⁸Le quéen kuchuque'ex ti' jun p'éel caaj cu kamique'exe', jaante'ex le ba'ax cun dzaabil te'exo'.

⁹Dza'ex u toj óolal le máaxo'ob koja'ano'ob te'elo' yéetel a'ale'ex ti'ob: U ajawil Kue' dzo'oc u náadzal ti' te'ex.

¹⁰Ba'ale' wa ca kuchle'ex ti' jun p'éel caaj tu'ux ma' táan a ka'amale'exe', jóokene'ex tu noj beelilo'ob ca a wa'ale'ex:

¹¹Tac u lu'umil a caajale'ex dzo'oc u takal ti' c ooque' c púustic ta táane'ex. Ba'ale' ojéelte'ex lela', u ajawil Kue' dzo'oc u náadzal ti' te'ex.

¹²Quin wa'alic te'exe', tu kiinil juicioe' asab yaan u p'is mukyajil le jaadz cun u kam u caajil Sodomao' ti' le cun u kam le caajo'.

¹³¡Óotzile'ex Corazín! ¡Óotzile'ex Betsaida! Tumen wa ca beeta'ac ca'ach ti' u caajilo'ob Tiro yéetel Sidón le chíicula'alo'ob beeta'ab ichile'exa' bejela'a' úuch u kex u tuuculo'obe' yéetel dzo'oc ca'ach u cutalo'ob ichil u ta'anil káak u búuquintmajo'ob tóotoch nook.

¹⁴Ba'ale' tu kiinil juicioe' asab yaan u p'is mukyajil le jaadz cun u kam u caajilo'ob Tiro yéetel Sidón ti' le can a kame'exo'.

¹⁵Cux túun teech, Capernaum, ¿Táan wa a tucultic bin líiksa'aquech tac ca'an? Ma', ba'ale' tac metnal bíin éemsa'aquech.

¹⁶Tu ya'alaj xan ti' u aj canbalo'ob: Le máax u'uyique'exe' teen cu yu'ubiquen; le máax ma' tu kamiquene' ma' tu kamic le máax túuxteno'.

¹⁷Le setenta yéetel ca'a túul aj canbalo'obo' suunajo'ob yéetel qui'imac óolal, táan u ya'alico'ob: Yuumtzil, tac le kaakas pixano'ob cu yu'ubico'ob c t'aan ta kaaba'.

¹⁸Jesuse' tu ya'alaj ti'ob: Bey, tene' tin wilaj u lúubul satanas bey u léembal cháac cu yéemel ca'ane'.

¹⁹Tene' dzo'oc in dzáic te'ex páajtalil u ti'al a pe'echa'aktique'ex cano'ob yéetel síina'ano'ob, yéetel u ti'al a t'onquinsique'ex máax p'ecmaile'ex. Mixba'al cu páajtal u beetic te'ex kaas.

²⁰Ba'ale' ma' u qui'imacchajal a wóole'ex tumen le kaakas pixano'ob cu yu'ubico'ob a t'aane'exo', ba'ale' qui'imacchajac a wóole'ex tumen dzíiba'an a kaaba'ex te j ca'ano'.

²¹Ti' le jun súutuco' sen qui'imacchaj u yóol Jesús tu yo'olal Quili'ich Pixane' ca tu ya'alaj: Quin qui'iqui' t'antiquech in Taata, u Yuumtzil ca'an yéetel lu'um, tumen le ba'alo'ob ta we'esaj ti' le mejen paalalo'obo' ta ta'acaj ti' le aj caanbalnajo'ob yéetel ca'anal u na'ato'obo'. Bey úuchic in Taata, tumen bey ta wóoltilac teech.

²²In Taatao' dzo'oc u kubic teen tuláacal ba'al. Mix máac kaj óoltmail máax le Paalo' wa ma' chéen le Taatao', mix máac xan kaj óoltmail máax le Taatao' wa ma' chéen le Paalo' yéetel le máaxo'ob cun u yóolt le Paal u dzáa u kaj óolto'obo'.

²³Ca túun tu pactaj le aj canbalo'obo' ca tu ya'alaj chéen ti' leti'ob: Qui' yóol le máaxo'ob cu pactico'ob yéetel u yicho'obe' ba'alo'ob ca wilique'ex te'exa';

²⁴tumen quin wa'alic ti' te'exe' ya'ab aj bóobato'ob yéetel ajawo'ob tu yóoltaj u yilo'ob le ba'alo'ob ca wilique'ex te'exa', ba'ale' ma' tu yilajo'obi'; tu yóoltaj u yu'ubo'ob le ba'alo'ob ca wu'uyique'ex te'exa', ba'ale' ma' tu yu'ubajo'obi'.

²⁵Ca j wa'alaj jun túul u aj ca'anbesajil le a'almaj t'aano'. U ti'al u túuntic u yóol Jesuse' ca tu káataj ti': Aj ca'anbesaj, ¿ba'ax unaj in beetic u ti'al ca yanac teen cuxtal mina'an u xuul?

²⁶Jesuse' tu núucaj ti': ¿Ba'ax dzíiba'an ti' le a'almaj t'aano'? ¿Bix a xoquic?

²⁷U aj ca'anbesajil le a'almaj t'aano' tu núucaj: Yaabilt Yuumtzil a Ku yéetel tuláacal a pixan, yéetel tuláacal a muuk, yéetel tuláacal a na'at; yaabilt a láak je'el bix ca yaabiltcaba'e'.

²⁸Ca túun j a'ala'ab ti' tumen Jesús: jach tu beel ta núuquilac. Wa ca beetic beyo', bíin yanac teech cuxtal.

²⁹Ba'ale' u aj ca'anbesajil le a'almaj t'aano' tu yóoltaj ba'atel t'aane', ca tu ya'alaj ti' Jesús: ¿Máax túun in láak?

³⁰Ca j núuca'ab ti' tumen Jesús: Jun túul máac luk Jerusalene' táan ca'ach u bin Jerico, ca j lúub tu kab j ocolo'ob, ca j luksa'ab tuláacal ba'ax yaan ti', lo'oloxa'abe' ca j p'a'at kas quimen.

³¹Ti' lelo' j máan jun túul aj kiin te j bejo' ba'ale' chéen tu yilaje' ca j táadzmáani'.

³²Bey xan jun túul levita kuch te cúuchilo', le ca tu yilaje' j táadzmáan xan.

³³Ba'ale' jun túul Samariail cu máan xan te j bejo', le ca tu yilaje' tu ch'a'aj óotzilil ti'.

³⁴Tu nadzajubáa tu yicnal le máaco', tu dzáaj aceite yéetel vino tu yajilo'obe', ca tu kaxláantaj. Cu dzo'ocole' tu na'acsaj yóokol u yalak ba'alche', tu bisaj ti' jun p'éel u najil u'ula'obe' ca tu canantaj.

³⁵Tu láak kiin, u ti'al u binbal le Samariailo', tu jóokesaj ca'a p'éel taakine', tu dzáaj ti' u yuumil le najo', ca tu ya'alaj ti': Canant le máaca'; wa ca xupic u masile', le quéen suunaquene' quin sutic teech.

³⁶Ma'alob túun, ¿bix a wilic? ¿máacalmáac ti' le óox túul máaco'ob u láak le máax lúub tu kab le j ocolo'obo'?

³⁷U aj ca'anbesajil le a'almaj t'aano' tu ya'alaj: Le máax tu ch'a'aj óotzilil ti'e'. Ca j a'ala'ab ti' tumen Jesús: Xeen, beet teech xan beyo'.

³⁸Ca'aliquil táan u bino'obe', j kuch Jesús ti' jun p'éel chan caaj. Te'elo' jun túul co'olel, Marta u kaabae', tu kamaj Jesús tu yotoch.

³⁹Martae' yaan jun túul u yíidzin, María u kaaba', máax j culaj tu ni' yooc Jesús u yu'ub u ca'ansajo'ob.

⁴⁰Ba'ale' Martae' saatal yóol ti' u sen meyaj, ca j taal tu yicnal Jesuse' ca tu ya'alaj ti': Yuumtzil, ¿ma' wa táan a wilic in wíidzine' u p'atmajen tin juunal yéetel tuláacal le meyaja'? A'al ti' ca u yáanten.

⁴¹Ba'ale' Jesuse' tu núucaj ti': Marta, Marta, ya'abcach ba'alo'ob satic a wóol yéetel cu dzáic teech yaayaj óolal.

⁴²Ba'ale' chéen yaan jun p'éel ba'al jach kabéet. Maríae' u yéeymaj u jach ma'alobil, lela' ma' bíin luksa'ac ti'i'.