Read Yucateco San Lucas 2 Bible Online

San Lucas 2 - Yucateco bible

San Lucas 2

¹Ti' le kiino'obo' Augusto tu ya'alaj ca beeta'ac jun p'éel censo ti' tuláacal le lu'um tu'ux leti' emperadoro'.

²Le yáax censoa' beeta'ab ca'aliquil Cirenio u jalachil Siria.

³Tuláacal máax yanji' u bin tu caajal u ti'al ca dzíibta'ac u kaaba'i.

⁴Le o'olal túune' Josee' jóok Nazaret, jun p'éel u caaj tu lu'umil Galilea, ca j bin tu lu'umil Judea tu caajil Belén tu'ux sijnal David, tumen Josee' ti' u ch'i'ilancabil David u taal.

⁵J bin Belén ca dzíibta'ac u kaaba' yéetel María le máax núucmail dzo'ocol beel yéetele', máax xan koja'an ti' chaan pal.

⁶Ca'aliquil ti' yano'ob Belene' j kuch u kiinil u síijsaj María.

⁷Te'elo' tu síijsaj u yáax paal ca tu báadz tep'taj yéetel jajay nook, ca tu chicunsaj tu'ux cu tzéenta'al wacax, tumen ma' yanchaj cúuchil u ti'alo'ob tu najil u'ula'obi'.

⁸Yaan ca'ach j canan tamano'ob naadz Belén cu máansico'ob áakab te j káaxo' tu'ux cu canatico'ob u j tamano'ob.

⁹Tu séeblaquil chíicpaj ti'ob jun túul u ángel Yuumtzil yéetel léembalnaj xan u nojbe'enil Yuumtzil tu bakpacho'ob ca jach sajacchajo'ob.

¹⁰Ba'ale' le ángelo' tu ya'alaj ti'ob: Ma' a sajactale'ex, tumen táan in taasic te'ex jun p'éel ma'alob péectzil, lela' bíin u qui'imaccuns yóol tuláacal máac:

¹¹Bejela'e' j síij tu caajal David jun túul j tocsajil a ti'ale'ex, Cristo Yuumtzil.

¹²U chíiculale' bíin a wile'ex le chaan palo' báadz tep'ta'an yéetel jajay nook, chicunsa'an tu'ux cu tzéenta'al wacax.

¹³Tu séeblaquil ca j chíicpaj tu tzéel le ángelo' ya'ab u ángelilo'ob ca'an, táan ca'ach u qui'iqui' t'antico'ob Ku, táan u ya'alico'ob:

¹⁴Nojbe'enil ti' Yuum Ku tu ca'anilo'ob, yéetel ti' lu'ume' jéedzel óolal ti' wíinico'ob máaxo'ob cu qui'imaccunsa'al yóolo'ob yéetel u yutzil.

¹⁵Le ca'aj suunaj túun le ángelo'ob te j ca'ano', le j canan tamano'obo' ca tu ya'alaj tu baatzilo'ob: Co'one'ex tac Belén ca c il ba'ax dzo'oc u yúuchula', le xan dzo'oc u beetic x ojéeltic Yuumtzila'.

¹⁶Áalcabil binico'ob ca tu yilajo'ob María yéetel José yéetel le chaan pal chilicbal te tu'ux cu tzéenta'al wacaxo'.

¹⁷Le ca tu yilajo'obe', tu tzicbalto'ob le ba'ax a'ala'ab ti'ob tumen le ángel tu yo'olal le chaan palo',

¹⁸tuláacal túun le máaxo'ob tu yu'ubo'ob le ba'ax tu ya'alaj le j canan tamano'obo' ja'ak u yóolo'ob.

¹⁹Ba'ale' Maraíe' tu ta'acaj tuláacal le ba'alo'obo' tu pucsi'ikal táan u tuucul tu yo'olal.

²⁰Le túun le j canan tamano'obo' j suunajo'ob táan u nojbe'encunsico'ob Ku yéetel táan u qui'iqui' t'antico'ob tu yo'olal tuláacal le ba'alo'ob tu yu'ubajo'ob yéetel tu yilajo'obo', tumen tuláacal j úuch je'el bix a'ala'abic ti'obe'.

²¹Tu ocho kiino'ob síijic le chaan palo' súutkupta'abi', ca j dza'ab xan u kaaba'e Jesús, je'el bix tu ya'alaj le ángel ma'ili' koja'anchajac María ti' chaan pale'.

²²Le ca j kuch u kiinil u yutztalo'ob je'el bix u ya'almaj t'aan Moisese', j bisa'ab le chaan palo' tu caajil Jerusalén u ti'al dza'abal tu táan Yuumtzil.

²³Tu beeto'ob lela' tumen tu ya'almaj t'aan Yuumtzile' dzíiba'an: Tuláacal yáax j xibil paal cu síijile' yaan u jun páaycunsa'al u ti'al Yuumtzil.

²⁴J bino'ob túun u dza'ob le siibal cu ya'alic u ya'almaj t'aan Yuumtzil: ca'a túul mucuy wa ca'a túul tzuutzuy.

²⁵Cajacbal Jerusalén ti' le kiino'obo' jun túul máac, Simeón u kaaba'. Jun túul máac jach utz, cu kultic Ku táan xan u pa'atic u to'ocol u caajil Israel. Quili'ich Pixan ti' yaan yéetel Simeone',

²⁶u ya'almaj ti'e' ma' bíin quíimic ma'ili' u yil Cristo le máax bíin túuxta'ac tumen Yuumtzil.

²⁷Le máaca' dza'ab tu tuucul tumen Quili'ich Pixan ca xi'ic kulnaj; Le ca j taasa'ab Jesús tumen u taataob te kulnaj u ti'al u beeta'al ti' je'el bix u ya'alic le a'almaj t'aano',

²⁸Simeone' tu ch'a'aj le chaan pal u méeko', ca tu qui'iqui' t'antaj Ku, táan u ya'alic:

²⁹Yuumtzil bejela'e' cu páajtal a cha'ic in quíimil ti' jéedzele', tumen dzo'oc a dzo'ocbesic ba'ax a wa'almaj ti' teen a palitzil.

³⁰Dzo'oc in wilic yéetel in wicho'ob le j tocsajil

³¹ta túuxtaj tu táan tuláacal máaco'obo'.

³²Leti' le sáasil bíin u sáasilcunt le máaxo'ob ma' Israel u caajalo'obi', bey xan bíin u dzáa nojbe'enil ti' a caajal Israel.

³³José yéetel u maama Jesuse' ja'ak u yóolo'ob tu yo'olal le ba'ax tu ya'alaj Simeón tu yo'olal le chaan palo'.

³⁴Simeón túune' tu dzáaj u qui' t'aanil ti'ob yéetel tu ya'alaj xan ti' u maama Jesús: Ile, le chaan pala' dza'an u ti'al u beet u lúubul wa u líikil ya'ab máaco'ob ti' Israel. Leti'e' jun p'éel chíicul ma' túun j kambil tumen ya'ab máaco'ob;

³⁵bey túuno' bíin ojéelta'ac ba'ax cu tucultic jun túul máac tu pucsi'ikal. A ti'al teche' tuláacal le ba'alo'oba' bey jun p'éel táadz máascab u ti'al u táadzmáans a pixan.

³⁶Te'elo' ti' yaan ca'ach jun túul co'olel cu dzáic ojéeltbil ba'ax u káat Ku, Ana u kaaba', u x ch'úupal Fanuel ti' u ch'i'ibal Aser. Dzo'oc u ch'íijil. J dzo'oc u beel, ba'ale' siete ja'abo'ob cajlaj yéetel u yíicham.

³⁷Bejela'a' túune' ochenticuatro ja'abo'ob quíimic u yíicham. Ma'atech u jóokol ti' le kulnajo', ba'ale' yéetel kiin yéetel áakab táan ca'ach u meyajtic Yuumtzil yéetel su'ukin yéetel payalchi'.

³⁸Anae' j taal jach tu yorail, ca tu dzáaj nib óolal ti' Yuum Ku yéetel t'aanaj tu yo'olal le chaan pal ti' tuláacal le máaxo'ob cu pa'atico'ob ca'ach u tocsajil Jerusaleno'.

³⁹Le ca j dzo'oc u dzo'ocbesico'ob ba'ax cu ya'alic u ya'almaj t'aan Yuumtzile', ca j suunajo'ob Galilea tu caajil Nazaret u caajalo'ob.

⁴⁰Le túun le chaan palo' táan u nojochtal, táan u jach antal u muuk bey xan u na'at, yéetel táan u qui' t'anta'al tumen Ku.

⁴¹U taataob Jesuse' cu bino'ob ca'ach Jerusalén tuláacal ja'abo'ob u ti'al u kiinbesico'ob Pascua.

⁴²Le ca j yanchaj doce ja'abo'ob ti' Jesuse', tuláacalo'ob j bino'ob Jerusalén je'el bix suuquil u kiinbesico'obe'.

⁴³U ti'al u suutbalo'ob leti'ob dzo'oc le kiinbesajo', Jesuse' j p'áat Jerusalén, mix u maama mix José tu yojéeltajo'ob.

⁴⁴Tu tuclajo'obe' táan ca'ach u taal Jesús ichil le ya'ab máaco'obo'. Bey túuno' xíimbalnajo'ob jun p'éel kiin, ba'ale' le ca tu yóoltajo'ob u caxto'ob ichil u láaktzilo'ob yéetel u kaj óolalo'obe',

⁴⁵ma' tu yilajo'obi', ca túun suunajo'ob u caxto'ob Jerusalén,

⁴⁶Tu yóox p'éel kiin ca tu nuptanto'ob te j kulnajo', culucbal ichil u aj ca'anbesajilo'ob le a'almaj t'aano', táan u yu'ubic ba'ax cu ya'alico'ob yéetel táan u káat chi'itico'ob.

⁴⁷Tuláacal le tu yu'ubajo'ob u t'aano' ja'ak u yóolo'ob, tumen jach sen yaan u na'at, yéetel tu yo'olal u nuuquil le káat chi'ob beeta'ab ti'o'.

⁴⁸Le ca j ila'ab tumen u taataobe', ja'ak u yóolo'ob; u maama túune' tu ya'alaj ti': in j xibil paal, ¿ba'axten ta beetaj to'on lela'? A taata yéetel tene' dzo'oc c sen caxtiquech yéetel yaayaj óolal.

⁴⁹Jesús tu ya'alaj ti'ob: ¿Ba'axten ca caxtiquene'ex? ¿Ma' wa a wojele'ex ti' u ba'alilo'ob in Taata unaj in wantali'?

⁵⁰Ba'ale' leti'obe' ma' tu na'atajo'ob le ba'ax tu ya'alajo'.

⁵¹Ca túun j suunaj tu yéetelo'ob tac Nazaret, láili' cu sen u'uyaj t'antico'obe'. U maamae' táan u ta'aquic tu pucsi'ikal tuláacal le ba'alo'oba'.

⁵²Ca'aliquile' táan u bin u nojochtal Jesús ti' u wíinclil yéetel ti' u yojéelaj, kambe'en xan tu táan Ku yéetel tu táan máaco'ob.