Read Yucateco San Lucas 22 Bible Online

San Lucas 22 - Yucateco bible

San Lucas 22

¹Nadza'an u kiinil u kiinbesa'al u jaanta'al le waaj x ma' levadurao', u káat u ya'ale' u kiinbesajil le Pascuao'.

²U nojochilo'ob le aj kiino'obo' yéetel u aj ca'anbesajilo'ob le a'almaj t'aano' táan ca'ach u caxtico'ob bix je'el u páajtal u quiimsico'ob Jesús, tumen sajaco'ob ti' le máaco'obo'.

³Ca túun j ooc Satanas tu pucsi'ikal Judas, le máax cu kaaba'intic xan Iscariote, leti'e' jun túul ti' le doce aj canbalo'obo'.

⁴Lela' j bin u yil u nojochilo'ob le aj kiino'obo' yéetel u nojochilo'ob le kulnajo', ca tu ya'alaj ti'ob bix je'el u kubic Jesús tu kabo'obe'.

⁵Leti'obe' qui'imacchaj u yóolo'ob ca tu ya'alajo'ob u dzáico'ob taakin ti'.

⁶Judas tu éejemtaje' ca jo'op' u caxtic bix cun u kubic ti'ob le quéen mina'anchajac mix máaque'.

⁷J kuch u kiinil u jaanta'al le waaj x ma' levadurao', u kiinil u quiimsa'al u j tamanil le Pascuao'.

⁸Jesuse' tu túuxtaj Pedro yéetel Juan, táan u ya'alic: Xeene'ex a nu'ucbese'ex to'on u janalil le Pascuao'.

⁹Leti'obe' tu káat chi'ito'ob ti': ¿Tu'ux a káat ca c nu'ucbesej?

¹⁰Ca j núuca'ab ti'ob tumen Jesús: Le quéen ocoque'ex ichil le caajo', yaan a wilique'ex jun túul máac táan u bisic juum p'uul ja'. Xeene'ex tu paach tac te j naj tu'ux cun ocolo',

¹¹ca a wa'ale'ex ti' u yuumil le najo': Le aj ca'anbesajo' cu ya'alic teech: ¿Tu'ux yaan le cúuchil tu'ux quin in jaant u janalil le Pascua yéetel in aj canbalo'obo'?

¹²Leti' túune' yaan u ye'esic te'ex jun p'éel nojoch cúuchil nu'uc ta'an tu ca'anlil le najo'; máakante'ex le janal te'elo'.

¹³Leti'obe' j bino'obe' ca tu yilajo'ob tuláacal je'el bix a'ala'abic ti'ob tumen Jesuse', ca tu máaka'anto'ob u janalil le Pascuao'.

¹⁴Le ca j kuch u yoraile' Jesuse' j culaj janal yéetel u aj canbalo'ob.

¹⁵Ca tu ya'alaj ti'ob: Buca'aj in dzíiboltmail in jaantic ta wéetele'ex u janalil le Pascua' ma'ili' mukyajnaquene'.

¹⁶Tumen quin wa'alic te'exe' ma' bíin in jaant tu ca'a téeni' p'is le quéen dzo'ocpajac tu ajawil Kue'.

¹⁷Ca tu ch'a'aj tu kab le ukulo', tu dzáaj nib óolal ca tu ya'alaj: Ch'a'ex lela', t'oxe'ex ichile'ex;

¹⁸tumen quin wa'alic te'exe' ma' bíin in wuk tu ca'a téen u kab uvao' p'is le quéen taalac u ajawil Kue'.

¹⁹Cu dzo'ocole' tu machaj le waajo', tu dzáaj nib óolal, tu xet'aje', ca tu dzáaj ti'ob, táan u ya'alic: Lela' in wíinclil kuba'an ti' quíimil ta wo'olale'ex. Beete'ex lela' u ti'al a ka'ajsiquene'ex.

²⁰Bey xan tu beetaj yéetel le ukulo' le ca j dzo'oc le janalo', ca tu ya'alaj: Le ukula' leti' le túumben nup t'aan jajcuna'an yéetel in ki'ikel weca'an ta wo'olale'ex.

²¹Ba'ale' u kab le máax cun kubiqueno' ti' yaan yéetel in kab tu yóokol le mayacche'a'.

²²U Paal Máaque' táan u bin ti' le bej dza'an ti' u xíimbalto', ba'ale' ¡Yaj yanil le máax kubico'!

²³Le aj canbalo'ob túuno' jo'op' u káatic tu baatzilo'obe' máax ichilo'ob cun kubic.

²⁴Ca jo'op' u ba'atel t'antico'ob tu baatzilo'obe' máax ichilo'ob u mas nojochil.

²⁵Ba'ale' ca j a'ala'ab ti'ob tumen Jesús: U ajawo'ob caajo'obe' cu beetic u jalachilo'ob yéetel páajtalil tu yóokolo'ob, le xan u nuuctaquilo'obo' cu ya'alale' máaco'ob cu beetico'ob utz.

²⁶Te'exe' ma' unaj a béeytale'exo', ba'ale' le máax mas nojoch ichile'exe' yaan u beeticubáa bey u mas chichanile'; le máax nojpoole' yaan u beeticubáa bey le máax cu meyajo'.

²⁷Tumen ¿máax mas nojoch, le máax cu cutal janalo' wa le máax meyajtico'? ¿Ma' wa leti' le máax cu cutal janalo'? Ba'ale' tene' ti' yanen ichile'ex bey le máax cu meyajo'.

²⁸Te'ex máax yanchaja'ane'ex tin wéetel mantadz ti' in túuntaj óolalo'ob.

²⁹Le beetique' teen quin dzáic te'ex jun p'éel ajawil je'el bix dza'anil ti' teen tumen in Taatae',

³⁰u ti'al ca yanaque'ex yéetel ca ukulnaque'ex tin wéetel tin ajawil, bey xan u ti'al ca culaque'ex ti' jalach káanche'ob u ti'al ca p'is óolte'ex u doce chi'ibalilo'ob Israel.

³¹Yuumtzile' tu ya'alaj xan: Simón, ilawile satanase' dzo'oc u káatique'ex u ti'al u tíite'ex je'el bix u beeta'al ti' trigoe',

³²ba'ale' tene' dzo'oc in payalchi' ta wo'olale' u ti'al ma' u mina'antal a wocsaj óolal. Teech túune', le quéen suunaqueche'; áant a sucu'uno'ob u ti'al ca jéedzec u yóolo'ob.

³³Ca j a'ala'ab ti' tumen Simón: Yuumtzil, tene' in dzaama in wóol u ti'al ca ka'alaquen ta wéetel wa tac u ti'al ca quíimiquen ta wéetel.

³⁴Ca j a'ala'ab ti' tumen Jesús: Pedro, quin wa'alic teche', ma'ili' kaaynac le j t'eel bejela'o', teche' óoxten bíin a wa'al ma' a kaj óoleni'.

³⁵Ca túun j káata'ab ti'ob tumen Jesús: Le ca tin túuxtaje'ex x ma' sáabucanil, x ma' taakinil, x ma' xanabile', ¿yaan wa ba'ax tu binetaj te'ex? Leti'obe' tu ya'alajo'ob: Mixba'al.

³⁶Ca tu ya'alaj ti'ob: Bejela'e' ma' beyi'; le máax yaan sáabucan ti'e' u bise, bey xan taakin; le máax mina'an táadz máascab ti'e' u con u búuque' ca u mane.

³⁷Tumen quin wa'alic te'exe' yaan u dzo'ocpajal ti' teen le ba'ax cu ya'alic le Quili'ich Dzíibo'obo': Ichil kaakas máaco'ob xo'oqui. Tumen tuláacal le ba'axo'ob dzíibta'an tin wo'olalo' yaan u dzo'ocpajal.

³⁸Leti'ob túune' tu ya'alajo'ob: Yuumtzil, je'el ca'a p'éel táadz máascaba'. Leti'e' tu núucaj: Yaan yéetel lelo'.

³⁹Ca jóok Jesuse' ca j bin tu pu'uquil Olivo'ob je'el bix suuquil ti'e', ca j bin u aj canbalo'ob tu paach.

⁴⁰Le ca j kuch te'elo' tu ya'alaj ti'ob: Payalchi'inene'ex tu yo'olal ma' a lúubule'ex ti' túuntaj óol.

⁴¹Cu dzo'ocole' ca j náachchaj Jesús ti'ob: u náachile' bey tac tu'ux cu náacal u ch'in jun túul máaque', ca j xolaj payalchi'.

⁴²Tu ya'alaj: In yuum, wa a káate' toquen ti' le mukyaja', ba'ale' ma' u beeta'al le ba'ax in káat tene', ba'ale' le ba'ax a káat teche'.

⁴³Ca túun j chíicpaj jun túul u ángel ca'an u ti'al dzáic muuk ti'.

⁴⁴Ca'aliquil táan u sen mukyaje' tu asab dzáaj u yóol ti' u payalchi', ca j ch'áaj u kíilcab bey u nucuch ch'áajal ki'ik cu lúubul ju'ume'.

⁴⁵Cu dzo'ocol u payalchi'e' líike' ca j bin tu'ux yaan u aj canbalo'obe', ca tu yilaje' táan u wenelo'ob, luba'an u muuko'ob tu yo'olal yaayaj óolal.

⁴⁶Ca tu ya'alaj ti'ob: ¿Ba'axten táan a wenele'ex? Líikene'ex, payalchi'inene'ex tu yo'olal ma' a lúubule'ex ti' túuntaj óol.

⁴⁷Ca'aliquil táan u t'aan Jesuse' j kuch ya'ab máaco'ob. Táanil ti' leti'obe' j taal Judas lela' jun túul ti' le aj canbalo'obo', ca tu nadzajubáa ti' Jesús u ti'al u dzu'udze.

⁴⁸Ca túun j a'ala'ab ti' tumen Jesús: Judas, ¿Yéetel jun p'éel dzu'udz ca kubic u Paal Máac?

⁴⁹Le máaxo'ob yano'ob yéetel Jesuso', le ca tu yilajo'ob ba'ax cu yúuchule', tu káatajo'ob ti': Yuumtzil, ¿c kamico'ob wa yéetel máascab?

⁵⁰Jun túul ichilo'obe' tu beetaj loob ti' u palitzil u nojoch le aj kiino'obo', tu ch'acaj u le' u x no'oj xiquin.

⁵¹Ba'ale' tu ya'alaj Jesús: P'áate'ex, yaan yéetel lelo'. Ca tu péedzkabtaj Jesús u xiquin le palitzilo' ca tu dzacaj.

⁵²Cu dzo'ocole' tu ya'alaj ti' u máaquilo'ob le aj kiino'ob, ti' u nuuctaquil le kulnajo', yéetel ti' le anciano'obo', le máaxo'ob j taalo'ob u ti'al bisico': ¿Dzo'oc wa a jóokole'ex yéetel máascabo'ob bey xan yéetel che'ob, bey u ti'al a chuquique'ex jun túul j ocole'?

⁵³Le ca'ach ti' yanen ta wéetele'ex láaj kiin te j kulnajo', mix ta tich'aj a kabe'ex u ti'al a machquene'exi'; ba'ale' lela' a hora'ex bey xan u ti'al u páajtalil le éekjoch'e'enilo'.

⁵⁴Ca túun ma'ach Jesuse' ca j bisa'ab tu yotoch u nojochil le aj kiino'obo'. Pedroe', quex náach tu tzaypachtilaque', j kuch tac tu'ux j bisa'abi.

⁵⁵Chúumuc táancabe' j t'a'ab jun p'éel káake', ca j culajo'ob tu bakpach; Pedroe' j culaj xan ichilo'ob.

⁵⁶Jun túul x palitzile', le ca tu yilaj ti' culucbal Pedro tu chuun le káako', tu jach pactaje' ca tu ya'alaj: Bey xan le máaca' ti' yaan ca'ach yéetel Jesuse'.

⁵⁷Ba'ale' Pedroe' tu ya'alaj ma' jaaji, táan u ya'alic: Co'olel, tene' ma' in kaj óoli'.

⁵⁸Ca j máan jun súutuque' j ila'ab tumen jun túul máaque', ca j a'ala'ab ti' tumen: Teche' jun túulech ti'obi'. Ba'ale' Pedroe' tu ya'alaj: Ma', wíinic, ma' teni'.

⁵⁹Cu dzo'ocol u máan míin jun p'éel horae', u láak jun túul máaque' tu sen a'alaj: Jach tu jaajile' le máaca' ti' yaan ca'ach tu yéetele' tumen Galileail xan.

⁶⁰Ca túun tu ya'alaj Pedro: Wíinic, mix in wojel ba'ax ca wa'aliqui'. Jach ti' le súutuco', ca'aliquil táan u t'aan Pedroe', j kaaynaj jun túul j t'eel.

⁶¹Yuumtzile' tu sutaj u yiche' ca tu pactaj Pedro. Pedro túune' j ka'aj ti' ba'ax j a'ala'ab ti' tumen Yuumtzil: Ma'ili' kaaynac le j t'eel bejela'a' óox téen bíin a wa'al ma' a kaj óoleni'.

⁶²Ca jóok Pedroe' ca okolnaj yéetel yaayaj óolal.

⁶³Le máaxo'ob canantic Jesuso' tu sen p'a'astajo'ob yéetel tu ja'ajadzo'ob.

⁶⁴Tu pixajo'ob u yiche', tu lajo'obe', ca tu ya'alajo'ob ti': ¡Na'at máax lajech!

⁶⁵Tu ya'alajo'ob xan ya'abcach ba'alo'ob u ti'al u poch'ico'ob.

⁶⁶Le ca j sáaschaje', j much'laj u ancianoilo'ob le judíobo', u nojochilo'ob le aj kiino'obo' yéetel u aj ca'anbesajilo'ob le a'almaj t'aano', ca j bisa'ab Jesús tu táano'obe'; ca tu káat chi'ito'ob ti':

⁶⁷A'al to'on, ¿teech wa le Cristoo'? Leti'e' tu núucaj ti'ob: Wa quin wa'alic te'ex tene', ma' táan a wocsaj óolte'ex.

⁶⁸Wa xan quin káatic a chi'exe', ma' táan a núuque'ex teen mix táan a cha'iquene'ex.

⁶⁹Ba'ale' líikbal bejela'e' u Paal Máaque' yaan u cutal tu x no'oj Ku máax yaan tuláacal páajtalil ti'.

⁷⁰Tuláacalo'ob tu káatajo'ob ti': ¿Teech wa túun u Paal Ku? Ca tu núucaj Jesús ti'ob: Bey, teen, je'el bix dzo'oc a wa'alique'exo'.

⁷¹Leti'ob túune' tu ya'alajo'ob: ¿Ba'ax u biilal to'on u láak j tacpoolo'ob? To'on dzo'oc c u'uyic u jóokol tu chi'.