Read Yucateco San Lucas 19 Bible Online

San Lucas 19 - Yucateco bible

San Lucas 19

¹J ooc Jesús Jericoe' táan ca'ach u káatal ti' le caajo'.

²Te'elo' ti' yaan jun túul ayikal máaque', Zaqueo u kaaba', leti'e' u nojochil le j kam páatano'obo'.

³Le Zaqueoa' tu yóoltaj u kaj óolt Jesús, ba'ale' ma' páatchaj u yilic ichil le ya'abcach máaco'ob yaan te'elo', tumen leti'e' jach cabal u baaquel.

⁴Áalcabnaj túun táanil ca j na'ac tu kab jun cúul che' yaan naadz te tu'ux cun máan Jesuso' u ti'al ca páatac u yilic ma'alob.

⁵Jesuse', le ca j máan te'elo', tu líikesaj u yich ca tu ya'alaj ti': Zaqueo, éemen tu séeblaquil, tumen yaan in p'áatal ta wotoch bejela'e'.

⁶Zaqueoe' j éem tu séeblaquil ca tu kamaj Jesús yéetel qui'imac óolal.

⁷Tuláacal le máaco'ob, le ca tu yilajo'ob lela', jo'op' u tutucchi'ob, táan u ya'alico'ob j bin Jesús tu yotoch jun túul j keban wíinic.

⁸Ca j wa'alaj Zaqueoe' ca tu ya'alaj ti' Yuumtzil: Yuumtzil, bin in ca'aj in dzáa táancoch in ayikalil ti' le óotzilo'obo'. Wa in wocoltmaj wa máax yéetel tuuse' bin in ca'aj in suut ti' can téen u tip'a'anil.

⁹Ca túun j a'ala'ab ti' tumen Jesús: Bejela'e' dzo'oc u kuchul tocsajil ti' le naja' tumen le máaca' ti' u ch'i'ibal Abraham u taal xan.

¹⁰Tumen u Paal Máaque' j taal u caxant yéetel u toc le ba'ax saatale'.

¹¹Ca'aliquil le máaco'ob táan u yu'ubico'ob le ba'alo'oba', Jesuse' tu ya'alaj jun p'éel quet t'aan ti'ob, tumen tu yo'olal dzo'oc u náadzal Jerusalene' le máaco'obo' tu tucultajo'obe' séeba'an cun kuchul u ajawil Ku.

¹²Tu ya'alaj ti'ob: Yaan ca'ach jun túul dzuule' j bin táanxel lu'um u ti'al ca beeta'ac ajawil tu lu'um, cu dzo'ocole' cu suut.

¹³Ma'ili' jóokoc u binbale', tu t'anaj diez u palitzilo'ob, tu kubaj jujun p'éel co'ocoj taakin ti'obe', ca tu ya'alaj ti'ob: Meyajnene'ex yéetel le taakina' ca'aliquil in suut.

¹⁴Ba'ale' p'ecta'an tumen u yéet caajalo'ob, máaxo'ob tu túuxtajo'ob dze'edzec máaco'ob u ti'al a'alic: Ma' c káat ca u beet u ajawil le máac t óokola'.

¹⁵Ba'ale' j beeta'ab ajaw, cu dzo'ocole' j suunaj tu lu'um. Le ca j kuche' tu túuxtaj t'anbil le palitzilo'ob tu kubaj taakin ti'obe', tu yo'olal u yilic buca'aj tu náajaltaj jujun túul.

¹⁶Yáax jun túule' j taale' ca tu ya'alaj: Dzuul a taakine' tu náajaltaj u láak diez.

¹⁷Le ajawo' tu ya'alaj ti': Sen ma'alob, jach ma'alob palitzilech; tumen ma'alob meyajnajiquech yéetel le jun p'íito', quin beetiquech jalachil tu yóokol diez caajo'ob.

¹⁸J taal u láak jun túule' ca tu ya'alaj: Dzuul, a taakine' tu náajaltaj u láak cinco.

¹⁹Ti' lela' tu núucaj xan: Teche' yaan in beetiquech jalachil yóokol cinco caajo'ob.

²⁰J taal túun u láak jun túule' ca tu ya'alaj: Dzuul, je'el a taakina', tin to'aj yéetel jun xéet' nook.

²¹Sajacchajen ti' teech, tumen in wojel dzíidzic máaquech, ca molic ba'alo'ob ma' ta dzáaji' yéetel ca joch tu'ux ma' pakalnajechi'.

²²Ca j a'ala'ab ti' tumen le ajawo': Kaakas palitzil, yéetel a t'aano'ob quin p'is óoltiquech. Wa a wojel dzíidzic máaquen, quin molic ba'alo'ob ma' tin dzáaje' yéetel quin joch tu'ux ma' pakalnajene',

²³¿ba'axten túun ma' ta dzáaj in taakin tu'ux cu beeta'al u meyajo'ob u ti'al beyo', le quéen taalaquene', ca in kam yéetel le buca'aj tu náajaltaje'?

²⁴Ca tu ya'alaj ti' le yano'ob te'elo': Lukse'ex le taakin ti'o' ca a dza'ex ti' le máax yaan diez ti'o'.

²⁵Leti'obe' tu ya'alajo'ob ti': Dzuul, ti' leti'e' yaan diez taakino'ob.

²⁶Le ajawo' tu núucaj: Quin wa'alic te'exe', le máax mina'an ti'e' tac le jun p'íit yaan ti'o' bíin luksa'ac ti'.

²⁷Le máaxo'ob u p'ectmajeno'ob ma' u káato'ob ca'ach ca in beet in ajawile', taase'exo'ob waye' ca a quiimse'exo'ob tin táan.

²⁸Cu dzo'ocol u ya'alic lela', Jesuse' j máan táanil u ti'al u binbal Jerusalén.

²⁹Le ca j kuch ti' le pu'uc cu kaaba'intic Olivo'obo', naadz tu caajilo'ob Betfagé yéetel Betaniae', tu túuxtaj ca'a túul u aj canbalo'ob,

³⁰táan u ya'alic ti'ob: Xeene'ex ti' le chan cajtalil yaan naadzo'; le quéen kuchuque'ex te'elo', yaan a wilique'ex jun túul burro kaxa'an, mix jun téen na'at'ac tumen mixmáac; wach'e'ex, taase'ex teen.

³¹Wa yaan máax cu káatic te'ex ba'ax o'olal ca wach'ique'ex le burroo', a'ale'ex ti'e' kaabéet ti' Yuumtzil.

³²Le aj canbalo'obo' j bino'obe' ca tu yilajo'ob je'el bix a'ala'abic ti'ob tumen Jesuse'.

³³Ca'aliquil táan u wach'ico'obe', j káata'ab ti'ob tumen u yuumilo'ob le burroo': ¿Ba'axten ca wach'ique'ex?

³⁴Leti'obe' tu núucajo'ob: Tumen kaabéet ti' Yuumtzil.

³⁵Ca tu bisajo'ob ti' Jesús, tu dzáajo'ob u nooko'ob tu yóokol le burroo' ca tu na'acso'ob Jesús cutal yóokol.

³⁶Ca'aliquil táan u bin Jesuse', táan u jayico'ob u nooko'ob te j bejo'.

³⁷Le ca j náadz tu níix u pu'uquil le Olivo'obo', tuláacal u múuch'ul le ocsaj óolo'ob tzaypachtico' jo'op' u ka'am qui'iqui' t'antico'ob Ku yéetel qui'imac óolal tu yo'olal tuláacal le chíiculalo'ob dzo'oc u yilico'obo'.

³⁸Táan u ya'alico'ob: ¡Qui'iqui' t'anta'ac le ajaw cu taal tu kaaba' Yuumtzilo'! ¡Jéedzel te j ca'ano' yéetel nojbe'encunta'ac Ku!

³⁹Dze'edzec túun ti' le fariseob yano'ob ichil le máaco'obo' tu ya'alajo'ob ti': Aj ca'anbesaj key a aj canbalo'obo'.

⁴⁰Ba'ale' Jesuse' tu núucaj ti'ob: Quin wa'alic te'exe' wa cu maquic u chi' lelo'oba', bíin ka'am t'aanac le tuunicho'obo'.

⁴¹Le ca j kuch naadz Jerusalén, ca tu yilaj le caajo', j okolnaj Jesús tu yo'olal,

⁴²táan u ya'alic: Quexi' ca a na'at quex chéen ti' le a kiinila' le ba'ax cu páajtal u dzáic teech jéedzel óolalo', ba'ale' lelo' ta'aca'an bejela'e', ma' tu páajtal a wilic.

⁴³Tumen yaan u taal kaakas kiino'ob ta wóokol le quéen beeta'ac jun p'éel ca'anal pak ta bakpach tumen a aj p'eeco'ob. Yaan u bakpachtiquecho'ob u ti'al u loobiltiquecho'ob tuláacal tzéel.

⁴⁴Yaan a lúubsa'al lu'um. Yaan u quiimsa'al a cajnáalilo'ob. Ti' teche' ma' bíin p'áatac tuunich yóokol tuunichi', tumen ma' ta kaj óoltaj u kiinil ca j taal Ku u xíimbaltechi'.

⁴⁵Ca túun j ooc Jesús kulnaj, ca jo'op' u jóokesic le máaco'ob cu coonolo'ob yéetel cu mano'ob te'elo',

⁴⁶ca tu ya'alaj ti'ob: Ti' le Quili'ich Dzíibo'obo' cu ya'alique': In wotoche' u najil payalchi', ba'ale' te'exe' dzo'oc a sutique'ex u cúuchil j ocolo'ob.

⁴⁷Sáansamal cu ca'ansaj ca'ach Jesús te j kulnajo'. U nojochilo'ob le aj kiino'obo' yéetel u aj ca'anbesajilo'ob le a'almaj t'aano' bey xan u nojochilo'ob le caajo' táan u yilico'ob bix úuchac u quiimsico'ob.

⁴⁸Ba'ale' ma' tu caxtico'ob bix u beetico'ob, tumen tuláacal le máaco'obo' táan ca'ach u yutzil u'uyico'ob ba'ax cu ya'alic.