Read Yucateco San Lucas 24 Bible Online

San Lucas 24 - Yucateco bible

San Lucas 24

¹Tu yáax kiinil le semanao' le co'olelo'obo' j suunajo'ob te j mucnalo', táan u píikil, táan u bisico'ob le qui'iboc xíiwo'ob tu nu'ucbeso'obe'; yaan u láak co'olelo'ob j bino'ob xan yéetelo'ob.

²Le ca j kuhco'obe' tu yilo'ob mina'an tu cúuchile' le tuunich macmajil ca'ach le mucnalo'.

³Ca j ooco'obi', ba'ale' ma' tu yilajo'ob u wíinclil Yuum Jesusi'.

⁴Sa'at u yóolo'ob tu yo'olal lela', tu yilajo'ob túun ca'a túul xiibo'ob táan u léembal u búuco'ob wa'alacbalo'ob tu yicnalo'ob.

⁵Ba'ale' tumen chinlajo'ob tac lu'um yéetel sajaquilile', j a'ala'ab ti'ob tumen le xiibo'obo': ¿Ba'axten ca caxtique'ex ichil quimeno'ob máax cuxa'an?

⁶Mina'an waye', tumen dzo'oc u ca'a púut cuxtal. Ka'ajac te'ex ba'ax tu ya'alaj te'ex ca'aliquil ti' yaan Galileae',

⁷táan u ya'alique' u Paal Máaque' yaan u ku'ubul tu kab keban máaco'ob, yaan u químsa'al ti' cruz, ba'ale' tu yóox p'éel kiine' yaan u ca'a púut cuxtal.

⁸Ka'aj túun ti'ob ba'ax u ya'almaj Jesús.

⁹Cu dzo'ocol túun u lukbalo'ob te j mucnalo', tu tzicbaltajo'ob tuláacal lela' ti' le once aj canbalo'obo' bey xan ti' le u láako'obo'.

¹⁰María Magdalena, Juana, María u maama Jacobo yéetel u láak co'olelo'ob leti'ob bis le péectzil ti' le aj canbalo'obo'.

¹¹Ba'ale' le aj canbalo'obo' tu yu'ubajo'ob bey chocojo'olal le ba'ax tu ya'alaj le co'olelo'obo', le o'olale' ma' tu yocsaj óolto'obi'.

¹²Ba'ale' Pedroe' jóoke' ca j bin áalcabil tac te mucnalo'. Le ca j paacatnaj ichile' tu yilaj le sac nook dza'an jun tzéelo', ca j bin tu yotoch jaka'an yóol tu yo'olal le ba'ax dzo'oc u yúuchulo'.

¹³Ti' le kiino' ca'a túul le aj canbalo'obo' táan u bino'ob tu caajil Emaús, míin óox lúub tu caajil Jerusalén.

¹⁴Táan u tzicbaltico'ob tuláacal le ba'ax dzo'oc u yúuchulo'.

¹⁵Ca'aliquil táan u tzicbaltico'ob yéetel táan u t'anal t'aano'obe', Jesuse' tu nadzubáa tu yicnalo'obe' ca jo'op' u xíimbal yéetelo'ob.

¹⁶Ba'ale' quex tu yilajo'obe' yaan ba'ax beetic ma' u kaj óoltico'ob máaxi'.

¹⁷Ca túun j káata'ab ti'ob tumen Jesús: ¿Ba'ax ca t'anal t'antique'ex ca'aliquil táan a xíimbale'ex te j beja'? ¿Ba'axten jach luba'an a wóole'ex?

¹⁸Cleofas, jun túul ti'obe' tu núucaj ti': ¿Chéen wa teech ichil le u'ulabo'ob ma' a wojel ba'ax dzo'oc u yúuchul Jerusalén ti' le kiino'oba'?

¹⁹Jesuse' tu ya'alaj ti'ob: ¿Ba'ax dzo'oc u yúuchul? Ca tu núucajo'ob ti': Le ba'ax j úuch ti' Jesús Nazaretilo', jun túul aj bóobat nojoch u páajtalil tu táan Ku yéetel tu táan tuláacal máaco'ob ti' ba'ax cu beetic yéetel ti' ba'ax cu ya'alic.

²⁰J ku'ub tumen u nojchilo'ob le aj kiino'obo' yéetel tumen c jalach wíinico'ob u ti'al ca xot kinta'ac ti' quíimil yéetel u ti'al ca si'inic ti' cruz.

²¹To'one' t tucultaje' leti' le máax cun toquic ca'ach u caajil Israel. Bejela'e' tu yóokol tuláacal lela' dzo'oc óox p'éel kiin úuchuc le ba'alo'oba'.

²²Quex tumen dze'edzec co'olelo'ob ichilo'one' dzo'oc u ja'asico'ob c óol, tumen j bino'ob táan u taal u sáastal te j mucnalo',

²³ba'ale' tumen ma' tu yilajo'ob u wíinclile' j taalo'ob u tzicbalt to'one' chíicpaj ti'ob ángelo'ob táan u ya'alico'obe' cuxa'an Jesús.

²⁴Cu dzo'ocole' dze'edzec ti' to'one' j bino'ob te j mucnalo' ca tu yilajo'ob bey je'el bix tu ya'aljilac le co'olelo'obo', ba'ale' ma' tu yilajo'ob Jesusi'.

²⁵Ca túun j a'ala'ab ti'ob tumen Jesús: ¡Jach mina'an wa a na'ate'ex, buca'aj dzo'oc u xáantal a wocsaj óoltique'ex tuláacal ba'ax a'ala'an tumen le aj bóobato'obo'!

²⁶¿Ma' wa unaj ca u mukyajt le Cristoo' tuláacal le ba'alo'oba' ma'ili' nojbe'encunsa'aque'?

²⁷Ca túun jo'op' u tzolic ti'ob le ba'ax cu ya'alic tuláacal le Quili'ich Dzíibo'ob tu yo'olal leti'o', cáaj yéetel u dzíibo'ob Moisés ca tu dzo'ocsaj yéetel u dzíibo'ob tuláacal le aj bóobato'obo'.

²⁸Le ca j kucho'ob te j caaj tu'ux cu bino'obo', Jesuse' tu beetaj bey yaan u bin u xíimbale'.

²⁹Ba'ale' leti'obe' tu sen káat óoltajo'ob ti' ca p'áatac, táan u ya'alico'ob: P'áaten t éeteel, tumen táan u bin kiin yéetel ta'aytac u yáakabtal. Ca túun j ooc Jesús p'áatal yéetelo'ob.

³⁰Le ca j culaj janal yéetelo'obe', tu ch'a'aj le waajo', tu dzáaj nib óolal, tu xet'aje' ca tu dzáaj ti'ob.

³¹Ti' le súutuco' sáasilchaj u yicho'obe' ca tu kaj óoltajo'ob, ba'ale' leti'e' j sa'at tu táan yicho'ob.

³²Ca tu ya'alajo'ob tu baatzilo'ob: ¿Ma' wa jaj bey jun p'éel káak j t'a'ab ti' c pucsi'ikal le ca j t'aanaj t éetel te j bejo', ca'aliquil táan u tzolic to'on le Quili'ich Dzíibo'obo'?

³³Tu séeblaquil líiko'ob túune' ca j suunajo'ob Jerusalén, tu'ux tu yilajo'ob much'ucbal le once aj canbalo'obo' bey xan le u láako'ob yano'ob yéetelo'obo'.

³⁴Lelo'oba' tu ya'alajo'ob ti'ob: Tu jaajil dzo'oc u ca'a púut cuxtal Yuumtzil, dzo'oc u chíicpajal ti' Simón.

³⁵Leti'ob túune' tu tzicbaltajo'ob ba'ax j úuch ti'ob te j bejo', bix úuchic u kaj óoltico'ob Jesús le ca tu xet'aj le waajo'.

³⁶Ca'aliquil táan u t'aano'ob tu yo'olal le ba'alo'oba', Jesuse' j chíicpaj chúumuc ti'ob, táan u ya'alic: Jéedzel ti' te'ex.

³⁷Leti'obe' ja'ak u yóolo'ob yéetel sen sajacchajo'ob ca tu tucultajo'obe' táan u yilico'ob jun túul pixan.

³⁸Ba'ale' ca j a'ala'ab ti'ob tumen Jesús: ¿Ba'axten jaka'an a wóole'ex? ¿Ba'axten yaan ca'a p'éel óolal ta pucsi'ikale'ex?

³⁹Ile'ex in kabo'ob yéetel in wooco'ob. Jach tu jaajil teen. Machene'exi' yéetel pactene'exi', tumen jun túul pixane' mina'an u bakel mix u baaquel je'el bix a wilique'ex yaan ti' tena'.

⁴⁰Le ca tu ya'alaj lela' tu ye'esaj u kabo'ob yéetel u yooco'ob ti'ob.

⁴¹Ba'ale' tumen leti'obe' láili' ma' táan u yocsaj óoltico'ob, tu yo'olal u sen qui'imac óolalo'ob yéetel u jaka'anil yóolo'obe', ca j a'ala'ab ti'ob tumen Jesús: ¿Yaan wa ba'al jaantbil waye'?

⁴²Ca túun dza'ab jun xéet' ka'abil cay ti', bey xan jun p'íit caab.

⁴³Leti'e' tu ch'a'aje' ca tu jaantaj tu táano'ob.

⁴⁴Cu dzo'ocole' ca tu ya'alaj ti'ob: Le ba'ax j úuch tena' leti' le ba'ax tin wa'alaj te'ex ca'aliquil yanen ca'ach ta wéetele'exe': kaabéet u dzo'ocbesa'al tuláacal ba'ax dzíiba'an tin wo'olal tu ya'almaj t'aan Moisés, tu dzíibo'ob le aj bóobato'obo' yéetel ti' le Salmo'obo'.

⁴⁵Ca túun tu je'aj u tuuculo'ob u ti'al u na'atico'ob le Quili'ich Dzíibo'obo'.

⁴⁶Ca tu ya'alaj ti'ob: Bey dzíiba'anil, le Cristoo' kaabéet u mukyaj, ba'ale' tu yóox p'éel kiine' yaan u ca'a púut cuxtal ichil le quimeno'obo';

⁴⁷tu kaaba' xan bíin úuchuc tze'ec ti' tuláacal caajo'ob, lela' Jerusalén cun chúucpajal. Yaan u ya'ala'al ti'obe' unaj u kexic u tuuculo'ob u ti'al ca sa'atsa'ac u kebano'ob.

⁴⁸Te'ex can jajcuntic le ba'alo'oba'.

⁴⁹Ile'ex tene' bíin in túuxt ta wóokole'ex le ba'ax u ya'almaj in Taatae', ba'ale' p'áatene'ex way tu caajil Jerusalén tac quéen a kame'ex le páajtalil ca'an u taalo'.

⁵⁰Ca túun j bisa'abo'ob tumen Jesús tac Betania, ca tu líiksaj u kabo'obe' ca tu qui'iqui' t'antajo'ob.

⁵¹Ca'aliquil táan u qui'iqui' t'antico'obe', tu jun páaycunsubáa ti'obe' ca j bisa'ab ca'an.

⁵²Leti'obe', cu dzo'ocol u kultico'obe', suunajo'ob Jerusalén, jach qui'imac u yóolo'ob.

⁵³Ti' yano'ob kulnaj mantadze', táan u qui'iqui' t'antico'ob Yuum Ku. Amén.