Read Yucateco San Lucas 16 Bible Online

San Lucas 16 - Yucateco bible

San Lucas 16

¹Tu ya'alaj xan Jesús ti' u aj canbalo'ob: Yanji jun túul dzuule' tu dzáaj jun túul máac canantic u ayikalil, ba'ale' tzicbalta'ab ti'e' táan u xu'uxupa'al u ayikalil tumen le máaco'.

²Lela' j t'aan tumen u dzuulile' ca j a'ala'ab ti': ¿Ba'ax le cu ya'ala'al teen ta wo'olala'? Kub teen le meyaj a beetmajo', tumen bin u ca'aj xu'ulul a canantic in ayikalil.

³Le j canan ayikalil túuno' jo'op' u tucultic: Bey táan u luksa'al ti' teen le meyaj tumen in dzuulila'. ¿Ba'ax quin in beet bejela'e'? Mina'an in muuk u ti'al in meyajtic lu'um. Sublaquen xan in káat máatan.

⁴In wojel ba'ax quin in beet u ti'al ca yanac máaxo'ob kamiquen tu yotocho'ob quéen p'áatac mina'an teen meyaj.

⁵Ca jo'op' u t'anláantic jujun túulil tuláacal le máaxo'ob yaan u p'aaxo'ob ti' u dzuulilo'. Ti' yáax jun túule' tu káat chi'itaj ti': ¿Buca'aj a p'aax ti' in dzuulil?

⁶Leti'e' tu núucaj: Cien barrilo'ob aceite. Ca j a'ala'ab ti' tumen le j canan ayikalilo': Ch'a'a u ju'unil a p'aax. Culen tu séeblaquil ca a beet u jeel tu yo'olal chéen cincuenta.

⁷Cu dzo'ocole' tu káat chi'itaj ti' u láak jun túul: Cux túun teech, ¿buca'aj a p'axmaj ti'? Ca tu núucaj: Cien u p'iisil trigo. Ca túun tu ya'alaj ti': Ch'a'a u ju'unil a p'aax. Beet u jeel tu yo'olal chéen ochenta.

⁸Le dzuulo' tu kaj óoltaje' le kaakas j canan ayikalilo' tu beetaj le ba'alo'oba' yéetel na'at, tumen u máaquilo'ob yóokolcaabe' cu beetic u ba'aluba'ob tu baatzilo'obe' yéetel asab na'at ti' le máaxo'ob yano'ob ichil sáasilo'.

⁹Tene' quin kuben t'antic ti' te'exe' ca meyajnac te'ex le lu'umcabil ayikalil u ti'al a caxtique'ex amigo'ob, tu yo'olal le quéen mina'anchajac le ayikalilo' ca yanac máax kamique'ex ti' le cajtalilo'ob mina'an u xuulo'.

¹⁰Le máax chuca'an u yóol u meyajt jun p'íit ba'ale' chuca'an u yóol xan u meyajt ya'ab ba'alo'ob; le máax ma' tu chúucpajal u yóol u meyajt jun p'íit ba'ale', mix ti' u ya'abil cu chúucpajal u yóol.

¹¹Bey túuno', wa ma' tu chúucpajal a wóole'ex a meyajtique'ex le lu'umcabil ayikalilo', ¿máax cun u dzáa a canante'ex le jaajil ayikalilo'?

¹²Wa xan ma' chuca'an a wóole'ex a meyajte'ex ba'al ma' a ti'ale'exe', ¿máax cun dzáic te'ex le ba'al a ti'ale'exo'?

¹³Mix jun túul palitzil cu páajtal u meyajtic ca'a túul dzuul; tumen wa cu p'ectic jun túule' cu yaabiltic u láak, wa cu biscubáa yéetel jun túule' cu cúulpachcuntic u láak. Ma' tu páajtal a meyajtique'ex Ku yéetel a meyajtique'ex taakin.

¹⁴Le fariseobo', tumen jach utz tu yicho'ob taakine', le ca tu yu'ubajo'ob tuláacal le ba'alo'oba', jo'op' u p'a'astico'ob Jesús.

¹⁵Ca j a'ala'ab ti'ob tumen Jesús: Te'exe' jach utz a we'esicaba'ex tu táan wíinico'ob, ba'ale' Kue' u kaj óol a pucsi'ikale'ex; tumen le ba'ax jach ya'ab u tojol u ti'al máaco'obe' mixba'al u tojol u ti'al Ku.

¹⁶U ya'almaj t'aan Moisés yéetel u ca'ansaj le aj bóobato'obo' yanchaj tac tu kiinilo'ob Juan. Ti' le kiino'obo' jo'op' u tzicbalta'al u ma'alob péectzilil u ajawil Ku, tuláacal máaco'obe' cu mukulmuko'ob u ti'al u yooclo'obi'.

¹⁷Asab úuchac u xu'ulul ca'an yéetel lu'ume' ma' ca p'áatac ma' u dzo'ocbesa'al tuláacal le ba'alo'ob dzíiba'an ti' le a'almaj t'aano'.

¹⁸Le máax cu xúump'attic u yatan u ti'al u dzo'ocol u beel yéetel yaanal co'olele', cu nup kebanchajal; le máax cu dzo'ocol u beel yéetel le co'olel xúump'atta'ano', cu nup kebanchajal xan.

¹⁹Yaan ca'ach jun túul máac jach ayikale' cu búuquintic nooko'ob jach co'ojtac yéetel jach jadzutztac, sáamsamal xan cu dzáic noj janalo'ob.

²⁰Yaan xan ca'ach jun túul máac jach óotzile' Lázaro u kaaba', pokchaja'an tuláacal u wíinclil yéetel yajil, cu cutal lu'um tu jool u yotoch le ayikalo'.

²¹Le óotzil máaco' u káat ca'ach u jaant u xe'exet'al le waaj cu lúubul yáanal u mayacche' le ayikalo'; tac le peeko'ob cu náadzalo'ob u léedzo'ob u yajilo'.

²²Jun p'éel kiine' j quíim le óotzil máaco' ca j bisa'ab tumen u ángelo'ob tu yicnal Abraham. J quíim xan le ayikalo' ca j mu'uqui'.

²³Ca'aliquil táan u mukyaj le ayikal te j metnalo' tu líikesaj u yiche' ca tu yilaj Abraham yaan te náachilo' yéetel Lázaro tu yicnal.

²⁴Ca tu ka'am a'alaj: Taata Abraham, ch'a'a teen óotzilil. Túuxt Lázaro u ch'ul u ni' u yaal u kab ti' ja'e', ca taalac u síiscunt in waak, tumen táan in sen mukyaj ichil le káaka'.

²⁵Ba'ale' Abraham tu ya'alaj ti': In paal, ka'ajac teche' j bin teech utzil tuláacal u kiinil a cuxtal, Lázaroe' kaas binic ti'; leti' túune' táan u kamic utz waye', teche' táan a mukyaj.

²⁶Tu yóokol tuláacal lela', yaan jun p'éel taamcach jóomcab lu'um jatzcuntico'on ti' te'ex; le beetique' mix jun túul ti' le yano'ob te'elo' cu páajtal u taalo'ob waye'.

²⁷Ca túun tu ya'alaj le ayikalo': Taata Abraham, quin káat óoltic teech túune' ca a túuxt Lázaro tu yotoch in taata,

²⁸tu'ux yaan cinco in wíidzino'ob, u ti'al t'aan yéetelo'ob tu yo'olal ma' u taalo'ob leti'ob xan way tu cúuchil le mukyaja'.

²⁹Ba'ale' j a'ala'ab ti' tumen Abraham: Ti' leti'obe' yaan le ba'ax dzíibta'an tumen Moisés yéetel le aj bóotabo'obo'. ¡U yu'ubo'ob ba'ax cu ya'alico'ob!

³⁰Ca tu núucaj le ayikalo': Bey, taata Abraham, ba'ale' wa jun túul máac ti' ichil le quimeno'ob ca xi'ic tu yicnalo'obe' je'el u kexic u tuuculo'obe'.

³¹Ba'ale' j a'ala'ab ti' tumen Abraham: Wa ma' tu yu'ubico'ob ba'ax cu ya'alic Moisés yéetel le aj bóobato'obo', ma' bíin ocsaj óolnaco'ob quex ca'a púut cuxlac jun túul máac ti' ichil le quimeno'obo'.