Read Yucateco San Lucas 11 Bible Online

San Lucas 11 - Yucateco bible

San Lucas 11

¹Jun téene' j payalchi'inaj Jesús ti' jun p'éel cúuchil. Le ca j dzo'oc u payalchi'e', a'ala'ab ti' tumen jun túul ti' u aj canbalo'ob: Yuumtzil, ca'anso'on payalchi' je'el bix tu ca'ansaj Juan u aj canbalo'obe'.

²Ca j a'ala'ab ti'ob tumen Jesús: Le quéen payalchi'inaque'exe' a'ale'ex beya': C Yuum yanech te j ca'ano', quili'ichcunta'ac a kaaba'. Talac a ajawil. Beeta'ac a wóol way lu'ume' je'el bix te j ca'ano'.

³Dzáa to'on bejela'e' le waaj kaabéet to'on u ti'al le kiina'.

⁴Sa'ates to'on c keban, tumen to'on xane' c sa'atsic tuláacal máaco'ob cu beetic to'on kaas. Ma' a cha'ic c lúubul ti' túuntaj óolal, ba'ale' toco'on ti' kaas.

⁵J a'ala'ab ti'ob xan tumen Jesús: Co'ox tucultique' jun túul ti' te'exe' táan chúumuc áakabe' cu bin tu yotoch jun túul u amigoe', cu ya'alic ti': Amigo, dzáa teen óox p'éel waaj in páaye.

⁶Tumen jun túul in amigo yaan u bin u xíimbale' jelecbal tin wotoch, ba'ale' mixba'al yaan teen in dzáa u jaante.

⁷Co'ox tucultic xane' le máax yaan ichil le najo' cu núuquic ti': Ma' a beetic in p'u'ujul, le jool najo' kala'an, múul chilicbalen yéetel in mejen paalal, ma' tu páajtal in líikil in dzáa teech mixba'al.

⁸Tu jaajil quin wa'alic te'exe', quex ma' u líikil u dzáa wa ba'ax ti' tumen u amigoe', ba'ale' tumen táan u sen káatal ti'e', yaan u líikil u ti'al u dzáa tuláacal ba'ax kaabéet ti'.

⁹Bey túuno' tene' quin wa'alic te'ex: Káatnene'ex, bíin dza'abac te'ex tumen Ku; caxanene'ex, bíin a nuptáante'ex; koopnene'ex, bíin je'ebec te'ex jool naj.

¹⁰Tumen le máax cu káataje', cu kam; le máax cu caxane', cu nuptáantaj; le máax cu kope', cu je'ebel jool naj ti'.

¹¹¿Máax taatatzil ichile'ex je'el u chúucpajal u yóol u dzáa jun p'éel tuunich ti' u paal le quéen u káat waaje'? ¿Wa ca u dzáa jun túul caan ti' le quéen u káat jun túul caye'?

¹²¿Wa ca u dzáa jun túul síina'an ti' le quéen u káat jun p'éel je'?

¹³Bey túuno' wa te'ex, quex kaakas máaque'ex, a wojel a dza'ex ma'alob ba'alo'ob ti' a paalale'exe', jach tu jaajil a Taataex yaan te j ca'ano' bíin u dzáa le Quili'ich Pixan ti' le máaxo'ob káatic ti'e'.

¹⁴Jesuse' táan u jóokesic jun túul pixan u tootquintmaj jun túul máac; le ca jóok le kaakas pixano' j páatchaj u t'aan le máaco'. Láaj ja'ak u yóol le máaco'obo' tu yo'olal lela'.

¹⁵Ba'ale' dze'edzec ti'obe' tu ya'alajo'ob: Le máaca' cu jóokesic kaakas pixano'ob yéetel u páajtalil Beelzebú, tumen lela' u noojocho'ob.

¹⁶U láako'obe', u ti'al u túuntico'ob u yóole', tu káatajo'ob ti' Jesús jun p'éel chíiculil ca'an.

¹⁷Ba'ale' leti'e' tu kaj óoltaj ba'ax cu tucultico'obe' ca tu ya'alaj ti'ob: Tuláacal ajawil cu jáatzpajale', cu xu'ulsicubáa xan.

¹⁸Bey xan wa satanas cu jáatzpajal tu baatzile', ¿bix cun xáantal u páajtalil? Quin wa'alic lela' tumen táan a wa'alique'exe' yéetel u páajtalil Beelzebú quin jóokesic kaakas pixano'ob.

¹⁹Wa beyo', ¿máax dzáic páajtalil ti' le máaxo'ob tzaypachtique'ex u ti'al u jóokesico'ob? Le beetique' leti'ob e'esic te'ex kaas ba'ax ca wa'alique'ex.

²⁰Ba'ale' wa yéetel u páajtalil Ku quin jóokesic kaakas pixano'ob, lela' u káat ya'ale' u ajawil Kue' dzo'oc u kuchul ta wicnale'ex.

²¹Wa jun túul mu'uka'an máac cu machic u nu'ucul ba'atel u ti'al u canantic u yotoche', ma'alob yanil tuláacal ba'ax yaan tu yotoch.

²²Ba'ale' wa cu dzáancha'ata'al tumen u láak máac asab mu'uka'an ti' leti'e', cu to'ocol tuláacal le u nu'uculo'ob ba'atel u alab óoltmajo' yéetel cu luksa'al ti' tuláacal le u ba'aluba'ob.

²³Le máax ma' tin wéetel yane' tin contra yaan, bey xan le máax ma' tu mol tin wéetele' cu ki'itbesaj.

²⁴Le quéen jóokoc jun túul kaakas pixan ti' jun túul máaque' cu máan ti' tiquin cúuchilo'ob táan u caxtic je'elel. Wa ma' tu caxtaje' cu tucultic: Bin in ca'aj suut tin wotoch tu'ux jóoken.

²⁵Le quéen suunaque' cu yilic le máaco' bey jun p'éel naj míista'an yéetel jadzutzquinta'ane'.

²⁶Cu bin túune' cu taasic u láak siete pixano'ob asab kasa'ano'ob ti' leti'e', cu láaj ocolo'ob cajtal ti' le máaco', cu p'áatal u yalab u cuxtal le máaco' asab jach kaas ti' u cáajbal.

²⁷Ca'aliquil táan u ya'alic Jesús le ba'alo'oba' jun túul co'olel tu ka'am a'alaj ichil le máaco'obo': ¡Qui' yóol le co'olel tu síijsajecho' yéetel tu tzéentajecho'!

²⁸Ba'ale' leti'e' tu ya'alaj: ¡Asab qui'imac yóol le máaxo'ob cu yu'ubico'ob yéetel cu beetico'ob ba'ax cu ya'alic Ku!

²⁹Ca'aliquil táan u much'tal le máaco'ob tu bakpach Jesuse', leti'e' jo'op' u ya'alic: U máaquilo'ob le kiino'oba' kasa'ano'ob yéetel cu káatico'ob jun p'éel chíicul. Ba'ale' ma' bíin dza'abac chíicul ti'ob wa ma' chéen u chíiculil aj bóobat Jonasi'.

³⁰Tumen je'el bix Jonás j dza'ab bey jun p'éel chíicul ti' le máaco'ob cajlajo'ob Níniveo', bey xan u Paal máac bíin dza'abac bey jun p'éel chíicul ti' u máaquilo'ob le kiino'oba'.

³¹Tu kiinil juicioe', le x ajaw luk j noojol ti' jun p'éel lu'um jach náach ca j taal u yu'ub u ca'ansaj Salomone', bíin líikic u ti'al u xot kint u máaquilo'ob le kiino'oba', tumen le máax yaan waya' asab nojoch ti' Salomón.

³²Le máaxo'ob cajlajo'ob Níniveo' bíin líikico'ob tu kiinil juicio u ti'al u xot kinto'ob u máaquilo'ob le kiino'oba', tumen le Niniveilo'obo' tu kex u cuxtalo'ob le ca tu yu'ubajo'ob u tze'ec Jonás, ba'ale' le máax yaan waya' asab nojoch ti' Jonás.

³³Mix máac cu t'abic jun p'éel sáasil, cu dzo'ocole' ca u ta'aque wa ca u dzáa yáanal jun p'éel muut, ba'ale' cu t'uchquintic ca'anal u ti'al u sáalsilcunt tuláacal le máaxo'ob cu yocolo'ob ich najo'.

³⁴U neek a wiche' u sáasilil a wíinclil; wa ma'alobe', tuláacal xan a wíinclile' chuup yéetel sáasil; ba'ale' wa kaase', a wíinclil xane' ichil éekjoch'e'enil yaan.

³⁵Canant ma' u éekjoch'e'ental le sáasil yaan ti' techo'.

³⁶Tumen wa mina'an mix jun p'íit éekjoch'e'enil ti' a wíinclil ba'ale' chuup yéetel sáasile', tuláacal ba'al bíin a wil je'el bix jun p'éel sáasil cu sáasilcuntiqueche'.

³⁷Le ca j dzo'oc u t'aan Jesuse', káat óolta'ab ti' tumen jun túul fariseo ca taalac janal tu yéetel. Ooc túun Jesús tu yotoch le fariseo'.

³⁸Le fariseo' ja'ak u yóol le ca tu yilaj u cutal Jesús janal quex ma' tu p'o'aj u kabi'.

³⁹Ba'ale' Jesuse' tu ya'alaj ti': Te'ex fariseoexe', ca p'o'ique'ex chéen u paach le luucho' bey xan le laco', ba'ale' a pucsi'ikale'exe' chuup yéetel ocol bey xan yéetel kaas.

⁴⁰¡J ma' na'ate'ex! ¿Ma' wa a wojele'ex le máax j beet le ba'ax yaan yo'ocabilo' leti' j beet xan le ba'ax yaan ichilo'?

⁴¹Ba'ale' si'ex le ba'ax yaan te'ex ichilo', beyo' ma'alob p'o'anil cun p'áatal tuláacal.

⁴²¡Yaj a wanile'ex, fariseoex!, tumen ca dzáique'ex ti' Yuum Ku u diezmoil menta, ruda yéetel u láak jejeláas xíiwo'ob, ba'ale' ca dzáique'ex jun tzéelil le toj cuxtalo' bey xan a yaacunaje'ex ti' Yuum Ku. Leti' le ba'alo'ob unaj a beetique'exa'. Bey xan kaabéet a beetique'ex le u láak ba'alo'obo'.

⁴³¡Yaj a wanile'ex, fariseoex!, tumen a káate'ex cutal ti' u yáax cúuchilo'ob le sinagogaobo' bey xan a káate'ex ca tzi'iquique'ex te j kíiwico'obo'.

⁴⁴¡Yaj a wanile'ex u aj ca'anbesajile'ex le a'almaj t'aan yéetel fariseoex, ca'a p'éel iche'ex tumen beye'ex le mucnalo'ob ma' tu yila'alo'obo', le o'olale' le máaxo'ob cu máano'ob tu yóokolo'obe' ma' u yojelo'obi'!

⁴⁵Jun túul u aj ca'anbesajil le a'almaj t'aano' tu ya'alaj ti': Aj ca'anbesaj, iquil a wa'alic le ba'alo'oba' tac ti' to'on ca wa'alic ba'al.

⁴⁶Ba'ale' Jesuse' tu ya'alaj ti': ¡Yaj a wanile'ex, tac te'ex u aj ca'anbesajile'ex a'almaj t'aan! tumen ca dzáique'ex u cuuch u láak máaco'ob, cucho'ob mix máac cu páajtal u bisic, ba'ale' te'exe' ma' a káat a péedzkabte'exi' mix yéetel jun p'éel u yaal a kabe'ex.

⁴⁷¡Yaj a wanile'ex! tumen ca jadzutzquintique'ex u mucnal le aj bóobato'ob j quiimsa'abo'ob tumen le a úuchben taataexo'obo'.

⁴⁸Beyo' ca we'esique'ex utz ta t'aane'ex ba'ax tu beetajo'ob le a úuchben taataexo'obo', tumen leti'ob j quiimso'ob ba'ale' te'ex jadzutzquintic u mucnalo'ob.

⁴⁹Le beetique' Kue' tu ya'alaj yéetel na'at: Bíin in túuxt aj bóobato'ob yéetel apóstolo'ob ti'ob, dze'edzeco'obe' bíin u quiimso'ob yéetel bíin u ch'a'apachto'ob u láako'ob.

⁵⁰Tumen Kue' bíin dzáa u cuuch u máaquilo'ob le kiino'oba' u ki'ikel tuláacal le aj bóobato'ob quiimsa'abo'ob líikbal ca j beeta'ab yokóolcaab,

⁵¹cu cáajal yéetel u ki'ikel Abel cu dzo'ocol yéetel u ki'ikel Zacarías, máax quiimsa'ab naadz ti' u cúuchil quiimsbil siibalo'ob actáan ti' kulnaj. Le beetique' quin wa'alic te'exe', Kue' bíin u dzáa u cuuch u máaquilo'ob le kiino'oba' quiimsa'abic le aj bóobato'obo'.

⁵²¡Yaj a wanile'ex, u aj ca'anbesajile'ex a'almaj t'aan! tumen dzo'oc a kalique'ex u joonajil na'at, mix te'ex ca woocle'exi' mix ca cha'ique'ex u yocol le máaxo'ob u káato'ob oclo'.

⁵³Le ca j a'ala'ab ti'ob tumen Jesús le ba'alo'oba', u aj ca'anbesajilo'ob le a'almaj t'aan yéetel le fariseobo' kuuxilnajo'ob ti', ca jo'op' u sen káatico'ob u chi' u ti'al u satico'ob u yóol,

⁵⁴tumen tu yóoltajo'ob ca u ya'al wa ba'ax kaas u ti'al ca páatac u taquico'ob u pool.