Read Yucateco San Lucas 17 Bible Online

San Lucas 17 - Yucateco bible

San Lucas 17

¹Tu ya'alaj Jesús ti' u aj canbalo'ob: Mantadz yaan ba'alo'ob beetic u kebanchajal máac, ba'ale' óotzil máax beetic u taal le kebano'.

²Mas ma'alob ca pu'uluc ka'anab yéetel jun p'éel u tuunichil juuch' kaxa'an tu caal ma' ca u beet u lúubul ti' keban jun túul ti' le mejen paalalo'oba'.

³Canantaba'ex. Wa cu si'ipil a sucu'un ti' teche', a'al u nu'uc ti'; wa cu kexic u tuucule', sa'atse.

⁴Quex siete u téenel ti' jun p'éel kiin ca si'ipic ti' teche', ca taalac siete u téenel u ya'al teech: Ma' tin suut in beete, unaj a sa'atsic.

⁵Ca j a'ala'ab ti' Yuumtzil tumen u aj canbalo'obo': Ya'abcunt c ocsaj óolal.

⁶Yuumtzile' tu ya'alaj ti'ob: Wa ca yanac te'ex ocsaj óolal quex je'el bix u neek mostazae', je'el u páajtal a wa'alique'ex ti' le jun cúul che'a': Jocabáa waye' ca pakabáa te ka'anabo', le che' túuno' cu beetic beyo'.

⁷Wa jun túul ti' te'ex yaan jun túul u palitzil cu yu'ul ich cool wa ti' u canan tamane', ¿cu ya'alic wa ti': Máanen, culen janal?

⁸ma', ba'ale' cu ya'alic ti': Nu'ucbes in janal, ilawil a meyajtiquen ca'aliquil táan in janal yéetel táan in wukul; cu dzo'ocole' ca janal yéetel ca wukul teech.

⁹¿Cu dzáic wa nib óolal ti' le palitzil tumen tu beetaj le ba'ax a'ala'ab ti'o'? Quin tuclique' ma'.

¹⁰Bey xan te'ex, le quéen dzo'ococ a beetique'ex tuláacal le ba'ax cu ya'alic Kue', a'ale'ex: Palitzilo'on mixba'al c biilal, tumen t beetaj chéen le ba'ax unaj c beetique'.

¹¹U ti'al u binbal Jesús Jerusalene', j máan tu lu'umilo'ob Samaria yéetel Galilea.

¹²Le ca j kuch ti' jun p'éel cajtalile', jóok ilbil tumen diez máaco'ob yaan jáaway ti'ob, ba'ale' náach p'áatico'ob ti'.

¹³Ca tu yaawtajo'ob: ¡Jesús, aj ca'anbesaj, ch'a'a to'on óotzilil!

¹⁴Le ca j ila'abo'ob tumen Jesuse', j a'ala'ab ti'ob: Xeen a we'esaba'ex ti' le aj kiino'obo'. Ca'aliquil táan u bino'obe' ca j tojchaj u yóolo'ob.

¹⁵Jun túul ti'obe', le ca tu yilaj dzo'oc u tojtal u yóole', j suunaj táan u qui'iqui' t'antic Ku yéetel ka'am t'aan.

¹⁶Ca j xolaj tu táan Jesús ca j chinlaj tac lu'um u ti'al u dzáic nib óolal ti'. Le máaca' samariail.

¹⁷Ca tu ya'alaj Jesús: ¿Ma' wa diez le máaco'ob j tojchaj u yóolo'obo'? ¿Tu'ux yano'ob le u láak nueveo'?

¹⁸¿Chéen wa le j táanxel lu'umil máac j suunaj u qui'iqui' t'ant Kua'?

¹⁹Ca tu ya'alaj ti' le máaco': Líiken, xeen; dzo'oc u tojtal a wóol tumen ocsaj óolnajech.

²⁰Le fariseobo' tu káat chi'ito'ob ti' Jesús ba'ax kiin quéen taalac u ajawil Ku. Leti' túune' tu núucaj ti'ob: U taalbal u ajawil Kue' ma' jun p'éel ba'al cu páajtal u yila'ali'.

²¹Ma' túun a'albile': Way yane', wa te yano'. Tumen u ajawil Kue' ichile'ex yaan.

²²Ca tu ya'alaj Jesús ti' u aj canbalo'ob: Bíin taalac u kiinil a dzíiboltique'ex a wile'ex quex chéen jun p'éel u kiinilo'ob u Paal Máaque', ba'ale' ma' bíin a wile'exi'.

²³Bíin a'ala'ac te'ex: Way yane', wa te yano'. Ba'ale' ma' a bine'exi' mix a tzaypachtique'exo'ob.

²⁴Tumen je'el bix u yila'al u léembal cháac ti' jun tzéel tac tu láak jun tzéel ca'ane', bey bíin taalac u Paal Máac le quéen kuchuc u kiine'.

²⁵Ba'ale' táanile' yaan u sen mukyaj yéetel yaan u cúulpachcunta'al tumen u máaquilo'ob le kiino'oba'.

²⁶Je'el bix úuchic tu kiinilo'ob Noe', bey xan bíin úuchuc tu kiinilo'ob quéen taalac u Paal Máac.

²⁷Cu janalo'ob, cu yukulo'ob, cu dzo'ocol u beelo'ob tac le kiin ooquic Noé ichil le cheemo'. Le búulcabalo' j taale' ca j láaj j quíimo'ob.

²⁸Bey xan úuchic tu kiinilo'ob Lot: cu janalo'ob, cu yukulo'ob yéetel cu mano'ob yéetel cu coonolo'ob, cu pakalo'ob yéetel cu beetico'ob najo'ob.

²⁹Ba'ale' le ca jóok Lot ti' u caajil Sodomae' Kue' tu beetaj u káaxal káak yéetel azufre ca j láaj quiimsa'abo'ob.

³⁰Bey bíin úuchuc tu kiinil quéen chíicpajac u Paal Máac.

³¹Ti' le kiino', wa yaan jun túul máac yóokol naje', ba'ale' u nu'uculo'obe' ti' yaan ich naje', ma' u yéemel u ch'a'e; wa jun túul máac káax yane', ma' u suut tu yotoch.

³²Ka'ajac te'ex u yatan Lot.

³³Le máax u káat u toc u cuxtale' bíin u sate, ba'ale' le máax cu satique' bíin u toque.

³⁴Quin wa'alic te'exe' ti' le áakabo' ti' ca'a túul múul chilicbalo'obe', jun túule' bíin bisa'ac, jun túule' bíin p'a'atac.

³⁵Ti' ca'a túul co'olelo'ob cu múul juucho'obe' jun túule' bíin bisa'ac, jun túule' bíin p'a'atac.

³⁶Ti' ca'a túul máaco'ob yano'ob káaxe', jun túule' bíin bisa'ac, jun túule' bíin p'a'atac.

³⁷Le ca tu yu'ubajo'ob lela', tu káatajo'ob ti': ¿Tu'ux bíin úuchuc lela', Yuumtzil? Leti'e' tu núucaj ti'ob: Tu'ux yaan le quimen wíinclilo', ti' bíin much'lac le ch'oomo'obo'.