Read Yucateco San Lucas 21 Bible Online

San Lucas 21 - Yucateco bible

San Lucas 21

¹Te j kulnajo' tu yilaj Jesús le ayikal máaco'obo' táan u dzáico'ob taakin tu nu'uculil siibalo'ob.

²Tu yilaj xan jun túul óotzil x quimen íichame' tu dzáaj ca'a p'éel mejen taakin.

³Ca tu ya'alaj Jesús: Tu jaajil quin wa'alic ti' te'exe' le óotzil x quimen íichama' asab ya'ab le siibal tu dzáajo' ti' le tu dzáaj le u láako'obo';

⁴tumen tuláacal le máaco'oba' tu dzáajo'ob chéen le ba'ax tu yalabtaj ti'obo', ba'ale' le co'olela' ichil u yóotzile' tu dzáaj tuláacal le ba'ax yaan ti' ca'ach u ti'al u cuxtale'.

⁵Dze'edzec máaco'obe' táan ca'ach u t'aano'ob tu yo'olal le kulnajo', bix jadzutzquinta'anil yéetel qui'ichquelem tuunicho'ob bey xan yéetel ba'alo'ob siibla'anta'ano', ca tu ya'alaj Jesús:

⁶Bíin taalac u kiinil u pu'ucul tuláacal le ba'axo'ob ca wilique'exa'. Mix jun p'éel tuunich bíin p'áatac tu yóokol u láak.

⁷Ca túun káata'ab ti' Jesús: Aj ca'anbesaj, ¿ba'ax kiin quéen úuchuc lela'? ¿Ba'ax chíiculal cun e'esic bin u ca'aj úuchul le ba'alo'oba'?

⁸Jesuse' tu ya'alaj: Canantaba'ex yéetel ma' a cha'ic a tu'usule'ex. Tumen bíin taalac máaco'ob tin kaaba' cun u ya'alo'obe': Ten le Cristoo', yéetel: Bejela'e' u kiinil. Ba'ale' ma' a bine'ex tu paacho'ob.

⁹Le quéen a wu'uye'ex u péectzil ba'atelo'ob yéetel u líikil máaco'obe', ma' u ja'akal a wóole'ex, tumen kaabéet u yúuchul táanil le ba'alo'oba', ba'ale' ma' tu séeblaquil quéen kuchuc u xuuli'.

¹⁰Jesuse' tu ya'alaj túun ti'ob: Jun p'éel caaje' yaan u ba'atel yéetel u láak caaj, bey xan jun p'éel ajawil yaan u ba'atel yéetel u láak ajawil.

¹¹Bíin yanac nucuch quíilbal lu'umo'ob, wi'ijilo'ob yéetel koja'anilo'ob ti' jejeláas cúuchilo'ob, bey xan nucuch chíiculalo'ob yéetel ba'alo'ob cu taasic ja'asaj óolal bíin ila'ac tu táan ca'an.

¹²Ba'ale' ma'ili' úuchuc lela', te'exe' bíin chu'ucuque'ex, bíin ch'a'apachta'aque'ex, bíin ku'ubuque'ex te j sinagogaobo', bíin ka'alque'ex yéetel bíin bisa'aque'ex tu táan ajawo'ob yéetel tu táan jalach wíinico'ob tu yo'olal in kaaba'.

¹³Lela' bíin u dzáa tu'ux a t'aane'ex tin wo'olal.

¹⁴Ilawile'ex túun ma' a sen tucultique'ex táanil ba'ax can a wa'ale'ex u ti'al a núuquiqu'ex u t'aano'ob,

¹⁵tumen teen quin in dzáa te'ex u t'aanilo'ob na'at mix jun túul a enemigoex cun páajtal u xachicubáa mix u káat núuctic te'ex.

¹⁶Ba'ale' te'exe' bíin ku'ubuque'ex tac tumen a taataex, a sucu'une'ex, a láake'ex bey xan tumen a amigoex; dze'edzec ti' te'exe' bíin quíimsa'aque'ex;

¹⁷bin ch'a'a p'ecta'aque'ex xan tumen tuláacal máac tin wo'olal.

¹⁸Ba'ale' mix jun cúul u tzo'otzel a póole'ex bíin sa'atac.

¹⁹Wa cu chúucpajal a wóole'ex, bíin yanac te'ex le jaajil cuxtalo'.

²⁰Le quéen a wile'ex bakpachta'an u caajil Jerusalén tumen soldado'obe', ojéelte'ex dzo'oc u náadzal u kiinil u xu'ulsa'al.

²¹Le máaxo'ob yano'ob Judeao' púudzuco'ob te j pu'uco'obo', le yano'ob ichil u caajil Jerusaleno' jóokoco'obi', le yano'ob xan káaxo' ma' unaj u suuto'ob te j caajo'.

²²Tumen lelo'obo' u kiinilo'ob yaayaj óolal, u ti'al ca dzo'ocbesa'ac tuláacal le ba'ax cu ya'alic le Quili'ich Dzíibo'obo'.

²³¡Yaj yanil le co'olelo'ob koja'ano'ob ti' chaan paal wa táan chu'uchil u chaan palo'ob ti' le kiino'obo'! tumen yaan u taal nojoch yaj óolal yóokolcaab yéetel jun p'éel yaayaj jaadz tu yóokol le máaco'oba'.

²⁴Dze'edzeque' bíin quíimsa'ac ti' ba'ateltáanbail, u láako'obe' bíin ma'achac bisbilo'ob ti' tuláacal caajo'ob; le j táanxel lu'umilo'obo' bíin u pepe'echakto'ob u caajil Jerusalén tac quéen kuchuc le kiin a'ala'an ti'obe'.

²⁵Bíin yanac chíiculalo'ob ti' le kiino', ti' le ujo' bey xan ti' le eeko'obo'. Way lu'ume' le caajo'obo' yaan u sa'atal u yóolo'ob; yaan xan u ja'akal u yóolo'ob tu yo'olal u quíilbal u cuclilo'ob le ka'anabo'.

²⁶Máaco'obe' yaan u lúubul u muuko'ob yéetel sajaquil le quéen u tuculto'ob ba'ax cun úuchul yóokolcaab, tumen tac u páajtalilo'ob ca'ane' yaan u quiquilanquilo'ob.

²⁷Bíin ila'ac túun u Paal Máac táan u taal ti' jun p'éel múuyal yéetel páajtalil bey xan yéetel qui'ichquelemil.

²⁸Le quéen cáajac u yúuchul le ba'alo'oba', yanac a wóole'ex, líikes a poole'ex tumen séeba'an can jáalkabtbile'ex.

²⁹Tu ya'alaj xan ti'ob le quet t'aana': Ile'ex jun cúul higoo' wa je'el ba'alac che'ile'.

³⁰Le quéen a wile'ex táan u tóop'ol u le'e, te'exe' a wojele'exe' táan u náadzal u kiinil u beetic kíilcab.

³¹Bey xano' le quéen a wile'ex táan u yúuchul le ba'alo'oba', ojéelte'ex u ajawil Kue' naadz yanil.

³²Tu jaajil quin wa'alic te'exe' tuláacal le ba'alo'oba' yaan u yúuchul ma'ili' quíimic tuláacal u máaquilo'ob le kiino'oba'.

³³Ca'an yéetel lu'um bíin máanaco'ob, ba'ale' in t'aano'obe' ma' bíin máanaco'ob'.

³⁴Canantaba'ex, ma' a cha'ic u chichtal a pucsi'ikale'ex tu yo'olal kaakas cuxtal, cáaltal yéetel u táan óolal u ba'alubáa le cuxtala', u ti'al ma' u taasic ja'ak óolal ti' te'ex le kiino'

³⁵bey jun p'éel léech cu ka'alale', tumen bey bíin taalac le kiino' tu yóokol tuláacal u cajnáalilo'ob yóokolcaab.

³⁶P'il a wiche'ex túun yéetel payalchi'inene'ex mantadz u ti'al ca páatac a wantale'ex tu táan u Paal Máac.

³⁷Yéetel kiine' Jesuse' cu ca'ansaj kulnaj, yéetel áakabe' cu bíin u ti'al p'áatal te j pu'uc cu kaaba'intic Olivo'ob.

³⁸Tuláacal le máaco'obo' cu kuchulo'ob kulnaj jach ja'atzcab kiin u ti'al u yu'ubico'ob u ca'ansaj Jesús.